រាជធានីភ្នំពេញ ៖ តំណាងមកពីក្រុមហ៊ុនអាមេរិកចំនួន១៦ក្រុមហ៊ុនដែលសុទ្ធសឹងតែជាក្រុមហ៊ុនធំៗក្នុងតំបន់បានមកកម្ពុជា ដើម្បីស្វែងរកការវិនិយោគក្នុងវិស័យកសិកម្ម ដើម្បីកែច្នៃនាំចេញទៅកាន់ទីផ្សារសហរដ្ឋអាមេរិកវិញ ។
នៅព្រឹកថ្ងៃទី០៦ ខែកុម្ភៈ ២០២០នេះ តំណាងក្រុមហ៊ុនមកពីអាមេរិកនិងតំណាងក្រុមហ៊ុនខ្មែរជាច្រើនបានចូលរួមក្នុងវេទិកាធុរកិច្ចមួយរៀបចំឡើងនៅសណ្ឋាគាររ៉ូសវូដ ដោយមានការចូលរួមពីឯកអគ្គរដ្ឋទូតអាមេរិកប្រចាំកម្ពុជា និងរដ្ឋមន្ត្រីក្រសួងពាណិជ្ជកម្មកម្ពុជាផងដែរ ។ នៅក្នុងសន្និសីទជាមួយអ្នកសារព័ត៌មានលោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានមានប្រសាសន៍ថា នេះមិនមែនជាលើកទី១ទេ ដែលអាមេរិកគៀងគរតំណាងក្រុមហ៊ុនធំៗពីអាមេរិកមកកម្ពុជា ដើម្បីស្វែងរកឱកាសវិនិយោគនៅកម្ពុជា តែសម្រាប់លើកនេះ គឺជាព្រឹត្តិការណ៍ប្រវត្តិសាស្ត្រដែលមានធុរជនមកពីតំណាងក្រុមហ៊ុនធំៗនៅអាមេរិកបានមកដល់កម្ពុជា និងសិក្សាស្វែងយល់ពីឱកាសក្នុងវិនិយោគលើពាណិជ្ជកម្មនិងកសិកម្ម ក្នុងនោះមានក្រុមហ៊ុនបច្ចេទេសធំៗផងដែរ ដូចជាក្រុមហ៊ុន Walmart, IBM , Amazon , ADM , John Deer ជាដើម ។
លោកបានបន្តថា មូលហេតុដែលអាមេរិកចង់មករកការវិនិយោគក្នុងវិស័យកសិកម្មកម្ពុជា នៅពេលនេះ ដោយសារតែវិស័យកសិកម្មកម្ពុជា បានផ្ដល់ប្រយោជន៍ធំដល់ប្រជាពលរដ្ឋ ជាក់ស្ដែងតាមអ្វីដែលលោកបានដឹង មានប្រជាជនប្រមានជាង១លាននាក់កំពុងធ្វើការងារក្នុងវិស័យកសិកម្ម ហើយបើសិនជាវិស័យបានពង្រីកបន្ថែមវានឹងផ្ដល់ការងារជាច្រើនទៀតដល់ប្រជាពលរដ្ឋកម្ពុជា ។ មិនត្រឹមតែផ្ដល់ការងារប៉ុណ្ណោះទេ ការវិនិយោគលើវិស័យកសិកម្ម ក៏ជំរុញអោយមានការនាំចេញផលិតផលកែច្នៃពីកសិកម្មសម្រាប់ទីផ្សារក្រៅប្រទេសផងដែរ ។ លោកបានបន្ថែមថា នៅពេលដែលមានការវិនិយោគវិស័យកសិកម្មនិងការកែច្នៃ នោះកម្ពុជានឹងអាចកាត់បន្ថយបាននូវការនាំចេញវត្ថុធាតុដើម ដែលមានតម្លៃទាប តែផ្លាស់មកវិញនូវការនាំចេញផលិតផលសម្រេចក្រោយកែច្នៃ និងអាចមានតម្លៃខ្ពស់ជាង ព្រមទាំងមានទីផ្សារកាន់តែច្រើនផងដែរជាពិសេសទីផ្សារអាមេរិក ។ ជនជាតិអាមេរិកចូលចិត្តផ្លែឈើដែលដាំដុះនៅកម្ពុជា ដូច្នេះនៅពេលអនាគតការវិនិយោគលើដំណាំហូបផ្លែនៅកម្ពុជាសំណាក់វិនិយោគិនអាមេរិកនឹងមានកាន់តែច្រើនថែមទៀត ។
