អុីតាលី ៖ អាជ្ញាធរអ៊ីតាលីបាននិយាយថាមនុស្ស២នាក់បានស្លាប់ និងរាប់សិបនាក់ទៀតបានរងរបួស បន្ទាប់ពីរថភ្លើងល្បឿនលឿនមួយបានក្រឡាប់នៅក្នុងខេត្ត Lodi របស់ប្រទេសអ៊ីតាលី កាលពីព្រឹកថ្ងៃព្រហស្បតិ៍។
ការធ្លាក់នេះបានកើតឡើងនៅក្នុងទីប្រជុំជន Casalpusterlengo ដែលមានចម្ងាយប្រហែល ៣០ម៉ាយល៍នៃភាគអាគ្នេយ៍នៃទីក្រុង Milan នៅភាគខាងជើងនៃប្រទេស។ បុគ្គលិកលើរថភ្លើង២នាក់បានស្លាប់ និង ២៨នាក់បានរងរបួស។ នេះបើយោងតាមកងពន្លត់អគ្គិភ័យអ៊ីតាលី។
ក្រុមសង្គ្រោះបន្ទាន់និងអ្នកពន្លត់អគ្គីភ័យកំពុងស្ថិតនៅកន្លែងកើតហេតុ ដើម្បីជួយសង្គ្រោះ និង វាយតម្លៃការខូចខាត។ ប៉ូលីសអ៊ីតាលីក៏កំពុងតែធ្វើការដុតដៃដុតជើងនៅកន្លែងកើតហេតុនោះដែរ។
យោងតាមព័ត៌មានពីបណ្តាញផ្លូវដែកអ៊ីតាលី រថភ្លើងនេះបានធ្វើដំណើរពី Milan ទៅ Salerno នៅពេលដែលវាបានក្រឡាប់នៅជិតស្ថានីយ៍ Livraga នៅម៉ោងប្រហែល ៥កន្លះព្រឹក (ម៉ោងក្នុងស្រុក)។ បណ្តាញផ្លូវដែកអ៊ីតាលីបាននិយាយថា ចរាចរណ៍រថភ្លើងត្រូវបានផ្អាកនៅលើខ្សែល្បឿនលឿនបន្ទាប់ពីមានគ្រោះថ្នាក់ ហើយរថភ្លើងនៅតាមបណ្តាញក្នុងតំបន់កំពុងដំណើរការជាមួយនឹងការពន្យារពេលផងដែរ។
យោងតាមគេហទំព័ររបស់បណ្តាញអ៊ីនធើណេត ខ្សែល្បឿនលឿនរវាង Milan និង Bologna ត្រូវបានបើកនៅខែធ្នូ ឆ្នាំ២០០៨។ ល្បឿនអតិបរមាដែលរថភ្លើងអាចទៅដល់លើផ្លូវគឺ ៣០០ គីឡូម៉ែត្រក្នុងមួយម៉ោង។ គេនៅមិនទាន់ដឹងទេថា រថភ្លើងពេលមុនគ្រោះថ្នាក់បានបើកក្នុងល្បឿនប៉ុនណានោះទេ។
អ្នកដែលស្លាប់នោះមានឈ្មោះថា Giuseppe Cicciu និង Mario Di Cuonzo ។ ប្រធានាធិបតីអ៊ីតាលីលោក Sergio Mattarella បានសរសេរសាររំលែកទុក្ខដល់ក្រុមគ្រួសាររបស់ពួកគេ៕
កែសម្រួលដោយ ៖ សំណាង
ចែករំលែកព័តមាននេះ