រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអញ្ជើញទៅដល់ទីក្រុងប៉េកាង ប្រទេសចិនហើយ ។ យោងតាមបណ្តាញសង្គមរបស់សម្តេចចេញផ្សាយមុននេះបានឲ្យដឹងយ៉ាងដូច្នេះថា« នៅពេលនេះ សម្តេចតេជោ ហ៊ុន សែន បានអញ្ជើញមកដល់ទីក្រុងប៉េកាំងនៃប្រទេសចិនប្រកបដោយសុវត្ថិភាពហើយ ។
អញ្ជើញមកទទួលសម្តេតេជោនៅព្រលានយន្តហោះអន្តរជាតិប៉េកាំង គឺមាន លោក វ៉ាង យី រដ្ឋមន្ត្រីក្រសួងការបរទេសចិន និងមន្ត្រីជាន់ខ្ពស់ចិនជាច្រើនរូប ព្រមទាំងមន្ត្រីការទូតកម្ពុជាប្រចាំប្រទេសចិនផងដែរ ។ ប្រភពបន្តថា នៅល្ងាចនេះ សម្តេចតេជោនាយករដ្ឋមន្ត្រីនឹងអញ្ជើញជួបជាមួយ លោកនាយករដ្ឋមន្ត្រី និងប្រធានាធិបតីចិន ។
សូមជម្រាបថា សម្តេចតេជោហ៊ុន សែន បានក្លាយជាមេដឹកនាំដំបូងគេធ្វើដំណើរទៅកាន់ប្រទេសចិន បន្ទាប់ពីមានការផ្ទុះឡើងនៃកូរ៉ូណាវីរុស ។ មេដឹកនាំចិន និងកម្ពុជានឹងពិភាក្សាគ្នាទៅលើបញ្ហាដែលជា កង្វល់របស់មនុស្សទូទាំងពិភពលោក ។
បើតាមក្រសួងការបរទេស និងកិច្ចសហប្រតិបត្តិការអន្តរជាតិបាននិយាយនៅក្នុងសេចក្តីប្រកាសព័ត៌មាននៅថ្ងៃពុធនេះថា សម្តេចតេជោ ហ៊ុន សែន ចាកចេញពីកូរ៉េខាងត្បូងទៅកាន់ទីក្រុងប៉េកាំងដោយផ្ទាល់ នៅថ្ងៃទី០៥ ខែកុម្ភៈ ដោយតបតាមការអញ្ជើញរបស់នាយករដ្ឋមន្ត្រីចិន លោក លី ខឹឈាង ។ នៅក្នុងទីក្រុងប៉េកាំងសម្តេចតេជោ និងលោកនាយករដ្ឋមន្ត្រីចិន ពិភាក្សាគ្នាអំពីកិច្ចសហប្រតិបត្តិការទ្វេភាគី និងផ្លាស់ប្តូរទស្សនៈគ្នា លើការរីករាលដាលនៃជំងឺឆ្លងផ្លូវដង្ហើមកូរ៉ូណា ដែលកំពុងតែកើតមានឡើង និងបញ្ហាមួយចំនួនដែលជាផលប្រយោជន៍រួម ។
បន្ទាប់ពីជួបជាមួយនាយករដ្ឋមន្ត្រីចិនហើយ សម្តេចគ្រោងនឹងចូលជួបសម្តែងការគួរសមជាមួយ ប្រធានាធិបតីចិន លោក ស៊ី ជិនពីងផងដែរ ។ សម្តេចនឹងវិលត្រឡប់មកកម្ពុជាវិញនៅយប់ថ្ងៃទី០៥ កុម្ភៈ ដដែលនេះ ៕
ចែករំលែកព័តមាននេះ