រាជធានីភ្នំពេញ ៖ តារាសម្តែងវ័យក្មេងអាង សុជាតា ត្រូវបុរសម្នាក់បង្ហោះសារថា នាងបានបាត់ជីវិតជាមួយរូបថតរបស់នាង ហើយគេបានចែកចាយតាមហ្វេសប៊ុក បង្កឲ្យមានការភ្ញាក់ផ្អើលខ្លាំង ។ អាង សុជាតា បានសម្តែងការមិនពេញចិត្ត ដោយចាត់ទុកជាការប្រមាថអាយុជីវិតនាងពីបុរសម្នាក់នោះ ។ នាងបានស្នើសុំឲ្យមហាជនកុំមានការភ័ន្តច្រឡំចំពោះព័ត៌មាននោះ ។
បុរសម្នាក់ម្ចាស់ហ្វេសប៊ុកឈ្មោះ Vanna Ra បានបង្ហោះសារអមជាមួយនឹងរូបថតរបស់តារាសម្តែងអាង សុជាតា មានខ្លឹមសារថា «នៅលើលោកយើងនេះទេវតាពិតជាអយុត្តិធម៌ខ្លាំងណាស់ តើហេតុអ្វីទៅធ្វើបាបតែមនុស្សស្លូតត្រង់បែបនេះ ឱ!កូនស្រីពៅប៉ា ពីថ្ងៃនេះតទៅប៉ាម៉ាក់ តាយាយ យាយទួត បងប្អូនសាច់ញាតិទាំងឡាយលែងបានឃើញមុខស្នាមញញឹមកូនស្រីពៅទៀតហើយ សូមឲ្យព្រលឹង និងវិញ្ញាណក្ខន្ធកូនស្រីពៅទៅកាន់សុគតិភពកុំបីឃ្លៀងឃ្លាតឡើយ និងសូមឲ្យកើតជាតិ ណាៗកុំឲ្យអភ័ព្វដូចជាតិនេះណាកូនពៅប៉ា »។
តាមរយៈសាររបស់បុរសនោះបានធ្វើឲ្យ អាង សុជាតា ហាក់មានអារម្មណ៍ភ័យខ្លាច និងបានបដិសេធ ព្រមទាំងបានស្នើឲ្យលុបចេញនូវអ្វីដែលគេបង្ហោះ ព្រោះចាត់ទុកថាវាជាការប្រមាថអាយុជីវិតនាងយ៉ាងធ្ងន់បំផុត ។ អាង សុជាតា អះអាងថា «ខ្ញុំមិនដែលស្គាល់គាត់ជាអ្នកណាទេ នេះជាព័ត៌មានមិនពិត ខ្ញុំមិនយល់ហេតុអីមកប្រមាថជីវិតខ្ញុំ ? យកជីវិតខ្ញុំលេងសើចអ៊ីចឹងមែនលោកពូ ? សូមជួយលុបគ្រប់យ៉ាងដែលលោកពូ post ពីខ្ញុំផង ។
ខ្ញុំមិនដឹងគាត់មានបំណងអ្វីឡើយ ហើយពេលនេះខ្ញុំសូមឲ្យអ្នកទាំងអស់គ្នាកុំមានការភាន់ច្រឡំអំពីព័ត៌មាននេះ ព្រោះពេលនេះនាងខ្ញុំសុខសប្បាយធម្មតា និងរស់នៅក្នុងផ្ទះជាធម្មតា មិនមានរឿងអ្វីកើតឡើងមកលើរូបខ្ញុំឡើយ »។
ក្រោយពេលឃើញព័ត៌មាននោះ ទស្សនិកជនជាច្រើន រួមទាំងម្តាយរបស់នាងផង បានខលសួរនាំ ទាំងអាង សុជាតា មិនបានដឹងអ្វីទាំងអស់ ខណៈពេលដែលនាងក៏មិនដឹងពីមូលហេតុដែលបុរសនោះយកអាយុជីវិតរបស់នាងមកលេងសើចបែបនេះដែរ ។
នៅក្នុងអំឡុងពេលនេះទាំងគ្រួសារ និងរូបអាង សុជាតា ផ្ទាល់មិនទាន់អាចធ្វើអ្វីចេញ បូករួមទាំងគំនិតនៃការប្តឹងនោះផង ដោយសារតែនាង និងម្តាយមមាញឹកយ៉ាងខ្លាំងនៅក្នុងការសម្តែង ប៉ុន្តែនាងគ្រាន់តែសូមឲ្យម្ចាស់ហ្វេសប៊ុកនោះលុបចោលនូវអ្វីដែលគេបង្ហោះនោះ ។
អាង សុជាតា បញ្ជាក់ថា បើទោះបីជាមានអ្នកអះអាងថា ហ្វេសប៊ុកនោះត្រូវគេលួចលេងក៏ដោយ ប៉ុន្តែសំខាន់នាងមិនស្គាល់បុរសនោះពីមុនមកទេ ហើយសារដែរបានសរសេរបង្ហោះនោះគឺជាការប្រមាថអាយុជីវិតនាង ។
អាង សុជាតា ថារហូតមកទល់ពេលនេះនាងនៅតែមិនយល់អំពីរឿងនេះឡើយថា ហេតុអ្វីគេមិនស្គាល់កូនស្រីខ្លួនឯង ហើយមកច្រឡំជាមួយរូបនាង ថែមទាំងក្នុងទូរស័ព្ទដៃក៏មានរូបនាងច្រើនបែបនេះ ខណះពេលដែលនាងក៏មិនមានlink សម្រាប់ភ្ជាប់ទាក់ទងជាមួយកូនស្រីគាត់ផងដែរ។
បន្ទាប់ពីមានប្រតិកម្មតបតខ្លាំង ហ្វេសប៊ុកនោះបានចេញសារសុំទោសជាសាធារណៈទៅកាន់អាង សុជាតា និងថាអ្វីដែលខ្លួនបានបង្ហោះនោះគឺជាការភាន់ច្រឡំរូបភាព ហើយសង្ឃឹមថា នាងយោគយល់ អធ្យាស្រ័យ ៕ (កែសម្រួលដោយ ៖ បុប្ផា)
ចែករំលែកព័តមាននេះ