រាជធានីភ្នំពេញ ៖ ផ្ទះមួយខ្នងធ្វើពីឈើលើនិងថ្មក្រោម បានត្រូវព្រះអគ្គីលេបត្របាក់ហ្មត់ ខណៈម្ចាស់ផ្ទះនាំគ្នាទៅហូបបាយនៅឯហាង។ អគ្គិភ័យនេះ កើតឡើងកាលពីវេលាម៉ោងប្រមាណ១០និង៣០នាទីយប់ថ្ងៃទី៤ ខែកុម្ភៈ នៅផ្ទះលេខ៤២៣ ផ្លូវលេខ២៤BT ភូមិត្នោតជ្រំ៦ សង្កាត់បឹងទំពុនទី២ ខណ្ឌមានជ័យ ។
ម្ចាស់ផ្ទះខាងលើឈ្មោះ សៀង សុខលាង ភេទប្រុស អាយុ៥៧ឆ្នាំ ជាមន្ត្រីចូលនិវត្តន៍ បានឱ្យដឹងថា ផ្ទះគាត់ដែលត្រូវភ្លើងឆេះអស់ទាំងស្រុងនេះ មានទំហំ៦ម៉ែត្រគុណ១១ម៉ែត្រ ជាប្រភេទផ្ទះឈើលើប្រក់ក្បឿង ខាងក្រោមថ្ម ហើយគាត់បានជួលទៅឱ្យស្ត្រីខ្មែរម្នាក់ស្នាក់នៅជាមួយសង្សារជាជនជាតិបរទេស ប្រកបរបរបើកហាងលក់បាយនៅផ្សារបឹងទំពុន ។
ចំណែកស្ត្រីខ្មែរជាអ្នកជួលឈ្មោះ ជា សុភាវី អាយុ៣៥ឆ្នាំ ដែលមានសង្សារជាជនជាតិស៊ុយអែតឈ្មោះ Robin Elcberg និយាយថា មុនពេលកើតហេតុគឺគាត់កំពុងរវល់លក់ដូរនៅឯផ្សាររហូតដល់ម៉ោងប្រមាណ៩និង៣០នាទីយប់ ក៏ទូរស័ព្ទហៅសង្សារជាជនបរទេសនោះទៅហូបបាយនៅហាងខាងក្រៅ ។ ប៉ុន្តែសង្សារគាត់ប្រាប់ថាអត់ស្រួលខ្លួនទេ ចង់សម្រាកនិងបានផ្តាំឱ្យខ្ចប់បាយយកមកឱ្យនៅផ្ទះផង តែគាត់មិនព្រមនិងបានបង្ខំឲ្យចេញទៅហូបបាយនៅខាងក្រៅទាំងអស់គ្នា និងបានបិទទ្វារផ្ទះចាក់សោ ។
ប្រភពដដែលបន្តថា បន្ទាប់ពីមកដល់ហាង បាយមួយសន្ទុះ ស្រាប់តែមានអ្នកភូមិនិងម្ចាស់ផ្ទះជួលទូរស័ព្ទមកប្រាប់ថា ផ្ទះដែលគាត់ស្នាក់នៅត្រូវភ្លើងឆាបឆេះ ។ ពេលនោះ គាត់ក៏ប្រញាប់ត្រឡប់មកវិញទាំងភ័យស្លន់ស្លោ តែនៅពេលមកដល់គឺភ្លើងបានឆេះផ្ទះអស់ទាំងស្រុងទៅហើយ រួមទាំងទ្រព្យសម្បត្តិមានតម្លៃមួយចំនួន នៅក្នុងនោះផង ។
ចំពោះមូលហេតុដែលនាំឲ្យកើតមានអគ្គិភ័យនេះ ម្ចាស់ផ្ទះបានដាក់ការសង្ស័យថាមកពីឆ្លងចរន្តអគ្គិសនី ។ ក្នុងហេតុការណ៍អគ្គិភ័យនេះមានរថយន្តពន្លត់អគ្គិភ័យចំនួន៩គ្រឿងទៅអន្ត រាគមន៍ ក្នុងនោះរថយន្តរបស់ការិយាល័យនគរបាលបង្ការនិងពន្លត់អគ្គិភ័យចំនួន៨គ្រឿង និងរបស់ក្រុមហុ៊នស្រាបៀរកម្ពុជា១គ្រឿង ។
ទោះជាយ៉ាងណា អគ្គិភ័យនេះមិនបានឆ្លងរាលដាលដល់ផ្ទះផ្សេងទៀតឡើយ ហើយចំពោះមូលហេតុពិតប្រាកដនោះសមត្ថកិច្ចកំពុងស្រាវជ្រាវបន្តទៀត ៕
ចែករំលែកព័តមាននេះ