រាជធានីភ្នំពេញ ៖ ព្រឹត្តិការណ៍ប្រកួតបាល់ទាត់ពានរង្វាន់កុមារតូយ៉ូតាសម្រាប់ថ្ងៃអនាគតប្រចាំឆ្នាំ២០១៩-២០២០នឹងឈានចូលដល់វគ្គផ្ដាច់ព្រ័ត្រហើយនៅថ្ងៃទី៩ កុម្ភះ។ នេះបើយោងតាមសន្និសីទសារព័ត៌មានមួយដែលបានធ្វើឡើងនៅក្រុមហ៊ុនតូយ៉ូតា កាលពីព្រឹកថ្ងៃទី៥ កុម្ភៈ។
តាមការឱ្យដឹងបន្ថែមនេះគឺជាលើកទី៥ហើយដែលតូយ៉ូតាបានបង្កើតឱ្យមានការប្រកួត បាល់ទាត់ពានរង្វាន់កុមារអាយុក្រោម១២ឆ្នាំ ដែលរហូតមកទល់ពេលនេះទទួលបានការគាំទ្រយ៉ាងពេញទំហឹងពីសំណាក់ប្អូនៗដែលស្រឡាញ់ចូលចិត្តវិស័យកីឡាបាល់ទាត់។
អ្នករៀបចំការប្រកួតបានឱ្យដឹងថា គោលបំណងសំខាន់នៃការរៀបចំព្រឹត្តិការណ៍នេះគឺដើម្បីបំផុសដល់យុវជនឱ្យបានដឹងពីការលេងកីឡានាំមកនូវសុខភាព និងសាមគ្គីភាព ទាំងនៅក្នុងក្រុមក៏ដូចជានៅក្នុងសហគមន៍ ។ រួមចំណែកលើកទឹកចិត្តដូចជាផ្ដល់នូវការបង្ហាត់បង្ហាញបន្ថែមទៀតដល់ប្អូនៗយុវជនក្នុងការដុសខាត់ពួកគេឱ្យមានសមត្ថភាពនិងភាពក្លាហាន ដើម្បីក្លាយខ្លួនទៅជាកីឡាករបាល់ទាត់ឆ្នើមប្រចាំប្រទេសនាថ្ងៃអនាគត ។
ជាក់ស្ដែង ការប្រកួតឆ្នាំនេះមានការចូលរួមរហូតដល់ទៅ២៤ក្រុម ក្នុងនោះក្រុមកុមារាមាន១៦ក្រុម និងក្រុមកុមារីមាន៨ក្រុមមកពីសាលារដ្ឋចំនួន១៣ សាលាឯកជនចំនួន៨ និងស្ថាប័នអង្គការចំនួន៣។
គួររំលឹកផងដែរថា ព្រឹត្តិការណ៍នៃការប្រកួតបាល់ទាត់នេះធ្វើឡើងតាំងពីថ្ងៃទី១៦ធ្នូ ឆ្នាំ២០១៩ រហូតដល់ថ្ងៃទី៨ មករា ឆ្នាំ២០២០សម្រាប់វគ្គជម្រុះ ហើយវគ្គពាក់កណ្ដាលផ្ដាច់ព្រ័ត្រធ្វើឡើងនៅថ្ងៃទី១៨-១៩ មករា។ដោយឡែក ការប្រកួតវគ្គផ្ដាច់ព្រ័ត្រនឹងត្រូវរៀបចំធ្វើនៅថ្ងៃអាទិត្យទី៩ កុម្ភះ ខាងមុខ នៅលើទីលានពហុកីឡដ្ឋានជាតិអូឡាំពិក ៕ (កែសម្រួលដោយ ៖ បុប្ផា)
ចែករំលែកព័តមាននេះ