រាជធានីភ្នំពេញ ៖ គម្រោងធ្វើឱ្យប្រសើរឡើងវិញនៅផ្លូវជាតិលេខ២ ដែលធ្វើឱ្យប្រជាពលរដ្ឋក៏ដូចជាអ្នកវិនិយោគតូចធំ ទន្ទឹងរង់ចាំអស់រយៈពេលច្រើនខែឆ្នាំកន្លងទៅនេះ អាចនិយាយបាននឹងចាប់ផ្តើមបើករដ្ឋានសាងសង់នៅក្នុងខែកុម្ភៈ ឆ្នាំ២០២០ ដើម្បីចូលរួមផ្តល់អត្ថប្រយោជន៍ផ្នែកសេដ្ឋកិច្ច និងការដឹកជញ្ជូនឆ្លងកាត់តំបន់។
គម្រោងធ្វើឱ្យប្រសើឡើងវិញនៅផ្លូវជាតិលេខ២ រួមនឹងផ្លូវជាតិផ្សេងទៀតនេះ បើតាមសម្តេចអគ្គមហាសេនាតេជោ ហ៊ុន សែន បញ្ជាក់ថា នឹងបើការដ្ឋានសាងសង់រួមគ្នានៅខែកុម្ភៈខាងមុខនេះហើយ។
ថ្លែងក្នុងពិធីសំណេះសំណាលជាមួយពលរដ្ឋខ្មែរនៅប្រទេសកូរ៉េកាលថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា «ខ្ញុំគ្រាន់ចង់បញ្ជាក់ថា នៅពេលត្រលប់ពីកូរ៉េមកវិញនៅក្នុងខែកុម្ភៈនេះ នឹងត្រូវបើកសម្ពោធការដ្ឋានសាងសង់ផ្លូវជាតិលេខ២ តភ្ជាប់ពីរង្វង់មូលតាខ្មៅ មានផ្លូវជាតិលេខ២ និងផ្លូវជាតិលេខ២២ ដែលឆ្លងកាត់ខេត្តកណ្តាល ខេត្តតាកែវ និងតម្រង់ឆ្ពោះទៅខេត្តកំពត»។
តាមសម្តេចតេជោ ក្រៅពីបើការដ្ឋានសាងសង់ផ្លូវជាតិលេខ២ និង២២នេះ នៅមានផ្លូវមួយខ្សែផ្សេងទៀត គឺពង្រីកឱ្យទៅជាផ្លូវហាយវេ គឺតភ្ជាប់ពីផ្លូវជាតិលេខ៤ ទៅកោះកុង ដែលផ្លូវនេះពីមុនកសាងដោយព្រះជាណាចក្រថៃ ប៉ុន្តែដោយយោងទៅលើសារៈសំខាន់ទើបត្រូវពង្រីកផ្លូវនេះបន្ថែម។
ទាក់ទងនឹងការបើកការដ្ឋានធ្វើឱ្យប្រសើរឡើងនៅផ្លូវជាតិលេខ២ នៅចំពោះមុខ រួមនឹងផ្លូវសំខាន់ផ្សេងទៀត ក្រោមវត្តមានរបស់សម្តេចតេជោ ហ៊ុន សែន នេះ បើតាមមន្ត្រីអ្នកនាំពាក្យក្រសួងសាធារណការ និងដឹកជញ្ជូន លោក វ៉ា ស៊ឹមសុរិយា បានឱ្យដឹងកាលពីថ្ងៃទី៥កុម្ភៈ ម្សិលមិញថា «តាមកម្មវិធីដែលបានគ្រោងទុកអាចនឹងចាប់ផ្តើមនៅថ្ងៃទី១១ កុម្ភៈ ខាងមុខនេះ»។
