រាជធានីភ្នំពេញ ៖ តាមប្រភពពីនគរបាលបានប្រាប់ឱ្យដឹងថា ជនសង្ស័យម្នាក់ដែលសុំជិះម៉ូតូគេសាករួចជិះគេចខ្លួនបាត់នោះឈ្មោះប៊ុន សេង ភេទប្រុស អាយុ២៨ឆ្នាំ មុខរបរជាងដែក ស្នាក់នៅភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ ត្រូវកម្លាំងនគរបាលព្រហ្មទណ្ឌខណ្ឌពោធិ៍សែនជ័យសហការជាមួយម្ចាស់ម៉ូតូតាមរកឃើញនិងចាប់ខ្លួនបានកាលពីវេលាម៉ោង១២និង១៥នាទីយប់រំលងអធ្រាត្រឈានចូលថ្ងៃទី៧ ខែកុម្ភៈ ឆ្នាំ២០២០ ខណៈដែលជនសង្ស័យចេញពីលេងល្បែងនៅកាសុីណូ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ក្រោយពីចាប់ខ្លួនជនសង្ស័យបានរួចហើយ ស្ត្រីខារ៉ាអូខេ២នាក់ផ្សេងទៀតដែលត្រូវម្ចាស់ម៉ូតូឃាត់ខ្លួនខ្លួននោះ ក៏ត្រូវបានដោះលែងវិញផងដែរ ព្រោះពួកនាងក៏បានចាញ់បោកជនសង្ស័យម្នាក់នោះផងដែរ។
ក្រោយពីជនសង្ស័យត្រូវបាននាំទៅធ្វើការសាកសួរនៅផ្នែកព្រហ្មទណ្ឌខណ្ឌពោធិ៍សែនជ័យ ហើយបានឆ្លើយសារភាពថា ខ្លួនពិតជាបានធ្វើសកម្មភាពបោកយកម៉ូតូពីហាងលក់ម៉ូតូយីហោ«រស្មីហេងឆាយច្រិច» ស្ថិតនៅភូមិជម្ពូវ័ននោះមែន ។ បន្ទាប់មកខ្លួនយកទៅបញ្ចាំបានលុយចំនួន៨០០ដុល្លារអាមេរិករួចហើយបានចូលលេងល្បែងនៅកាសុីណូចាញ់អស់ហើយ ។
ជនសង្ស័យបានសារភាពបន្តថា នេះគឺជាលើកទី២ហើយ ដែលខ្លួនធ្វើសកម្មភាពបោកយកម៉ូតូអ្នកដទៃ ដោយកាលពី១អាទិត្យមុន ខ្លួនបានឆបោកយកបានម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៩ ពីបុរសម្នាក់ និងលក់យកលុយចូលលេងល្បែងចាញ់អស់ហើយដែរ ទើបនៅល្ងាចថ្ងៃទី៦ ខែកុម្ភៈខ្លួនបន្តទៅបោកយកម៉ូតូពីហាងលក់ម៉ូតូយីហោ«រស្មីហេងឆាយច្រិច» ទៀត ។
បច្ចុប្បន្ន ជនសង្ស័យត្រូវបានសមត្ថកិច្ចកំពុងធ្វើការសាកសួរ ដោយសារសមត្ថកិច្ចមានការសង្ស័យថា ជនសង្ស័យម្នាក់ខាងលើអាចមានជាប់ពាក់ព័ន្ធករណីឆបោកច្រើនករណី ៕ (កែសម្រួលដោយ ៖ ធីតា)
ចែករំលែកព័តមាននេះ