រាជធានីភ្នំពេញ ៖ ដងសន្ទូចសម្រាប់យោងសំណង់ធុនធ្ងន់មួយដើមបានបាក់រាបមកលើផ្លូវសង្កត់លើរថយន្តមួយគ្រឿងរបស់ស្ថានទូតអាមេរិក បណ្តាលឱ្យស្ត្រីជនជាតិអាមេរិកម្នាក់រងរបួស ។ ក្នុងឧបទ្ទវហេតុនេះសមត្ថកិច្ចបានឃាត់ខ្លួនជនជាតិចិន និងខ្មែរចំនួន៣នាក់ ក្នុងនោះមេការជនជាតិចិនចំនួន២នាក់ និងបុរសជនជាតិខ្មែរម្នាក់ជាអ្នកបញ្ជាអាហ្គ្រែន(ស្ទូច) នៅក្នុងការដ្ឋានសំណង់មួយកន្លែងរបស់ក្រុមហ៊ុន…
រាជធានីភ្នំពេញ ៖ ដងសន្ទូចសម្រាប់យោងសំណង់ធុនធ្ងន់មួយដើមបានបាក់រាបមកលើផ្លូវសង្កត់លើរថយន្តមួយគ្រឿងរបស់ស្ថានទូតអាមេរិក បណ្តាលឱ្យស្ត្រីជនជាតិអាមេរិកម្នាក់រងរបួស ។ ក្នុងឧបទ្ទវហេតុនេះសមត្ថកិច្ចបានឃាត់ខ្លួនជនជាតិចិន និងខ្មែរចំនួន៣នាក់ ក្នុងនោះមេការជនជាតិចិនចំនួន២នាក់ និងបុរសជនជាតិខ្មែរម្នាក់ជាអ្នកបញ្ជាអាហ្គ្រែន(ស្ទូច) នៅក្នុងការដ្ឋានសំណង់មួយកន្លែងរបស់ក្រុមហ៊ុន ហ៊ុយប៉ាង ដែលបានបាក់ដងសបន្ទូចមកលើរថយន្តរបស់ស្ថានទូតអាមេរិក បណ្តាលឱ្យរងការខូចខាត និងរបួសស្ត្រីជាមន្ត្រីរបស់ស្ថានទូត ។
ក្រោយហេតុការណ៍នេះ ការដ្ឋានសំណង់ក៏ត្រូវបានបិទផងដែរ ។ ករណីនេះបានកើត ឡើងកាលពីវេលាម៉ោង៨ព្រឹកថ្ងៃទី៤ កុម្ភៈ ឆ្នាំ២០២០ នៅចំណុចការដ្ឋានសំណង់ក្នុងសង្កាត់ ទន្លេបាសាក់ ខណ្ឌចំការមន ។
តាមប្រភពព័ត៌មានពីមន្ត្រីនគរបាលបានប្រាប់ឱ្យដឹងថា បុរសទាំង៣នាក់ដែលបានចាប់ឃាត់ខ្លួនមាន
ទី១-ឈ្មោះ FAN YUA HANG ជនជាតិចិន អាយុ៤០ឆ្នាំ មានមុខរបរជាអ្នកគ្រប់គ្រងការដ្ឋានសំណង់ ។ទី២-ឈ្មោះ ZHANG JIN ZHU ជនជាតិចិន អាយុ៥០ឆ្នាំ ជាប្រធានផ្នែកបុកគ្រឹះ ទាំងពីរនាក់ស្នាក់នៅដីឡូត៍គ្មានលេខ ផ្លូវលេខ៧៨ ក្រុមទី៧៨ ភូមិ១៤ ក្នុងសង្កាត់ទន្លេបាសាក់ ខណ្ឌចំការមនជាមួយគ្នា ។
ទី៣-ឈ្មោះ ញិន សុខា អាយុ២២ឆ្នាំ ជាអ្នកបញ្ជាអាហ្គ្រែនស្ទូចឡើងចុះ ។
ចំណែកឯជនរងគ្រោះនគរបាលប្រាប់ថាឈ្មោះ JESSICA MOONING អាយុ៣៧ឆ្នាំ ជាមន្ត្រីស្ថានទូតអាមេរិក ស្នាក់នៅផ្ទះលេខ២៦១AB ផ្លូវលេខ៦៣ ក្នុងសង្កាត់ទន្លេបាសាក់ ខណ្ឌចំការមន ។ មុនពេលកើតហេតុ ការដ្ឋានសំណង់ហ៊ុយប៉ាង បាននឹងកំពុងតែដំណើរការបុកគ្រឹះនៅខាងក្នុងការដ្ឋានរបស់ខ្លួនជាធម្មតា ដោយមានគ្រឿងចក្រជាច្រើនគ្រឿង និងអាហ្គ្រែនមួយគ្រឿងកំពុងតែស្ទូចដែកពុម្ពសសរគ្រឹះខាងក្នុងផងដែរ ។
តាមប្រភពដដែលបានប្រាប់បន្តទៀតថា ខណៈដែលមានគ្រឿងចក្រជាច្រើនគ្រឿង និង អាហ្គ្រែនមួយគ្រឿងកំពុងតែស្ទូចដែកពុម្ពសសរគ្រឹះនៅខាងក្នុងការដ្ឋាននោះ ក៏ស្រាប់តែបាក់ដងសន្ទូចមកលើផ្លូវសង្កត់លើរថយន្តព៌ណស ពាក់ស្លាកលេខ CD25-130 មួយគ្រឿង ដែលកំពុងតែបើកបរលើផ្លូវ បណ្តាលឱ្យក្រពឹតដំបូល និងបែកកញ្ចក់ និងបណ្តាលឱ្យស្ត្រីជាមន្ត្រីស្ថានទូតម្នាក់រងរបួសត្រង់ដៃ និងផ្ទៃមុខ ។
ពាក់ព័ន្ធទៅនឹងករណីបាក់ដងសន្ទូចក្នុងការដ្ឋានសំណង់ហួយ ប៉ាងខាងលើនេះ ត្រូវបានវាយតម្លៃថា គឺកើតឡើងដោយសារតែខ្វះការប្រុងប្រយ័ត្នទើបបាក់ឬស្ទូចធ្ងន់ពេកលើសកម្រិតកំណត់ ។ ក្រោយពេលកើតហេតុ ស្ត្រីជាមន្ត្រីរបស់ស្ថានទូតសហរដ្ឋអាមេរិករងគ្រោះត្រូវបានបញ្ជូនភ្លាមៗទៅធ្វើការព្យាបាល ។ ចំណែកឯបុរសជាមេការជនជាតិចិន និងបុរសជនជាតិខ្មែរជាអ្នកបញ្ជាអាហ្គ្រែនស្ទូចទាំង៣នាក់ (ជនជាតិចិន២នាក់ និងជនជាតិខ្មែរម្នាក់) ក៏ត្រូវបានកម្លាំងមានសម្ថកិច្ច ឃាត់ខ្លួនភ្លាមៗបញ្ជូនយកទៅកាន់ស្នងការដ្ឋាននគរបាលរាជធានីភ្នំពេញ ដើម្បីចាត់ការទៅតាមផ្លូវច្បាប់ និងការដ្ឋានត្រូវបានបិទមិនឱ្យមានដំណើរការទេ ៕
ចែករំលែកព័តមាននេះ