រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អគ្គិភ័យបានឆាបឆេះរោងចក្រកាត់ដេរសម្លៀកបំពាក់ដ៏ធំចំនួន២កន្លែងដែលសង់ជាប់គ្នា បង្កឱ្យក្លាយជាអណ្តាតភ្លើងឆាបឆេះយ៉ាងខ្លាំងលាយលំជាមួយផ្សែងហ៊ុយខ្មួលខ្មាញ់ឡើងលើវេហា បង្កជាការភ្ញាក់ផ្អើលកាលពីម៉ោង៥និង១០នាទីល្ងាច ថ្ងៃទី០៨ ខែកុម្ភៈ ឆ្នាំ២០២០ ស្ថិតនៅចំណុចក្បែរនឹងអគ្គីសនីកម្ពុជា…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អគ្គិភ័យបានឆាបឆេះរោងចក្រកាត់ដេរសម្លៀកបំពាក់ដ៏ធំចំនួន២កន្លែងដែលសង់ជាប់គ្នា បង្កឱ្យក្លាយជាអណ្តាតភ្លើងឆាបឆេះយ៉ាងខ្លាំងលាយលំជាមួយផ្សែងហ៊ុយខ្មួលខ្មាញ់ឡើងលើវេហា បង្កជាការភ្ញាក់ផ្អើលកាលពីម៉ោង៥និង១០នាទីល្ងាច ថ្ងៃទី០៨ ខែកុម្ភៈ ឆ្នាំ២០២០ ស្ថិតនៅចំណុចក្បែរនឹងអគ្គីសនីកម្ពុជា ម្តុំផ្សារដីថ្មី ក្នុងភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ ។
សេចក្តីរាយការណ៍បន្តថា រោងចក្រចំនួន២ខាងលើ ទី១- មានទំហំ៨០០០ការ៉េ ក្នុងនោះផ្ទៃទំហំខូចខាត ៥០ម៉ែត្រគុណ១០ម៉ែត្រ និងទីតាំងទី២- មានទំហំ៦០ម៉ែត្រ គុណ៨០ម៉ែត្រ ត្រូវឆាបឆេះទាំងស្រុងតែម្តង ។
យោងតាមប្រភពពីកន្លែងកើតហេតុបានឱ្យដឹងថា នៅមុនកើតហេតុប្រមាណជាកន្លះម៉ោង ក្រោយពេលក្រុមកម្មករជាច្រើនរយនាក់ដែលធ្វើការក្នុងរោងចក្រនោះបាននាំគ្នាចាកចេញពីធ្វើការត្រឡប់ទៅផ្ទះអស់ហើយ នៅសល់តែក្រុមកម្មករប្រមាណជាង២០នាក់ប៉ុណ្ណោះ ដែលនៅធ្វើការងារបន្ត ព្រោះពួកគេត្រូវថែមម៉ោងធ្វើការ ។
ប្រភពដដែលបន្តថា កំឡុងពេលក្រុមកម្មករកំពុងធ្វើការ ( ដេរសម្លៀកបំពាក់ ) ស្រាប់តែមានផ្សែងហ៊ុយចេញពីកន្លែងស្តុកកំណាត់ដោយមិនដឹងមូលហេតុ ។ រំពេចភ្លាមៗនោះ ស្រាប់តែកើតចេញជាអណ្តាតភ្លើងឆាបឆេះខ្លាំងឡើងតែម្តង បង្កឱ្យក្រុមកម្មករជាង២០នាក់កំពុងអង្គុយជាន់ម៉ាស៊ីនដេរសម្លៀកបំពាក់នោះ នាំគ្នាស្រវេរស្រវារត់ចេញទៅខាងក្រៅរោងចក្រ និងរាយការណ៍ជូនអ្នកគ្រប់គ្រងរោងចក្រឱ្យបានដឹង ដើម្បីរាយការណ៍បន្តទៅកាន់ អាជ្ញាធរមូលដ្ឋានអោយជួយចុះអន្តរាគមន៍ ។
ប្រភពដដែលបន្តថា បន្ទាប់ពីឆាបឆេះភ្លាមៗ កម្លាំងអាជ្ញាធរមូលដ្ឋាន រួមជាមួយកម្លាំងនគរបាល កម្លាំងកងរាជអាវុធហត្ថ ជាពិសេសក្រុមរថយន្តពន្លត់អគ្គីភ័យជាច្រើនគ្រឿង មកពីតាមបណ្តាអង្គភាពពាក់ព័ន្ធជាច្រើនផ្សេងៗ ចុះអន្តរាគមន៍ដល់កន្លែងកើតហេតុ ដើម្បីធ្វើការបាញ់ទឹកទប់ស្កាត់អណ្តាតភ្លើង ប៉ុន្តែមុនពេលដែលរថយន្តពន្លត់អគ្គិភ័យចុះទៅដល់នោះ អគ្គិភ័យឆាបឆេះបន្តចូលទៅកាន់រោងចក្រកាត់ដេរមួយទៀតនៅជាប់នោះទៅហើយ បង្កឱ្យមានការឆាបឆេះកាន់តែខ្លាំងឡើងផងដែរ ។
