ខេត្តស្ទឹងត្រែង ៖ សេចក្តីរាយការណ៍ឱ្យដឹងថា មានអគ្គិភ័យមួយឆេះនៅខាងក្រោយមន្ទីរកសិកម្ម រុក្ខាប្រមាញ់ និងនេសាទខេត្ត ហើយភ្លាមៗកម្លាំងរថយន្តពន្លត់អគ្គិភ័យនៃស្នងការដ្ឋាននគរបាលខេត្ត បានមកអន្តរាគមន៍បាញ់ពន្លត់ទាន់ពេល វេលាម៉ោងជិត១១ព្រឹកថ្ងៃទី៦ កុម្ភៈ…
ខេត្តស្ទឹងត្រែង ៖ សេចក្តីរាយការណ៍ឱ្យដឹងថា មានអគ្គិភ័យមួយឆេះនៅខាងក្រោយមន្ទីរកសិកម្ម រុក្ខាប្រមាញ់ និងនេសាទខេត្ត ហើយភ្លាមៗកម្លាំងរថយន្តពន្លត់អគ្គិភ័យនៃស្នងការដ្ឋាននគរបាលខេត្ត បានមកអន្តរាគមន៍បាញ់ពន្លត់ទាន់ពេល វេលាម៉ោងជិត១១ព្រឹកថ្ងៃទី៦ កុម្ភៈ នេះ ស្ថិតនៅភូមិស្រែពោធិ៍ សង្កាត់ស្រះប្ញស្សី ក្រុងស្ទឹងត្រែង ។
បើតាមលោកស្នងការនគរបាលខេត្តបានឱ្យដឹងថា ភ្លើងឆេះនៅខាងក្រោយអគារមន្ទីរកសិកម្មខាងលើ ហើយត្រូវបានខាងកម្លាំងស្នងការដ្ឋានចេញទៅបាញ់ទឹកពន្លត់ទាន់ និងគ្រប់គ្រងស្ថានការណ៍បានទាំង
ស្រុង។ លោកថា ទាក់ទិនករណីអគ្គិភ័យនេះដែរ កំពុងសង្ស័យមានពីរ ទី១-គឺមានមនុស្សចូលមកលួចដុត និងទី២-អាចមកពីកម្ទេចភ្លើងសេសសល់ពីដុតសំរាមរាលមក ។ ប៉ុន្តែបើតាមសាក្សីម្នាក់បានប្រាប់មន្ត្រីនៃមន្ទីរកសិកម្មនិងសមត្ថកិច្ចថា មុនពេលមានភ្លើងឆេះ បានឃើញក្មេងវ័យជំទង់២នាក់ដើរចូលមកលេង
ក្បែរនោះ ក្រោយមកស្រាប់តែមានភ្លើងឆេះហើយបាត់ពួកគេអស់ទៅ ។
ប្រភពបន្តថា ភ្លើងឆេះចេញពីទូកស្មាច់ដែលរក្សាទុកនៅក្រោយអគារ រហូតរាលបន្តទៅដល់សំណល់គំនរឈើដែលសេសសល់ពីធ្វើអាគារថ្មី ទើបមានការភ្ញាក់ផ្អើលឆោឡោតែម្តង ។ ការខាតបង់គឺទូកស្មាច់ថ្មីចំនួន៤គ្រឿង ដែលមានតម្លៃប្រហែលជិត៣ពាន់ដុល្លារ ជាជំនួយរបស់អង្គការដៃប្រគល់មកខណ្ឌរដ្ឋបាលជលផល សម្រាប់ចែកជូនសហគមន៍នេសាទ ដើម្បីចុះល្បាតការពារធនធានជលផល ក្រៅពីនោះមិនមានខាតបង់ធ្ងន់ធ្ងរទេ ។ បច្ចុប្បន្ន សមត្ថកិច្ចកំពុងធ្វើការស្រាវជ្រាវរកមូលហេតុបន្ត ។
ចែករំលែកព័តមាននេះ