ADផ្ទាំងផ្សព្វផ្សាយពាណិជ្ជកម្ម

អាជ្ញាធរចុះរុះរើផ្ទះដែលសង់លើប្រឡាយមេក្នុងសង្កាត់កាកាប

4 ឆ្នាំ មុន

ភ្នំពេញ
០៦ ខែ កុម្ភៈ ឆ្នាំ ២០២០ ម៉ោង ១៧:២៣

រាជធានីភ្នំពេញ ៖ ប្រជាពលរដ្ឋចំនួន១៣គ្រួសារដែលតាមការអះអាងពីអាជ្ញាធរថាមកពីតំបន់បឹងកក់បាននាំគ្នាទៅចាប់យកដីប្រឡាយមេមួយកន្លែងស្ថិតនៅក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ដោយពួកគាត់បានសង់ផ្ទះឈើរស់នៅទើបតែបានរយៈពេល១អាទិត្យប៉ុណ្ណោះ ហើយនៅពេលទើបចាប់ផ្ដើមរៀបចំសាងសង់ដំបូង បើទោះបីជាមានការហាមឃាត់ពីសំណាក់អាជ្ញាធរសង្កាត់យ៉ាងណាក៏ពួកគាត់មិនព្រមស្ដាប់ដែរ។ ពួកគាត់នៅតែរឹងរូសហើយនាំគ្នាសង់…

ពួកគាត់នៅតែរឹងរូសហើយនាំគ្នាសង់ ដែលក្នុងរយៈពេល១អាទិត្យ អ្នកខ្លះសង់បានសម្រេចជាស្ថាពរ និងខ្លះទៀតសង់ជិតសម្រេចទៅហើយ ទន្ទឹមនឹងនេះ អាជ្ញាធរបានសំណូមពរយ៉ាងទទូចឲ្យពួកគាត់រុះរើចេញវិញដោយខ្លួនឯងដែរ ប៉ុន្តែពួកគាត់មិនព្រមឡើយ។ ដើម្បីរក្សាទុកប្រឡាយសម្រាប់រំដោះទឹកបញ្ចៀសការលិចលង់ភូមិឋានជាច្រើនពេលមានជំនន់ទឹកភ្លៀងនារដូវវស្សានោះ ទើបនៅវេលាព្រឹកថ្ងៃទី៦ ខែកុម្ភៈ ឆ្នាំ២០២០ អាជ្ញាធរខណ្ឌពោធិ៍សែនជ័យនិងសង្កាត់កាកាបទី២ ដឹកនាំដោយលោកអភិបាលរងខណ្ឌប៉ាង លីដា បាននាំយកគ្រឿងចក្រចុះទៅធ្វើការរុះរើចេញ ហើយក៏ជាការទប់ស្កាត់ការរីករាលដាលពីការរំលោភបំពានយកដីប្រឡាយមេនេះផងដែរ។

លោក ម៉ាលី ពិសិដ្ឋ ចៅសង្កាត់កាកាបទី២ បានប្រាប់ឲ្យដឹងថា ប្រជាពលរដ្ឋទាំងទាំង១៣គ្រួសារនេះមកពីតំបន់បឹងកក់រាជធានីភ្នំពេញ ហើយកាលពី១អាទិត្យមុនពួកគាត់ទាំងនេះ បានដឹកសម្ភារៈសំណង់ទៅកាន់ទីនោះដើម្បីសាងសង់ផ្ទះរស់នៅក្នុងប្រឡាយមេខាងលើ។

លោកចៅសង្កាត់កាកាបទី២បានបន្តថា បន្ទាប់ពីទទួលបានដំណឹងនោះភ្លាម លោកក៏បានដឹកនាំកម្លាំងដោយផ្ទាល់ចុះទៅធ្វើការ ហាមឃាត់និងណែនាំមិនឲ្យសាងសង់ឡើយ ព្រោះទីនោះគឺជាប្រឡាយមេសម្រាប់រំដោះទឹកមិនឲ្យមានការលិចលង់ភូមិឋានជាច្រើននារដូវវស្សា ហើយការទៅតាំងលំនៅដ្ឋាននៅលើប្រឡាយបែបនេះនឹងបង្កផលប៉ះពាល់ខ្លាំងណាស់ ប៉ុន្តែខណៈនោះពួកគាត់មិនព្រមស្ដាប់ទេ នៅតែបន្តការសាងសង់រហូតបានសម្រេចតាមបំណង ហើយលោកក៏បានរាយការណ៍ពីសកម្មភាពនេះជូនទៅលោកអភិបាលខណ្ឌពោធិ៍សែនជ័យបសនដឹងផងដែរ។

