រាជធានីភ្នំពេញ ៖ ក្នុងជំនួបពិភាក្សាទ្វេភាគីជាមួយប្រធានាធិបតីកូរ៉េសម្តេចតេជោហ៊ុន សែន នាយករដ្ឋមន្ត្រីបានស្នើភាគីកូរ៉េជំរុញការកែច្នៃផលិតផលកសិកម្ម ដើម្បីនាំចេញទៅប្រទេសកូរ៉េបន្ថែម ។ យោងតាមបណ្តាញសង្គមហ្វេសប៊ុក សម្តេចចេញផ្សាយនៅថ្ងៃទី០៤ ខែកុម្ភៈនេះ…
រាជធានីភ្នំពេញ ៖ ក្នុងជំនួបពិភាក្សាទ្វេភាគីជាមួយប្រធានាធិបតីកូរ៉េសម្តេចតេជោហ៊ុន សែន នាយករដ្ឋមន្ត្រីបានស្នើភាគីកូរ៉េជំរុញការកែច្នៃផលិតផលកសិកម្ម ដើម្បីនាំចេញទៅប្រទេសកូរ៉េបន្ថែម ។ យោងតាមបណ្តាញសង្គមហ្វេសប៊ុក សម្តេចចេញផ្សាយនៅថ្ងៃទី០៤ ខែកុម្ភៈនេះ បានឲ្យដឹងថា ក្នុងជំនួបជាមួយលោកមូន ជេអ៊ីន (Moon Jae-In) ប្រធានាធិបតីនៃសាធារណរដ្ឋកូរ៉េខាងត្បូង សម្ដេចតេជោបានបញ្ជាក់ថា ទំនាក់ទំនងទ្វេភាគីរវាងកម្ពុជា និងកូរ៉េ បានក្លាយទៅជាទំនាក់ទំនងស៊ីជម្រៅពេញលេញ ក្រោយពីការបង្កើតឡើងនៅក្នុងឆ្នាំ១៩៩៦ និងមានកិច្ចព្រមព្រៀងជាច្រើនរវាងប្រទេសទាំងពីរដែលបានចុះជាមួយគ្នា ដើម្បីពង្រឹងទំនាក់ទំនងកិច្ចសហប្រតិបត្តិការរវាងប្រទេសទាំងពីរ ។
សម្ដេចតេជោពិតជារីករាយដែលបានឃើញកិច្ចព្រមព្រៀងការមិនយកពន្ធត្រួតគ្នាដែលត្រូវបានចុះហត្ថលេខា កាលពីចុងឆ្នាំ២០១៩ ដែលកិច្ចព្រមព្រៀងនឹងផ្តល់ភាពងាយស្រួលសម្រាប់អ្នកវិនិយោគប្រទេសទាំងពីរក្នុងការបណ្ដាក់ទុនរកស៊ី ។ សម្ដេចបានបញ្ជាក់ថា ការកែទម្រង់ការវិនិយោគនឹងផ្ដល់ឱកាសសារជាថ្មីចំពោះអ្នកវិនិយោគ ហើយសង្ឃឹមថា លោកប្រធានាធិបតី និងជួយជំរុញឲ្យអ្នកវិនិយោគិន កូរ៉េបន្តមកដាក់ទុនវិនិយោគនៅកម្ពុជា ។
សម្តេចថា ទំហំពាណិជ្ជកម្មរវាងប្រទេសទាំងពីរកម្ពុជា-កូរ៉េ បានបន្តកើនឡើងនៅឆ្នាំ២០១៩ កន្លងទៅ ក្នុងន័យនេះសម្ដេចតេជោចង់ឃើញឲ្យមានការនាំចេញផលិតផលរបស់កម្ពុជាបន្ថែមទៀត មកកាន់ទីផ្សារកូរ៉េ ។ ជាមួយគ្នានោះដែរ សម្តេចក៏បានលើកឡើងថា កម្ពុជាបាននាំស្វាយស្រស់ទៅកាន់ទីផ្សារកូរ៉េ កាលពីដើមឆ្នាំកន្លងទៅដែលក្នុងនេះសម្ដេចបានត្រេកអរចំពោះការនាំចេញផ្លែស្វាយទៅកាន់ទីផ្សារកូរ៉េ ។ សម្ដេចចង់ឃើញការបន្តធ្វើកិច្ចសហប្រតិបត្តិការបន្ថែមទៀត លើវិស័យកសិកម្មនៅប្រទេសកម្ពុជា ។ ក្នុងជំនួបនោះដែរ សម្ដេចតេជោបានស្នើឱ្យឯកឧត្តមប្រធានាធិបតីជួយគាំទ្រក្នុងការពង្រឹងការវិនិយោគលើវិស័យកសិកម្មនៅប្រទេសកម្ពុជា ជាពិសេសកិច្ចសហប្រតិបត្តិការលើវិស័យកសិកម្ម និងជម្រុញការកែច្នៃផលិតផលកសិកម្មសម្រាប់នាំចេញមកកាន់កូរ៉េផងដែរ ។
សម្ដេចតេជោនាយករដ្ឋមន្ត្រីក៏ស្នើឲ្យកូរ៉េបន្តកិច្ចព្រមព្រៀងចាស់ពាក់ព័ន្ធវិស័យទេសចរណ៍ក្នុងការបន្តពង្រឹងកិច្ចសហប្រតិបត្តិការរវាងប្រជាជន និងប្រជាជននៃប្រទេសទាំងពីរ ។ ក្នុងន័យនេះ សម្តេចតេជោនាយករដ្ឋមន្ត្រីចង់ឃើញកិច្ចសហប្រតិបត្តិការរវាងប្រទេសទាំងពីរឲ្យកាន់តែល្អប្រសើរថែមទៀត ។ លោកប្រធានាធិបតីកូរ៉េ បានបញ្ជាក់ថា នៅក្នុងកិច្ចប្រជុំកំពូលអាស៊ាន-កូរ៉េ ដែលគំនិតផ្តួចផ្តើមរបស់សម្តេចតេជោបានដំណើរការទៅដោយជោគជ័យ និងបានអរគុណសម្ដេចតេជោចំពោះការផ្ដួចផ្ដើមគំនិតនៅក្នុងការរៀបចំកិច្ចប្រជុំលើកដំបូងដែលបានប្រព្រឹត្តទៅ កាលពីខែវិច្ឆិកា ២០១៩កន្លងទៅ ។
លោកបានគូសបញ្ជាក់ថា យើងបានអនុវត្តនូវគំនិតផ្ដួចផ្ដើមរបស់សម្ដេចតេជោ ដែលទទួលបានជោគជ័យយ៉ាងត្រចះត្រចង់ចំពោះគំនិតផ្ដួចផ្ដើមនេះ ។ ពាក់ព័ន្ធជាមួយនឹងកិច្ចសហប្រតិបត្តិការទ្វេភាគី ឯកឧត្តមបានគូសបញ្ជាក់ថា ទំនាក់ទំនងប្រទេសទាំងពីរបានឡើងដល់កម្រិតមួយចាស់ទុំ និងបានបញ្ចប់កិច្ចព្រមព្រៀងពាក់ព័ន្ធជាមួយនឹងការផ្តល់ជំនួយផ្នែកច្បាប់ ព្រមទាំងបានចុះហត្ថលេខាលើកិច្ចព្រមព្រៀងស្ដីពីការមិនយកពន្ធត្រួតគ្នារវាងប្រទេសទាំងពីរផងដែរ ។
លោករីករាយចំពោះដំណើរការនៃទំនាក់ទំនងប្រទេសទាំងពីរ និងកិច្ចសហប្រតិបត្តិការនៃប្រទេសទាំងពីរផងដែរ ។ ជាមួយគ្នានោះដែរ លោកថា រដ្ឋាភិបាលកូរ៉េនឹងបន្តផ្ដល់ការគាំទ្រយ៉ាងសកម្មចំពោះការធ្វើជាម្ចាស់ផ្ទះនៃកិច្ចប្រជុំកំពូលអាស៊ីអឺរ៉ុបនៅកម្ពុជានៅចុងឆ្នាំនេះ ។ លោកសង្ឃឹមថា កម្ពុជានឹងគាំទ្រកិច្ចប្រជុំពាក់ព័ន្ធនៃកំណើនសេដ្ឋកិច្ចបៃតងដែលនឹងរៀបចំនៅប្រទេសកូរ៉េនៅចុងឆ្នាំនេះផងដែរ ៕
ចែករំលែកព័តមាននេះ