លោក Allen Tang ប្រធានសភាពាណិជ្ជកម្មអាមេរិកប្រចាំប្រទេសកម្ពុជា បានអោយដឹងផងដែរថា សភាពាណិជ្ជកម្មអាមេរិកប្រចាំកម្ពុជា នឹងរង់ចាំក្រុមហ៊ុនអាមេរិកមកដល់កម្ពុជា និងណែនាំក្រុមហ៊ុនទាំងនោះពីរបៀបរបបធ្វើជំនួញនៅក្នុងប្រទេសកម្ពុជា ពីច្បាប់ទំលាប់ ពីតួនាទីរបស់ខ្លួនដើម្បីឆ្លើយតបទៅនឹងសង្គមវិញ ។ លោកបានបន្ថែមទៀតថា «សភាពាណិជ្ជកម្មសហរដ្ឋអាមេរិកប្រចាំកម្ពុជា ក៏សូមស្វាគមន៍ក្រមហ៊ុនកម្ពុជា ក្នុងការក្លាយខ្លួនជាសមាជិករបស់ខ្លួន និងតភ្ជាប់ទីផ្សារកម្ពុជាទៅកាន់ទីផ្សារសហរដ្ឋអាមេរិកព្រមទាំងអាចរកទីផ្សារនៅសហរដ្ឋអាមេរិកដល់ក្រុមហ៊ុនខ្មែរផងដែរ » ។ លោកបន្តថា កម្ពុជានៅតែហុចឱកាសខ្ពស់ទៅដល់ក្រុមហ៊ុនអាមេរិកនិងក្រុមហ៊ុនមកពីបរទេសជាច្រើនទៀតដាក់ទុនរកស៊ី ។ ដោយឡែកសម្រាប់ក្រុមហ៊ុនសហរដ្ឋអាមេរិកមានសហគ្រិនទទួលបានជោគជ័យជាច្រើន ដែលបានដាក់ទុនរកស៊ីនៅក្នុងប្រទេសកម្ពុជា ដូច្នេះវាជាគំរូមួយដែលអាចទាក់ទាញវិនិយោគិនអាមេរិកមករកស៊ីនៅក្នុងប្រទេសកម្ពុជា ។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានថ្លែងថា កម្ពុជា ស្វាគមន៍នូវប្រតិភូក្រុមហ៊ុនធំៗមកពីអាមេរិកដើម្បីសិក្សាឱកាសវិនិយោគនៅក្នុងប្រទេសកម្ពុជា ជាពិសេសវិស័យកសិកម្ម ។ ក្នុងឆ្នាំមុនៗនេះ កម្ពុជាបាននាំចេញផលិតផលកសិកម្មទៅកាន់សហរដ្ឋអាមេរិករាប់សិបលានដុល្លារអាមេរិក ។ លោករដ្ឋមន្ត្រីក្រសួងពាណិជ្ជកម្មកម្ពុជាបានបន្តថា «កម្ពុជា មានទីតាំងឧស្សាហកម្មជាច្រើនដែលអាចអោយវិនិយោគិនដាក់ទីតាំងវិនិយោគភ្លាមៗ ក្នុងនោះយើងមានតំបន់សេដ្ឋកិច្ចជាច្រើនដែលកំពុងដំណើរការ និងមានរៀបចំហេដ្ឋារចនាសម្ព័ន្ធរួចជាច្រើន » ៕ កែសម្រួលដោយ ៖ សុឃាក់
ចែករំលែកព័តមាននេះ