លោកលើកឡើងថា ការដែលកម្ពុជាបង្កើនការតភ្ជាប់ផ្លូវ នៅក្នុងប្រទេសទាំងនៅពេលកន្លងមក ក៏ដូចជានៅពេលបច្ចុប្បន្ន និងអនាគត គឺជាធ្វើសមាហរណកម្មក្នុងប្រទេស តភ្ជាប់ទៅក្នុងតំបន់ ដើម្បីបង្កើតតម្លៃសេដ្ឋកិច្ចជាតិជារួម។ ការធ្វើឱ្យប្រសើរឡើងនៅផ្លូវក្នុងស្រុក ដើម្បីធ្វើឱ្យប្រជាពលរដ្ឋរស់នៅតាមដងផ្លូវទាំងនោះឱ្យបានល្ហែល្ហើយទាំងនៅក្នុងការរស់នៅការដឹកជញ្ជូនកសិកផល និងការធ្វើដំណើរឆ្លងកាត់ជិតឆ្ងាយ។
បើតាមអ្នកនាំពាក្យខាងលើគម្រោងធ្វើឱ្យប្រសើឡើងវិញនូវផ្លូវជាតិលេខ២ នេះ គ្រោងចំណាយថវិកាប្រមាណ៥៦លានដុល្លារអាមេរិកពីរដ្ឋាភិបាលកូរ៉េ និងថវិកាមួយចំនួនផ្សេងទៀតពីរាជរដ្ឋាភិបាលកម្ពុជា។
គួររម្លឹកផងថា គម្រោងធ្វើឱ្យប្រសើរឡើងវិញ ផ្លូវជាតិលេខ២ នៅពេលប្រកាសនៅគ្រាដំបូងគេសង្កេតឃើញនៅតាមបណ្តោយផ្លូវជាតិនេះ មានអ្នកវិនិយោគបានបោះទុនជាបន្តបន្ទាប់តាមរយៈការចាក់ដីពុះដីឡូតិ៍លក់នៅក្នុងតំបន់ធ្វើឱ្យតម្លៃដីកន្លែងខ្លះឡើងថ្លៃគួរឱ្យកត់សម្គាល់។
លោក ង៉ែត ជូ អ្នកសេដ្ឋកិច្ច និងជាទីប្រឹក្សាក្រុមហ៊ុន EMC ធ្លាប់ប្រាប់ឱ្យដឹងថា «សម្រាប់ខ្ញុំ ចំពោះម្ចាស់ដីគាត់នៅរំពឹងថា ដីអាចនៅឡើងថ្លៃបាន តែរំពឹងឡើងច្រើនវាទៅអត់រួចដែរ ព្រោះតម្លៃនៅទីនោះគេតែងនិយាយថា ក្បាលដី១ម៉ែត្របណ្តោយប្រហែល៥០ម៉ែត្រថ្លៃជាង១ម៉ឺនដុល្លារ ហើយកន្លែងខ្លះទៀតអាចដល់ជាង២ម៉ឺនដុល្លារអាមេរិក អីចឹងខ្ញុំគិតថា វាហួសឆ្ងាយពីជីវភាពប្រជាពលរដ្ឋទូទៅ តែអ្នកមានទ្រព្យធុនមួយចំនួនគេទិញ ប៉ុន្តែប្រហែលមិនមានតម្រូវការច្រើននោះទេ»។
លោកលើកឡើងថា «ក្នុងរយៈពេលវែងវាអាចនៅមានចរន្តលក់ដូរច្រើនដែរ បើសេដ្ឋកិច្ចកាន់តែប្រសើរទៅមុខ ហើយចំនួនប្រជាជនពិសេសចំនួនប្រជាជនរស់នៅខេត្តតាកែវមានចំនួនច្រើន អីចឹងអាចមានច្រើនទៅមុខទៀត។ តែគ្រាន់ថា នៅក្នុងរយៈពេលមួយទៅពីរឆ្នាំបើតម្លៃដីឡើងប្រហែលពុំសូវមានអ្នកទិញដីនោះទេ»៕ (កែសម្រួលដោយ ៖ បុប្ផា)
ចែករំលែកព័តមាននេះ