រាជធានីភ្នំពេញ ៖ សាលាដំបូងរាជធានីភ្នំពេញ កាលពីរសៀលថ្ងៃទី៤ ខែកុម្ភៈ ឆ្នាំ២០២០ បានលើកយកសំណុំរឿងនាយទាហានជាន់ខ្ពស់ម្នាក់បម្រើការងារនៅអគ្គបញ្ជាការដ្ឋានក្រសួងការពារជាតិ និងជាទីប្រឹក្សាឯកឧត្តមម្នាក់ មកបើកសវនាការជំនុំជម្រះក្តី ពាក់ព័ន្ធលើការចោទប្រកាន់ពីបទ.ឆបោក ។
ជនជាប់ចោទមានឈ្មោះ មុំ អស្សនី ភេទប្រុស អាយុ៤២ ឆ្នាំ មានទីលំនៅផ្ទះលេខ ២៧A សង្កាត់គោករកា ខណ្ឌព្រែកព្នៅ រាជធានីភ្នំពេញ ។
សវនាការនេះដឹកនាំដោយលោក អ៊ុក សុវណ្ណរិទ្ធ ចៅក្រមជំនុំជម្រះ និងលោក សេង ហៀង ព្រះរាជអាជ្ញារង ជាតំណាងអយ្យការ ហើយសវនាការនោះបានធ្វើឡើងចំពោះមុខជនជាប់ចោទ នឹងមេធាវីការពារក្តីកម្បាំងមុខដើមបណ្តឹង ប៉ុន្តែចាត់ទុកជាចំពោះមុខ ព្រោះមានមេធាវីការពារសិទ្ធិដែលបានចូលរួម ។
ជនជាប់ចោទត្រូវបានកម្លាំងសមត្ថកិច្ចនគរបាលព្រហ្មទណ្ឌរាជធានីភ្នំពេញ ចាប់ខ្លួនកាលពីថ្ងៃទី២០ ខែកញ្ញា ឆ្នាំ២០១៩ ពាក់ព័ន្ធលើពាក្យបណ្តឹងរបស់ឈ្មោះ ផាត សេន និងឈ្មោះ ម៉ា សំកុល ដែលបានចោទប្រកាន់ថា ឆបោកប្រាក់ចំនួន១៣.០០០ដុល្លារអាមេរិក យកទៅរត់ការធ្វើប្លង់ដី តែមិនគោរពតាមកិច្ចសន្យា ។
ចៅក្រមជំនុំជម្រះបានលើយកសំណុំរឿងនេះមកសួរដេញដោលលើជនជាប់ចោទនោះគឺ កាលពីក្នុងអំឡុងដើមឆ្នាំ២០១៩ ដើមបណ្តឹង និងជនជាប់ចោទដែលជាមនុស្សធ្លាប់ស្គាល់ និងរាប់អានគ្នា រីឯជនជាប់ចោទជាមនុស្សមានអំនួតអួតអាងថា ខ្លួនជានាយទាហានជាន់ខ្ពស់ ជាទីប្រឹក្សាឯកឧត្តមម្នាក់ និងកំពុងត្រៀមឡើងធ្វើជាអភិបាលរងខេត្តបន្ទាយមានជ័យ ។
ដោយយល់ឃើញថា ជនជាប់ចោទជាមនុស្សមានបុណ្យសក្តិ កិត្តិយសខ្ពង់ខ្ពស់ដូច្នោះហើយ បានជាធ្វើឲ្យឈ្មោះ ផាត សេន និងឈ្មោះ ម៉ា សំកុល ត្រូវការពឹងពាក់ឲ្យជួយរត់ការដោះស្រាយរឿងទំនាស់វិវាទដីធ្លី និងធ្វើប្លង់កាន់កាប់ដីមួយកន្លែងមានទំហំ២ហិកតា ស្ថិតនៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