បើទោះបីជាមានការខិតខំប្រឹងប្រែងពីសំណាក់កម្លាំងពាក់ព័ន្ធទាំងអស់យ៉ាងណាក៏ដោយ ក៏អណ្តាតភ្លើងបានបន្តឆាបឆេះយ៉ាងសន្ធោសន្ធៅខ្លាំងដដែល លុះរហូតដល់ម៉ោង១១យប់ថ្ងៃដដែល ទើបស្ថានភាពភ្លើងមានការថបថយ ទើបកម្លាំងនគរបាលជំនាញអាចគ្រប់គ្រងស្ថានការណ៍ឱ្យធូរស្បើយបានស្ទើរតែទាំងស្រុង ។ ហើយក្នុងហេតុការណ៍គ្រោះអគ្គិភ័យឆាបឆេះរោងចក្រទាំង២ខាងលើនេះ សមត្ថកិច្ចប្រើប្រាស់រថយន្តអស់៥០គ្រឿងឡើងចុះយកទឹកស្មើរនឹង៤៣០គ្រឿង ។
ប្រភពដដែលបន្តទៀតថា ដោយឡែកចំពោះមូលហេតុនៃការឆាបឆេះ សមត្ថកិច្ចជំនាញពុំទាន់អាចបញ្ជាក់បាននៅឡើយនោះទេ រង់ចាំការធ្វើកោសល្យវិច្ច័យពិនិត្រនៅពេលក្រោយ។ អ្វីជាការកត់សម្គាល់នៅជុំវិញករណីខាងលើនេះ គឺការឆាបឆេះឡើងនៅចំណុចកណ្តាលនៃរោងចក្រដែលនៅជុំវិញតំបន់នោះ គឺប្រមូលផ្តុំឱ្យរោងចក្រធំៗជាច្រើនសង់ជាប់គ្នាយ៉ាងរដឹងតែម្តង ។
កត្តានេះហើយ គឺជាហេតុធ្វើឱ្យមានការលំបាកសម្រាប់ក្រុមនគរបាលជំនាញអគ្គិភ័យមិនអាចចូលរថយន្ត ឬទាយទុយោចូលទៅបាញ់ទឹកពន្លត់អណ្តាតភ្លើងឱ្យចំកន្លែងដែលឆាបឆេះបានឡើយ គឺបានត្រឹមតែបញ្ឈររថយន្តជាច្រើនគ្រឿងបាញ់ទឹកទប់ស្កាត់អណ្តាតភ្លើងពីខាងក្រៅចូលទៅខាងក្នុង និងមួយវិញទៀត គឺនគរបាលទាយទុយោ ចូលទៅក្នុងរោចក្រដែលនៅជាប់ក្បែរនោះ ត្រៀមចាំបាញ់ទឹកទប់ស្កាត់ ក្នុងករណីប្រសិនបើអណ្តាតភ្លើងឆាបឆេះរាលដាលចូលមកប៉ុណ្ណោះ ។
សូមបញ្ជាក់ថា ក្នុងការឆាបឆេះខាងលើនេះ ក៏ឆាបឆេះរាលដាលចូលទៅកាន់រោងចក្រមួយចំនួននៅជាប់នៅផងដែរ ប៉ុន្តែមិនបណ្តាលឱ្យមានការឆាបឆេះខ្លាំងនោះឡើយ ។
បើតាមនាយការិយាល័យ ពន្លត់ និងបង្ការគ្រោះអគ្គីភ័យ នៃស្នងការដ្ឋាននគរបាលរាជធានីភ្នំពេញ លោកព្រហ្ម យ៉ន បានបញ្ជាក់ប្រាប់តាមទូរស័ព្ទនៅព្រឹកនេះ ឱ្យដឹងថា ជុំវិញករណីខាងលើនេះ ក្រុមជំនាញរបស់លោកពុំទាន់អាចធ្វើការវាយតម្លៃចំពោះទំហំនៃការខូចខាតបាននៅឡើយនោះទេ ប៉ុន្តែគ្រាន់តែអាចសន្និដ្ឋានថា បើគិតជាសាច់ប្រាក់ចំពោះការខូចខាត គឺមិនក្រោមខ្ទង់លានដុល្លារនោះឡើយ ។
ទន្ទឹមនឹងនោះ សមត្ថកិច្ចក៏ពុំទាន់ដឹងថា មានមនុស្សប៉ុន្មានរងរបួសក្នុងករណីនេះដែរ រង់ចាំការចុះធ្វើកោសល្យវិច្ច័យពិនិត្យ និងសាកសួរនាំបន្ថែម នៅថ្ងៃទី០៩ នេះ បន្តទៀត ។ (កែសម្រួលដោយ ៖ បុប្ផា)
ចែករំលែកព័តមាននេះ