ព្រះពុទ្ធសាសនាជាសាសនាសន្តិភាព សាសនាស្វែងរកសេចក្តីសុខជូនសង្គមមនុស្ស ដូច្នេះការអភិរក្សក៏ដូចជាការលើកតម្លៃព្រះពុទ្ធសាសនាជាកិច្ចសំខាន់សម្រាប់មហាជនគ្រប់រូប ចំណែកព្រះសង្ឃក្នុងពុទ្ធសាសនាក៏គប្បីលើកតម្កើងដោយការគោរពប្រតិបត្តិតាមកិច្ចផ្សេងៗដោយត្រូវរៀបចំអាសនៈប្រគេនព្រះសង្ឃក្នុងពិធីសាសនានានាឱ្យបានសមរម្យគឺត្រូវតែខ្ពស់ជាងគ្រហស្ថជាដរាប ដើម្បីសេចក្ដីថ្លៃថ្នូរ និងកិត្យានុភាពព្រះពុទ្ធសាសនា ស្របតាមបាវចនា ជាតិ សាសនា ព្រះមហាក្សត្រ និងស្របតាមរដ្ឋធម្មនុញ្ញនៃប្រទេសកម្ពុជា ។
ដើម្បីលើកតម្កើងការគោរពប្រតិបត្តិចំពោះព្រះសង្ឃក្នុងព្រះពុទ្ធសាសនាឱ្យកាន់តែខ្ពស់ បរិស័ទគប្បីអនុវត្តគោលការណ៍សំខាន់៤ចំណុចដូចតទៅ ៖
១- ឧបាសក ឧបាសិកា ឬគ្រហស្ថ គប្បីរៀបចំអាសនៈព្រះសង្ឃឲ្យបានសមគួរ សូម្បីអាសនៈនោះក្រាលដោ យកន្ទេល ភួយ ព្រំចៀម ក្រមា គឺត្រូវតែខ្ពស់ជាងគ្រហស្ថជាដរាប ក្នុងពិធីផ្លូវការរបស់រដ្ឋ ឬក្នុងពិធីសាសនា មានបុណ្យទានធំៗ អាសនៈគង់របស់ព្រះសង្ឃ ត្រូវរៀបចំឲ្យបានខ្ពស់ជាងកន្លែងអង្គុយរបស់គ្រហស្ថ និងភ្ញៀវទាំងអស់ជាដរាប បើទោះជាកម្ពស់នោះស្ថិតក្នុងកម្រិតណាក៏ដោយចុះ ។
២- នៅក្នុងកម្មវិធីរាប់បាត្រ ឬពិធីប្រគេនទេយ្យទានផ្សេងៗចំពោះព្រះសង្ឃ ឧបាសក ឧបាសិកា ឬគ្រហស្ថគប្បីដោះទ្រនាប់ជើងជាដរាប ដើម្បីសម្ដែងការគោរពចំពោះព្រះសង្ឃដែលជាឧត្ដមភេទ ។
៣-គ្រប់ពិធីទាំងអស់ដែលមានព្រះសង្ឃចូលរួម ពេលដែលគ្រហស្ថគោរពសំពះដល់ព្រះសង្ឃ ព្រះសង្ឃគ្រប់អង្គមិនត្រូវលើកព្រះហស្តសំពះតបទៅគ្រហស្ថវិញទេ ដោយគ្រាន់តែសម្ដែងអាការៈគោរពសង្រួមឥន្ទ្រិយសំវរៈ បន្ទន់ព្រះកាយបន្តិច ជាការសមគួរដើម្បីឲ្យស្របទៅនឹងប្រពៃណីទំនៀមទម្លាប់ព្រះពុទ្ធសាសនា និងព្រះវិន័យបញ្ញត្តិ ។
៤- ដោយសារតែព្រះសង្ឃជាភេទបព្វជិតសាវករបស់ព្រះពុទ្ធមិនសមនឹងគង់លើអាសនៈដែលទាបជាងគ្រហស្ថ ឬសំពះដល់គ្រហស្ថឡើយ ។ តាមពិតទៅការគង់អាសនៈទាបជាង ឬខ្ពស់ជាង បើតាមសាសនាព្រះពុទ្ធមិនមានទោសដល់ព្រះសង្ឃនោះទេ ប៉ុន្តែវាអាចមានបាបខ្លះចំពោះគ្រហស្ថ ដោយសារព្រះសង្ឃអ្នកមានសីល ជាឧត្ដមភេទ ហើយគ្រហស្ថទោះជាមានសីល ការអង្គុយស្មើ ឬខ្ពស់ជាងព្រះសង្ឃនោះជាសេចក្ដីប្រមាថចំពោះសង្ឃ ត្រង់នេះហើយដែលលោកហៅថាបាបនោះ ប៉ុន្តែមិនធ្ងន់ពេកទេ ។
មានការកត់សម្គាល់ថា កន្លងមកមហាជនធ្លាប់បានរិះគន់សម្តេចព្រះសង្ឃរាជផងដែរដោយសារតែព្រះអង្គបានលើកព្រះហស្តសំពះគ្រហស្ថ ជាពិសេសព្រះអង្គបានសំពះមន្ត្រីថ្នាក់ធំៗ ដែលចូលថ្វាយបង្គំព្រះអង្គ ដែលចរិយាបែបនេះមិនត្រូវតាមពុទ្ធវិន័យឡើយ ៕ សាន សារិន
ចែករំលែកព័តមាននេះ