រាជធានីភ្នំពេញ ៖ ធនាគារ អេស៊ីលីដា ភីអិលស៊ី បានប្រកាសថា រាល់អតិថិជនដែលបានភ្ជាប់សេវាអេស៊ីលីដាទាន់ចិត្ត នឹងត្រូវបានលើកលែងការបង់ថ្លៃសេវាប្រមូលសំរាម និងសំណល់រឹងក្នុងរាជធានីភ្នំពេញ ចាប់ពីខែកុម្ភៈនេះ រហូតដល់ខែមិថុនា ឆ្នាំ២០២០ ។
លោកស្រី សុខ សោភា នាយិកាប្រតិបត្តិទីផ្សារ ធនាគារ អេស៊ីលីដា បានឲ្យដឹងថ្ងៃនេះថា មានមធ្យោបាយជាច្រើនក្នុងការបង់ថ្លៃប្រមូលសំរាម និងសំណល់រឹង ក្នុងរាជធានីភ្នំពេញ ដូចជា៖ បង់ប្រាក់តាមអេស៊ីលីដាទាន់ចិត្ត បង់ប្រាក់តាមអេធីអឹមអេស៊ីលីដា បង់ប្រាក់តាមអេស៊ីលីដាអ៊ីនធើណេត បង់ប្រាក់តាម App របស់ដៃគូ និងបង់ប្រាក់តាមភ្នាក់ងាររបស់ដៃគូជាច្រើនទៀត…ដែលនឹងដាក់ឲ្យប្រើប្រាស់ជាបន្តបន្ទាប់ ។
ក្រៅពីបង់តាមសេវាអេស៊ីលីដាទាន់ចិត្ត អតិថិជនអាចបង់ថ្លៃប្រមូលសំរាម និងសំណល់រឹង ក្នុងរាជធានីភ្នំពេញ តាមរយៈបញ្ជរធនាគារ អេស៊ីលីដា នៅសាខាណាមួយ ដោយគ្រាន់តែភ្ជាប់មកជាមួយវិក្កយបត្រអគ្គិសនី ប៉ុន្តែអតិថិជនត្រូវបង់ថ្លៃសេវាចំនួន៨០០រៀលក្នុងមួយដង ។ ចំពោះអតិថិជនដែលមានភ្ជាប់សេវាអេស៊ីលីដាទាន់ចិត្ត ហើយបង់តាមរយៈសេវានេះផ្ទាល់ខ្លួននឹងត្រូវបានលើកលែងបង់ថ្លៃសេវាចាប់ពីខែកុម្ភៈនេះ រហូតដល់ខែមិថុនា ឆ្នាំ២០២០ ប៉ុន្តែផុតពីនេះនឹងត្រូវបង់ថ្លែសេវាជាធម្មតាទៅតាមតម្លៃកំណត់ គឺ៥០០រៀលក្នុងមួយដង។
ដើម្បីអាចបង់ថ្លៃសំរាម និងសំណង់រឹង នៅរាជធានីភ្នំពេញ តាមអេស៊ីលីដាទាន់ចិត្តបានអតិថិជនត្រូវធ្វើបច្ចុប្បន្នកម្ម (Update) កម្មវិធីអេស៊ីលីដាទាន់ចិត្ត នៅក្នុង App Store/Play Store ។
ធនាគារ អេស៊ីលីដា បានបង្ហាញពីរបៀបបង់ថ្លៃសំរាម និងសំណល់រឹង ក្នុងរាជធានីភ្នំពេញ តាមរយៈ អេស៊ីលីដាទាន់ចិត្ត ដូចខាងក្រោម៖
១. ចូលប្រើសេវា (Login)
២. ជ្រើសរើសម៉ឺនុយ «ទូទាត់វិក្កយបត្រ»
៣. ជ្រើសរើស «រដ្ឋាករស្វ័យតគ្រប់គ្រងសំរាម និងសំណល់រឹង»
៤. ជ្រើសរើសគណនីផ្ទេរចេញ
៥. បញ្ចូលលេខសំគាល់អតិថិជន (ID) ដែលមាននៅក្នុងវិក្កយបត្រអគ្គិសនីរបស់លោកអ្នក
៦. ជ្រើសរើសប៊ូតុង «យល់ព្រម»
៧. ផ្ទៀងផ្ទាត់ប្រតិបត្តិការ (លេខគណនី លេខសំគាល់អតិថិជន ចំនួនទឹកប្រាក់ត្រូវទូទាត់ ។ល។) និង
៨. ជ្រើសរើសប៊ូតុង «ទូទាត់»
ថ្លែងក្នុងសន្និសីទសារព័ត៌មាននៅសាលារាជធានីភ្នំពេញ កាលពីព្រឹកថ្ងៃទី០១ ខែកុម្ភៈ ឆ្នាំ២០២០ លោក កើត ឆែ អភិបាលរងរាជធានីភ្នំពេញ បានថ្លែងថា ប្រជាពលរដ្ឋអាចបង់ថ្លៃសេវាសំរាមសម្រាប់ខែមករា តាមរយៈធនាគារ អេស៊ីលីដា ធនាគារឯកទេសវីង អ៊ីម៉ានី លីហួរវេលុយ ផាយផេ ទ្រូម៉ានី អេអឹមខេ ដោយក្នុងមួយប្រតិបត្តិការចំណាយថ្លៃសេវាចាប់ពី៥០០រៀលទៅ៨០០រៀលតែប៉ុណ្ណោះ ទៅតាមទំហំទឹកប្រាក់នៃការបង់ ប៉ុន្តែប្រជាពលរដ្ឋក៏អាចបង់ជាឆ្នាំក៏បាន ដោយមាន ភាពចំណេញច្រើនគឺអស់ថ្លៃសេវាតែម្តងប៉ុណ្ណោះ។ (កែសម្រួលដោយ ៖ បុប្ផា)
ចែករំលែកព័តមាននេះ