កាណាដា៖ តាមប្រភពព័ត៌មាន Metro បានឱ្យដឹងថា ក្មេងស្ទាវដែលជាតន្ត្រីករបានស្រែកប្រកាសនៅក្នុងយន្តហោះដែលដឹកមនុស្ស២៤៣នាក់ថា ខ្លួនមកពីខេត្ត Hunan ហើយមានអារម្មណ៍មិនសូវស្រួលខ្លួនទេ ។ ការស្រែកលេងនេះ ធ្វើឱ្យយន្តហោះបង្ខំចិត្តចុះចតភ្លាមៗ។
ជើងហោះហើរមកពី Toronto ទៅកាន់ Jamaica ត្រូវបង្ខំចិត្តចុះចតក្រោយពេល James Potok អាយុ២៨ឆ្នាំស្រែកថា៖«សុំចិត្តស្តាប់បន្តិច! ខ្ញុំទើបតែមកពីខេត្ត Hunan ដែលជាកន្លែងផ្ទុះជំងឺកូរ៉ូណាថ្មី។ ខ្ញុំមានអារម្មណ៍មិនស្រួលខ្លួនទេ ។ សូមអរគុណ» ។
ក្រោយមក គេក៏ស្រែកថា «នេះគ្រាន់តែជាការនិយាយលេង សម្រាប់បង្ហោះនៅក្នុង Instagram ប៉ុណ្ណោះ ។ តែខាងភ្នាក់ងារលើយន្តហោះ បានបង្ខំ Potok ឱ្យពាក់ស្រោមដៃ និង ពាក់ម៉ាស់ជិតមុខ។ ក្រោយពីយន្តហោះត្រឡប់មកកន្លែងដើមចុះចត ប៉ូលិសបានចាប់ខ្លួនបុរសបំពុលសង្គមម្នាក់នេះ។
Potok បានធ្វើការសុំទោសដោយនិយាយថា៖«ខ្ញុំពិតជាសោកស្តាយមែនទែនចំ ពោះអំពើឆោតល្ងង់របស់ខ្ញុំ។ ខ្ញុំមិនយល់ពីបញ្ហានេះច្បាស់។ ខ្ញុំគិតថាវាអាចជួយឱ្យខ្ញុំល្បី។ ខ្ញុំមិនបានដឹងថា វាជាអំពើខុសច្បាប់សោះ» ។ ក្រោយពីបានធ្វើតេស្ត រកវីរុសរួចហើយ Potok មិនឃើញកើតមានជំងឺកូរ៉ូណាថ្មីឡើយ ។ គេត្រូវបានណាត់ឱ្យឡើងតុលាការ Ontario នៅថ្ងៃចន្ទ ទី៩ មីនា នាពេលខាងមុខនេះ ។
ចែករំលែកព័តមាននេះ