ខេត្តកណ្ដាល ៖ សេចក្តីរាយការណ៍បឋមបានឲ្យដឹងថា ជនកំហូចម្នាក់បានខ្ចីម៉ូតូ១គ្រឿង ពីបុរសម្នាក់ទៀតដែលទើបស្គាល់ និងធ្វើការជាមួយគ្នាបានរយៈពេល២ថ្ងៃប៉ុណ្ណោះ ដោយប្រាប់ថា ខ្ចីជិះទៅយកប្រពន្ធ១ថ្ងៃត្រឡប់មកវិញហើយ ។ ប៉ុន្តែក្រោយពីបានម៉ូតូដល់ដៃបានជិះសំដៅទៅកាន់កុងស៊ីបញ្ចាំមួយរួចបានដាក់បញ្ចាំម៉ូតូនេះក្នុងតម្លៃ៣៥០ដុល្លារ រួចបានយកលុយទៅលេងល្បែងភ្នាល់តាមកញ្ចក់ទូរទស្សន៍ចាញ់អស់បោសគូទខោ ។ ការចាប់ខ្លួនបានធ្វើឡើង កាលពីវេលាម៉ោង៤ល្ងាច ថ្ងៃទី០៤ ខែកុម្ភៈ ឆ្នាំ២០២០ នៅម្តុំវត្តសំបួរមាស ស្ថិតនៅក្នុងភូមិសំបួរ រាជធានីភ្នំពេញ ។
ជនសង្ស័យខាងលើឈ្មោះ ឆេង សំអាត អាយុ៣៩ឆ្នាំ ជនជាតិខ្មែរ មុខរបរបើកបររថយន្តមានទីលំនៅក្នុងភូមិថ្មី ឃុំសោម ស្រុកគីរីវង់ ខេត្តតាកែវ ។ ចំណែកម៉ូតូដែលត្រូវជននេះបោកយកនោះម៉ាកហុងដាឌ្រីម សេ១២៥ស៊េរី ឆ្នាំ២០០៨ ឡើងតែមស៊េរីឆ្នាំ២០១០ ពណ៌ខ្មៅ ពាក់ស្លាកលេខ ភ្នំពេញ 1AJ-7134 លេខតួ និងលេខម៉ាស៊ីន៨១៣៤០៥៣ ។ ដែលជាកម្មសិទ្ធិរបស់បុរសម្នាក់ឈ្មោះ នួន ចាន់សុខ អាយុ២៦ឆ្នាំ ជនជាតិខ្មែរ មុខរបរជាងឈើ ស្នាក់នៅក្នុងភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល ។
តាមប្រភពព័ត៌មានបានឲ្យដឹងថា ជនសង្ស័យ និងម្ចាស់ម៉ូតូទើបតែស្គាល់ និងធ្វើការជាមួយគ្នាបានរយៈពេល២ថ្ងៃប៉ុណ្ណោះ ហើយហេតុការណ៍ឆបោកយកម៉ូតូនេះបានកើតឡើងកាលពី១៥ថ្ងៃមុន គឺនៅថ្ងៃទី២១ ខែមករា ឆ្នាំ២០២០ វេលាម៉ោង១៨និង៣០នាទីល្ងាច នៅក្នុងភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ។ ដោយនៅខណៈនោះជនសង្ស័យបានខ្ចីម៉ូតូជនរងគ្រោះដោយប្រាប់ថា ខ្ចីជិះទៅយកប្រពន្ធ១ថ្ងៃប៉ុណ្ណោះ ពេលនោះដោយសារតែជាអ្នកធ្វើការជាមួយគ្នាទើបយល់ព្រមឲ្យខ្ចីលុះពេលបានម៉ូតូដល់ដៃហើយ ជនសង្ស័យបានជិះយកទៅដាក់បញ្ចាំនៅម្ដុំខាងកើតវត្តសំបួរមាស ភូមិសំបួរ ក្នុងតម្លៃ៣៥០ដុល្លារ ។
បន្ទាប់មកបានយកលុយទាំងនេះទៅលេងល្បែងភ្នាល់មាន់ជល់ និងបាល់តាមកញ្ចក់ទូរទស្សន៍ហើយបានចាញ់អស់គូទខោ រួចក៏បន្តគេចខ្លួនមិនជួបម្ចាស់ម៉ូតូឡើយ និងបានអង្វរឲ្យមិត្តភក្ដិម្នាក់ទៀតជួយលស់យកម៉ូតូមកទុកនៅក្នុងបន្ទប់ជួលមួយកន្លែង ។
ប្រភពដដែលបានបន្តទៀតថា ក្រោយពីដឹងថា ចាញ់បោកជនសង្ស័យបុរសជាម្ចាស់ម៉ូតូបានដើររកគ្រប់កន្លែង ប៉ុន្តែមិនបានឃើញនោះឡើយ ទើបនៅថ្ងៃទី៣០ ខែមករា ឆ្នាំ២០២០ ទៅដាក់ពាក្យបណ្តឹងនៅប៉ុស្តិ៍នគរបាលក្រាំងម្កាក់ ឲ្យជួយអន្តរាគមន៍រួចបានបន្តដើររកជននោះទៀត ។ លុះរហូតដល់វេលាម៉ោង៤ល្ងាចថ្ងៃទី៤ ខែកុម្ភៈ ឆ្នាំ២០២០ ទើបប្រទះឃើញជនសង្ស័យនៅម្តុំវត្តសំបួរមាស រាជធានីភ្នំពេញ ក៏បានធ្វើការឃាត់ខ្លួននាំយកទៅប្រគល់ជូននគរបាលព្រហ្មទណ្ឌស្រុកអង្គស្នួលសួរនាំ ។
ខណៈនោះជនសង្ស័យបានប្រាប់ថា ខ្លួនពិតជាបានធ្វើសកម្មភាពឆបោកយកម៉ូតូ១គ្រឿងនោះទៅបញ្ចាំមែន ហើយបានយកលុយលែងល្បែងចាញ់អស់ហើយ ប៉ុន្តែម៉ូតូនោះត្រូវបានមិត្តភក្ដិម្នាក់ទៀតជួយលស់យកទុកនៅក្នុងបន្ទប់ជួលមួយ ស្ថិតនៅក្នុងសង្កាត់ដង្កោ ។ ក្រោយពីទទួលបានចម្លើយសារភាពនេះហើយ ទើបនៅវេលាព្រឹកថ្ងៃទី០៥ ខែកុម្ភៈនេះ នគរបាលព្រហ្មទណ្ឌស្រុកអង្គស្នួលចុះទៅសហការណ៍ជាមួយនគរបាលប៉ុស្តិ៍ដង្កោចុះទៅកាន់ផ្ទះជួលខាងលើដកហូតយកម៉ូតូនោះប្រគល់ជូនម្ចាស់វិញហើយ ៕
ចែករំលែកព័តមាននេះ