នៅថ្ងៃទី២០ ខែមិនា ឆ្នាំ២០១៩ ដើមបណ្តឹង និងជនជាប់ចោទ បានធ្វើកិច្ចសន្យាជាមួយគ្នា ហើយដើមបណ្តឹងបានប្រគល់ប្រាក់ ឲ្យទៅជនជាប់ចោទជាបន្តបន្ទាប់រហូតដល់ចំនួន១៣ ០០០ ដុល្លារអាមេរិក ដើម្បីយកទៅរត់ការដោះស្រាយរឿងទំនាស់វិវាទដីធ្លី២ ហិកតានោះ ។ ដែលដីនោះទី១-ត្រូវដោះស្រាយបណ្តឹងជាប់ពាក់ពន្ធនៅតុលាការ និងទី២-ត្រូវដោះស្រាយវិវាទជាមួយប្រជាពលរដ្ឋ ។ ប៉ុន្តែនៅពេលជនជាប់ចោទបានទទួលយកប្រាក់ពីដើមបណ្តឹងហើយ បែរជាទៅធ្វើកិច្ចការនោះមិនបានសម្រេច និងថែមទាំងគេចវេសមិនព្រមជួបដើមបណ្តឹងទៀតផង ទើបបានជាកើតរឿងក្តីក្តាំនោះ ។
នៅមុខរង្វង់ក្រចកសេះ ជនជាប់ចោទឈ្មោះ មុំ អស្សនី បានបដិសេដ្ឋចំពោះការចោទប្រកាន់នេះ ដោយបានឆ្លើយដោះបន្ទុកខ្លួនឯងថា ទទួលស្គាល់ពេលធ្វើកិច្ចសន្យា ប៉ុន្តែមិនទទួលស្គាល់ការចោទប្រកាន់ថា បានយកប្រាក់ពីដើមបណ្តឹងរហូតដល់១៣.០០០ដុល្លារអាមេរិកនោះទេ កិច្ចសន្យាធ្វើមែន តែលុយអត់បានឲ្យដល់ដៃ ។
ដោយសារដើមបណ្តឹងមិនបានចូលរួមសវនាការក្នុងការសាកសួរដេញដោលទល់មុខគ្នា ជាមួយជនជាប់ចោទលើការចោទប្រកាន់នេះ ចៅក្រមជំនុំជម្រះបានទុកសិទ្ធិឲ្យតំណាងអយ្យការសម្រេចធ្វើការចោទប្រកាន់ ទើបតំណាងអយ្យការនៅតែរក្សាការចោទប្រកាន់លើជនជាប់ចោទពីបទឆបោកដដែល ។
ជនទាំងឡាយណាដែលបានប្រព្រឹត្តបទល្មើស.ឆបោក តាមមាត្រា ៣៧៧ នឹង៣៧៨ នៃក្រហ្មទណ្ឌ តម្រូវផ្តន្ទាទោសដាក់ពន្ធនាគារចាប់ពី៦ខែ ដល់ទៅ៣ឆ្នាំ នឹងពិន័យជាប្រាក់ពី១លានទៅ៦លានរៀល ។ ដូច្នេះជនជាប់ចោទប្រហែលជាមិនអាចគេចផុតពីការជាប់ពន្ធនាគារ តាមមាត្រាដែលបានចែង នឹងចូលជាធរមានដូចខាងលើនេះទេ ។
ក្រោយចប់ការសាកសួរដេញដោល និងការធ្វើសន្និដ្ឋានដាក់បន្ទុក និងដោះបន្ទុកពីសំណាក់អង្គសវនាការនោះ ចៅក្រមជំនុំជម្រះបានលើកពេលប្រកាសសាលក្រមទៅថ្ងៃទី៣ ខែមិនា ឆ្នាំ២០២០ ខាងមុខ ៕ (កែសម្រួលដោយ ៖ ធីតា)
ចែករំលែកព័តមាននេះ