រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា រថយន្តមួយគ្រឿង ខណៈបង្កគ្រោះថ្នាក់ចរាចរណ៍ដោយបើកកៀររថយន្តមួយគ្រឿងក្នុងទិសដៅស្របគ្នា បណ្ដាលឲ្យរងការខូចខាត ហើយព្យាយាមបើករត់គេចបន្ថែមទៀត បង្កឱ្យមានការភ្ញាក់ផ្អើលកាលពីម៉ោង៣និង៣០នាទីទៀបភ្លឺ ឈានចូលថ្ងៃទី៨ ខែកុម្ភៈ ឆ្នាំ២០២០ នៅចំណុចផ្លូវ២៧១ ក្នុងសង្កាត់បឹងទំពុន១ ខណ្ឌមានជ័យ ហើយឃាត់រថយន្ដបង្កបាននៅជិតវិទ្យាល័យបឹងត្របែក ផ្លូវ៤៨៤កែង១០១ ក្នុងសង្កាត់ផ្សារដើមថ្កូវ ខណ្ឌចំការមន ។
តាមប្រភពពីកន្លែងកើតហេតុបានឱ្យដឹងថា មុនកើតហេតុ គេបានឃើញបុរសម្នាក់វ័យជាង២០ឆ្នាំ បានបើករថយន្តម៉ាកឡិចស៊ីស GS300 ពណ៌ស ពាក់ស្លាកលេខ ភ្នំពេញ 2BC9343 ធ្វើដំណើរតាមផ្លូវ២៧១ ពីជើងទៅត្បូង លុះមកដល់កើតហេតុដែលជាកន្លែងមានភ្លើងស្តុប ក៏ស្រាប់តែមានបុរសម្នាក់ទៀតវ័យ៤០ឆ្នាំបើករថយន្ត១គ្រឿងពណ៌ត្រេអ៊ី ពាក់ស្លាកលេខ ខេមរៈភូមិន្ទ 02 2.6899 មកពីក្រោយហើយ រួចបត់ឆ្វេងឡើងទៅរង្វង់មូលផ្សារដើមថ្កូវ ក៏ជ្រុលទៅកៀរនឹងរថយន្តឡិចស៊ីស បណ្ដាលឲ្យរងការខូចខាតក្រពឹតថ្ពាល់មុខចំហៀងខាងស្ដាំ និងធ្លាក់កាងទៀតផង តែមិនមានរងរបួសដល់មនុស្សនោះទេ ។
ប្រភពដដែលបន្តថា ដោយឡែករថយន្តបង្កពណ៌ត្រេអ៊ី រងការខូចខាតក្រពឹតផ្នែកខាងចំហៀងខាងឆ្វេងបន្តិច។ ប៉ុន្តែភ្លាមៗនោះដែរ នៅពេលបង្កគ្រោះថ្នាក់ហើយ អ្នកបើកបររថយន្តមិនព្រមឈប់នោះទេ គឺព្យាយាមបើករត់គេចរហូតដល់ផ្លូវ៤៨៤ កែង១០១ សង្កាត់ផ្សារដើមថ្កូវ ខណ្ឌចំការមន ក៏ត្រូវខាងរថយន្តរងគ្រោះដេញឃាត់បានទាំងរថយន្ដ និងអ្នកបើកបរតែម្តង ។ ក្នុងហេតុការណ៍នេះដែរ ភាគីខាងរថយន្តបង្កដឹងខ្លួនខុស ទើបតេទូរសព្ទហៅតំណាងមកសម្របសម្រួលគ្នាជាមួយនឹងខាងរថយន្តរងគ្រោះ ។
ក្រោយពេលកើតហេតុ តំណាងភាគីរថយន្ដទាំងសងខាងបានសម្របសម្រួលគ្នា ដោយខាងរថយន្តបង្កយល់ព្រមចេញថ្លៃការជួសជុលទៅឱ្យខាងរថយន្តរងគ្រោះ ដើម្បីបញ្ចប់រឿង ។ (កែសម្រួលដោយ ៖ បុប្ផា)
ចែករំលែកព័តមាននេះ