រាជធានីភ្នំពេញ ៖ អធិការដ្ឋាននគរបាលខណ្ឌដូនពេញបានឃាត់ខ្លួនជនសង្ស័យចំនួនពីរនាក់
ខណៈពេលកំពុងធ្វើសកម្មភាពឆក់ទូរស័ព្ទពីបុរសជនបរទេសម្នាក់ នៅចំណុចមុខផ្ទះលេខ១៩
ផ្លូវលេខ២៤០ ភូមិ១១ សង្កាត់ជ័យជំនះ ខណ្ឌដូនពេញ កាលពីវេលាម៉ោង៤រសៀលថ្ងៃទី៦
ខែកុម្ភៈ ឆ្នាំ២០២០ ។
ជនសង្ស័យទាំង២នាក់ខាងលើ ក្នុងនោះម្នាក់ឈ្មោះ ឈឹម ហេងឡុង ភេទប្រុស
អាយុ៣០ឆ្នាំ មុខរបរមិនពិតប្រាកដ មានទីលំនៅផ្ទះលេខ៦៧៨ ផ្លូវលេខ២៧១ ភូមិក្បាលទំនប់
សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ និងម្នាក់ទៀតឈ្មោះគឹម ស្រៀង
ភេទប្រុស អាយុ២១ឆ្នាំ មុខរបរមិនពិតប្រាកដ មានទីលំនៅផ្ទះលេខ៤៦ ផ្លូវលេខ១
ភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។ (ជនសង្ស័យទាំង២នាក់
ធ្លាប់បានប្រើប្រាស់គ្រឿងញៀន) ។ ចំណែកជនរងគ្រោះ ឈ្មោះ GASTALDI GIL ភេទប្រុស អាយុ៥៦ឆ្នាំ
ជាជនជាតិបារាំង មុខរបរទេសចរណ៍ កាន់លិខិតឆ្លងដែនលេខ 19ED99280 ស្នាក់នៅផ្ទះសំណាក់
PHONG
HOME ផ្លូវលេខ២៤០ សង្កាត់ចតុមុខ ខណ្ឌដូនពេញ រាជធានីភ្នំពេញ។
ចំណែកវត្ថុតាងចាប់យករួមមានម៉ូតូមួយគ្រឿងម៉ាកវីវ៉ា ពណ៌ស
ពាក់ស្លាកលេខ ភ្នំពេញ ១GL-៩៥០៤ ជារបស់ជនសង្ស័យជិះធ្វើសកម្មភាព និងទូរស័ព្ទដៃមួយគ្រឿងម៉ាក
iPhone
11PRO ពណ៌ស ជារបស់ជនរងគ្រោះ។
តាមប្រភពពីសមត្ថកិច្ចបានឲ្យដឹងថា មុនពេលកើតហេតុ បុរសជនបរទេសរងគ្រោះបានដើរកាន់ទូរសព្ទ័ដៃធ្វើដំណើរតាមបណ្តោយផ្លូវលេខ១៩ ក្នុងទិសដៅពីជើងទៅត្បូង លុះពេលមកដល់ចំណុចមុខស្តុបផ្លូវលេខ១៩ កែងផ្លូវលេខ២៤០ ភូមិទី១១ សង្កាត់ជ័យជំនះ ខណ្ឌដូនពេញ ស្រាប់តែមានជនសង្ស័យចំនួន២នាក់ជិះម៉ូតូមួយគ្រឿងមកពីក្រោយអែបខាងស្តាំដៃរបស់ជនរងគ្រោះ ហើយជនសង្ស័យឈ្មោះ ឈឹម ហេងឡុង ដែលអង្គុយពីក្រោយជាអ្នកធ្វើសកម្មភាពឆក់យកទូរស័ព្ទដៃពីដៃជនរងគ្រោះបានសម្រេចតែម្តង ។
តាមប្រភពដដែលបានបន្តថា ពេលនោះជនរងគ្រោះបានស្រែកឆោឡោ បង្កការភ្ញាក់ផ្អើលដល់កម្លាំងឈរជើងពួនស្ទាក់តាមគោលដៅរបស់ប៉ុស្តិ៍
និងកម្លាំងល្បាតបង្ការទប់ស្កាត់បទល្មើសរបស់ខណ្ឌបានអន្តរាគមន៍ជិះម៉ូតូដេញតាមពីក្រោយ
និងឃាត់ខ្លួនជនសង្ស័យបានទាំង២នាក់ ព្រមទាំងដកហូតបានវត្ថុតាង រួចនាំមកកាន់ប៉ុស្តិ៍នគរបាលរដ្ឋបាលជ័យជំនះដើម្បីធ្វើការសាកសួរ។
បច្ចុប្បន្ន ជនសង្ស័យទាំង២នាក់ខាងលើ ត្រូវបានកំលាំងជំនាញខណ្ឌ និងប៉ុស្តិ៍កសាងសំណុំរឿងដើម្បីចាត់ការតាមនិតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