លោកចៅសង្កាត់ដដែលបានបន្តថា ដើម្បីរំដោះយកប្រឡាយមេនេះមកវិញ ព្រមទាំងទប់ស្កាត់កុំឲ្យការរំលោភបំពាននេះកាន់តែមានការរីករាលដាលច្រើនថែមទៀតនោះ ទើបលោកប្រាប់ឲ្យបងប្អូនប្រជាពលរដ្ឋទាំងនេះធ្វើការរុះរើផ្ទះនេះចេញពីប្រឡាយវិញដោយខ្លួនឯង ។ ប៉ុន្តែពួកគាត់ធ្វើមិនដឹងមិនឮពុំព្រមរុះរើឡើយ ទើបអាជ្ញាធរខណ្ឌពោធិ៍សែនជ័យនិងសង្កាត់កាកាបទី២ ដឹកនាំដោយលោកអភិបាលរងខណ្ឌ
ប៉ាង លីដា ដាក់គ្រឿងចក្រចុះទៅធ្វើការរុះរើចេញវិញដោយមិនទទួលខុសត្រូវលើការខូចខាតអ្វីឡើយ មិនតែប៉ុណ្ណោះក្រោយការរុះរើប្រជាពលរដ្ឋទាំងនោះនឹងទៅរកកន្លែងស្នាក់នៅដោយខ្លួនឯងរៀងៗខ្លួន។

សូមបញ្ជាក់ផងដែរថា ផ្ទះដែលអាជ្ញាធរចុះទៅធ្វើការរុះរើនោះពុំមែនជាសំណង់រឹងមាំធ្វើអំពីថ្មនោះទេ គឺសាងសង់ពីឈើតូចៗប្រក់ដំបូលស័ង្កសី ព្រមទាំងបិទបាំងជញ្ជាំងស័ង្កសីដែរ ហើយចាប់តាំងពីថ្ងៃសាងសង់រហូតដល់ថ្ងៃរុះរើនេះមានរយៈពេល១អាទិត្យ ដែលផ្ទះអ្នកខ្លះបានសង់រួចរាល់ជាស្ថាពរនិងផ្ទះខ្លះទៀតទើបតែសង់រួចបាន៦០ទៅ៨០ភាគរយប៉ុណ្ណោះ ។

ក្នុងខណៈដែលអាជ្ញាធរចុះទៅធ្វើការរុះរើផ្ទះនាពេលនោះដែរ ប្រជាពលរដ្ឋខាងលើក៏បានតវ៉ានិងអង្វរមិនឲ្យរុះរើឡើយដោយពួកគាត់បាននិយាយថា ព្រោះតែគ្មានកន្លែងសម្រាប់រស់នៅទើបបានជាពួកគាត់នាំគ្នាទៅសង់ផ្ទះរស់នៅលើប្រឡាយដែលជាដីរដ្ឋបែបនេះ ហើយក៏បានដឹងថាប្រឡាយគឺពុំមែនជាដីកម្មសិទ្ធិរបស់បុគ្គលណាម្នាក់ឡើយ ។ ពួកគាត់សង្ឃឹមថា រស់នៅបានសេចក្ដីសុខ ប៉ុន្តែមិននឹកស្មានថា ពេលនេះត្រូវបានអាជ្ញាធរធ្វើការរុះរើអស់បែបនេះទៅវិញ ហើយពេលនេះពួកគាត់មិនទាន់ដឹងថាត្រូវទៅរស់នៅទីណាឡើយ៕ (កែសម្រួលដោយ ៖ ធីតា)