រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡាចុះថ្ងៃទី៤ ខែកុម្ភៈ ឆ្នាំ២០២០ បានឲ្យដឹងថា ចាប់តាំងពីមានការផ្ទុះឡើងនូវជំងឺរលាកសួតដោយវីរុសកូរ៉ូណាថ្មី នៅសាធារណរដ្ឋប្រជាមានិតចិនក្រសួងអប់រំ យុវជន និងកីឡា បានធ្វើទំនាក់ទំនងយ៉ាងជិតស្និទ្ធជាមួយក្រុមនិស្សិតកម្ពុជា ដែលកំពុងសិក្សានៅទីក្រុងវូហាន ខេត្តហ៊ូប៉ី ដើម្បីតាមដានបច្ចុប្បន្នភាពនៃការសិក្សា ការរស់នៅ និងសុខុមាលភាពរបស់និស្សិតខ្មែរនៅទីនោះ ។
សេចក្តីប្រកាសព័ត៌មានបន្តថា ចំពោះស្ថានភាពនិស្សិតកម្ពុជាដែលកំពុងសិក្សានៅទីក្រុងវូហាន ខេត្តហ៊ូប៉ី សរុបចំនួន៨៩នាក់ សិក្សានៅសាកលវិទ្យាល័យចំនួន៧កន្លែងផ្សេងៗគ្នា ក្នុងនោះនិស្សិតចំនួន២៣នាក់ ដែលកំពុងមានវត្តមាននៅទីក្រុងវូូហាន មកទល់ពេលនេះ មានសុខភាពរឹងមាំ និងមិនមាននិស្សិតណាម្នាក់ឆ្លងជំងឺរលាកសួតប្រភេទថ្មីនេះទេ ដោយសារនិស្សិតទាំងអស់ទទួលបានការយកចិត្តទុកដាក់យ៉ាងខ្លាំងពីសំណាក់រាជរដ្ឋាភិបាលកម្ពុជា ក្រសួងការបរទេស និងសហប្រតិបត្តិការអន្តរជាតិ ក្រសួងអប់រំ យុវជន និងកីឡា អាជ្ញាធរចិនពាក់ព័ន្ធសាកលវិទ្យាល័យចិន ស្ថានតំណាងព្រះរាជាណាចក្រកម្ពុជាប្រចាំសាធារណរដ្ឋប្រជាមានិតចិន និងសមាគមនិស្សិតនៅទីនោះ ។
និស្សិតមួយចំនួនទទួលបានអាហារពីសាកល វិទ្យាល័យជារៀងរាល់ថ្ងៃ ដោយក្នុងមួយថ្ងៃ៣ពេល ហើយភាគីខាងសាកលវិទ្យាល័យបានយកអាហារមកផ្គត់ផ្គង់ដល់បន្ទប់ស្នាក់នៅរបស់និស្សិត និងនិស្សិតមួយចំនួនទៀតត្រូវទិញអាហារដោយខ្លួនឯងពីកន្លែងលក់ទំនិញដែលនៅជិតសាកលវិទ្យាល័យបំផុត ។គួរកត់សម្គាល់ថា មាននិស្សិតចំនួន៦៦នាក់បានត្រឡប់មកប្រទេសកម្ពុជាកាលពីដើមខែមករា ឆ្នាំ២០២០ ក្នុងគោលបំណងមកលេងស្រុកកំណើត ក្នុងខណៈវិស្សមកាលរដូវរងាដូចរៀងរាល់ឆ្នាំ និងទទួលបានការអនុញ្ញាតឲ្យឈប់សម្រាកត្រឹមត្រូវដោយសាកលវិទ្យាល័យ ។
បច្ចុប្បន្ន សាកលវិទ្យាល័យបានពន្យារពេលវិស្សមកាល និងបានជូនដំណឹងទៅនិស្សិតអំពីកាលបរិច្ឆេទ ចូលរៀនវិញនៅពេលក្រោយ ។ ជាយន្តការទំនាក់ទំនង ក្រសួងអប់រំ យុវជននិងកីឡា បានបង្កើតគណៈកម្មការនិងចាត់តាំងតំណាងមួយរូប ដើម្បីទាក់ទងផ្ទាល់និងសួរសុខទុក្ខនិស្សិតកម្ពុជាទាំង២៣នាក់ ដែលកំពុងស្នាក់នៅទីក្រុងវូហាន ខេត្តហូ៊ប៉ី ជាប្រចាំថ្ងៃ ក្នុងនោះក្រសួងបានផ្ដល់ថវិកាសរុបចំនួន៤៦លានរៀល ដោយនិស្សិតម្នាក់ៗទទួលបាន២លានរៀល ដើម្បីជួយឧបត្ថម្ភដល់ការរស់នៅប្រចាំថ្ងៃរបស់និស្សិតទាំង២៣រូប ។ ថវិកានេះត្រូវបានផ្ទេរជូនតាមរយៈតំណាងនិស្សិតកម្ពុជានៅទីនោះ គឺលោក ប៉ែន បារាំង ដើម្បីចាត់ចែងបន្តទៅដល់និស្សិតផ្សេងទៀត ៕
ចែករំលែកព័តមាននេះ