រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា កម្លាំងល្បាតប៉ុស្តិ៍នគរបាលរដ្ឋបាលទួលទំពូង២ ខណៈកំពុងល្បាតក្នុងមូលដ្ឋាន ក៏ប្រទះឃើញបុរសម្នាក់ចេញពីផ្ទះមួយកន្លែងគួរឱ្យសង្ស័យ ក៏ឃាត់ខ្លួនសួរនាំ រួចឆែកឆេរក្នុងខ្លួន ស្រាប់តែរកឃើញលុយ ទូស័ព្ទដៃ និងនាឡិកាដៃ ក៏ឃាត់ខ្លួនសួរនាំ ទើបបែកធ្លាយបក្សពួកម្នាក់ទៀតអូសរទេះអេតចាយ បង្កឲ្យមានការភ្ញាក់ផ្អើលកាលពីម៉ោង៣ទៀបភ្លឺ ថ្ងៃទី៥ ខែកុម្ភៈ ឆ្នាំ២០២០ នៅចំណុចផ្ទះលេខ១៨១ ផ្លូវ១៧៣ ស្ថិតក្នុងសង្កាត់ទួលទំពូង២ ខណ្ឌចំការមន។
សេចក្តីរាយការណ៍បន្តថា ម្ចាស់ផ្ទះរងគ្រោះខាងលើឈ្មោះ ថម ម៉ៅ ភេទស្រី អាយុ៣៨ឆ្នាំ មុខរបរនៅផ្ទះ ស្នាក់នៅផ្ទះកើតហេតុខាងលើ ។ ចំណែកជនសង្ស័យខាលើឈ្មោះ ខែម សុខន ភេទប្រុស អាយុ៣៨ឆ្នាំ មុខរបររើសអេតចាយ ស្នាក់នៅផ្ទះជួល សង្កាត់បឹងទំពុន២ ខណ្ឌមានជ័យ និងជនសង្ស័យម្នាក់ទៀតជាបក្សពួកឈ្មោះ សួរ ចំណាន អាយុ២៥ឆ្នាំ មុខរបររើសអេតចាយ ជាម្ចាស់រ៉ឺម៉ក ស្នាក់នៅសង្កាត់បឹងទំពុន២ ខណ្ឌមានជ័យ ។
យោងតាមប្រភពពីសមត្ថកិច្ចប៉ុស្តិ៍នគរបាលរដ្ឋបាលបឹងទំពុនទី២ បានប្រាប់ឱ្យដឹងថា មុនកើតហេតុ គឺកម្លាំងប៉ុស្តិ៍នគរបាលរដ្ឋបាលបឹងទំពុនទី២ បានល្បាតពួនស្ទាក់ក្នុងមូលដ្ឋាន លុះមកដល់ចំណុចកើតហេតុក៏ឃើញជនសង្ស័យឈ្មោះខែម សុខន ដើរចេញពីផ្ទះកើតហេតុគួរឲ្យសង្ស័យ ក៏ឃាត់ខ្លួនសួរនាំ និងឆែកឆេរក្នុងខ្លួនក៏រកឃើញលុយខ្មែរមួយចំនួនទូរស័ព្ទដៃ២គ្រឿង និងនាឡិកាដៃ២គ្រឿងទៀត លុះពេលសួរដេញដោលក៏ធ្វើឱ្យជនសង្ស័យរូបនោះភ័យស្លន់ស្លោ ទើបដឹងថា ជាចោរ ក៏ត្រូវសមត្ថកិច្ចឃាត់ខ្លួនតែម្តង ។
បើតាមការសារភាពរបស់ជនសង្ស័យរូបនេះបានប្រាប់ថា រូបគេលួចយកចេញពីផ្ទះកើតហេតុខាងលើនោះ ទើបសមត្ថកិច្ចគោះទ្វារហៅរកម្ចាស់ផ្ទះ ក៏មានស្ត្រីម្នាក់ចេញពីផ្ទះមួយនៅជិតកន្លែងផ្ទះកើតហេតុមកអះអាងថា ជាផ្ទះរបស់ខ្លួន ដោយរូបគាត់បានចាក់សោទុកចោល រួចទៅគេងផ្ទះបងប្អូននៅក្បែរគ្នានោះ ។ ក្រោយមកស្ត្រីម្ចាស់ក៏បានចូលទៅមើលក្នុងផ្ទះ រួចក៏បានផ្អើលស្រែកឆោឡោឱ្យសមត្ថកិច្ចជួយ ព្រោះតែផ្ទះរបស់គាត់ត្រូវក្រុមចោរគាស់សោរផ្ទះចូលរើឥវ៉ាន់រាយប៉ាយពេញក្នុងផ្ទះលួចទ្រព្យសម្បត្តិអស់ហើយ តាំងពីទូរទស្សន៍ ម៉ាញ៉េ ធុងបាស កង្ហា លុយ មាស រួមទាំងប្លាទីនមួយចំនួនទៀតបាត់អស់ពីផ្ទះគ្មានសល់តែម្តង។
ភ្លាមៗនោះសមត្ថកិច្ចក៏ឃាត់ខ្លួនជនសង្ស័យយកទៅសួរនាំ ទើបដឹងថា គេនៅមានបក្សពួកម្នាក់ទៀតឈ្មោះ សួ ចំណាន ដែលបានអូសរទេះអេតចាយយកទ្រព្យសម្បត្តិជនរងគ្រោះគេចខ្លួនបាត់។ ក្រោយមកសមត្ថកិច្ចប៉ុស្តិ៍នគរបាលទួលទំពូងទី២ ក៏បានសហការគ្នាជាមួយកម្លាំងល្បាតប៉ុស្តិ៍នគរបាលទំនប់ល្បាតរួមគ្នាមកដល់ចំណុចផ្លូវ៤៣២ ជិតនឹងអគារខុនដូមួយកន្លែង ស្ថិតក្នុងសង្កាត់ទំនប់ទឹក ខណ្ឌបឹងកេងកង ក៏ប្រទះឃើញជនសង្ស័យកំពុងអូសរទេះអេតចាយ ក៏ឃាត់ខ្លួនសួរនាំ និងឆែកឆេររកឃើញមានធុងបាស់ ម៉ាញ៉េ ទូរទស្សន៍ កង្ហារ ទើបជនសង្ស័យសារភាពថា ខ្លួនពិតជាបក្សពួកនឹងគ្នាពិតប្រាកដមែន ហើយក៏ឃាត់ខ្លួនយកទៅកាន់ប៉ុស្តិ៍នគរបាលទួលទំពូង២ សួរនាំបន្តតែម្តង។
បើតាមប្រភពពីស្ត្រីរងគ្រោះបានប្រាប់ឱ្យដឹងថា មុនកើតហេតុ គឺគាត់ទើបនឹ ត្រឡប់មកពីលេងនៅខេត្តសៀមរាបវិញ ហើយយប់កើតហេតុនោះគាត់មិនបានសម្រាកនៅផ្ទះគាត់ទេ ដោយបានចាក់សោផ្ទះទៅសម្រាកនៅផ្ទះបងប្អូនក្បែរនោះ ពេលមានការភ្ញាក់ផ្អើលនៅមុខផ្ទះ ទើបគាត់ចេញមកមើលផ្ទះគាត់ឃើញចំហរទ្វារ ទើបដឹងថា មានចោរលួចគាស់ទ្វារផ្ទះចូលលួចទ្រព្យសម្បត្តិ ។
ក្រោយពេលកើតហេតុទ្រព្យសម្បត្តិដែលជនសង្ស័យប្រមូលយកទៅនោះ ត្រូវបានប្រគល់ទៅជនរងគ្រោះវិញនៅសល់តែកាបូបដាក់គ្រឿង អលង្ការ មានមាស និងប្លាទីនជារបស់បងប្អូនផ្ញើរ នៅរកមិនទាន់ឃើញនោះទេ ។
នៅចំពោះមុខសមត្ថកិច្ចជនសង្ស័យទាំងពីរបានសារភាពថា ខ្លួនពិតជាបានធ្វើសកម្មភាពគាស់សោរផ្ទះលួចទ្រព្យសម្បត្តិស្ត្រីរងគ្រោះពិតមែន។ បច្ចុប្បន្នជនសង្ស័យត្រូវបានកសាងសំណុំរឿងបញ្ជូនបន្តទៅកាន់អធិកាដ្ឋានខណ្ឌចំការមនចាត់ការបន្ត ៕ (កែសម្រួលដោយ ៖ បុប្ផា)
ចែករំលែកព័តមាននេះ