ប្រទេសចិន ៖ យោងតាមតុល្យការចុងក្រោយរបស់អាជ្ញាធរមូលដ្ឋានថា នៅចិនដីគោកតែមួយ មិនគិតហុងកុង និងម៉ាកាវ ចំនួនអ្នកបាត់បង់ជីវិតដោយសារវីរុសកូរ៉ូណាថ្មី បានឡើងដល់៤៩០នាក់ ភាគច្រើននៅក្រុងវូហាន និងក្នុងខេត្តហ៊ូប៉ី។
ក្នុងរបាយការណ៍ប្រចាំថ្ងៃរបស់ខ្លួនគណៈកម្មាធិការសុខាភិបាលខេត្តហ៊ូប៉ី រៀបរាប់ពីការកើនឡើងខ្លាំងនៃចំនួនអ្នកឆ្លងថ្មី ដែលមាន៣១៥៦នាក់។ ដូច្នេះចំនួនអ្នកផ្ទុកវីរុសពេលនេះឡើងដល់២៤.៣០០នាក់នៅចិនដីគោក។ នេះជាការគូសបញ្ជាក់កាលពីថ្ងៃទី៥កុម្ភៈ របស់គណៈកម្មាធិការសុខាភិបាលជាតិចិន។ ក្រៅពីចិនដីគោកមានមនុស្សម្នាក់បាត់បង់ជីវិតនៅហ្វ៊ីលីពីន និងម្នាក់នៅហុងកុង។
ចិនបន្តចាត់បណ្ដាវិធានការម៉ឺងម៉ាត់ ដើម្បីទប់ការឆ្លងរាលដាលនៃវីរុសនោះ។ បន្ទាប់ពីដាក់ជាពិសេសផ្នែកមួយដ៏ធំនៃខេត្តហ៊ូប៉ី និងប្រជាជនតំបន់នោះប្រមាណជាជាង៥០លាននាក់ឲ្យនៅដាច់ពីគេ ទីក្រុងធំ៣ទៀតនៃខេត្តហ្សេយ៉ាងភាគខាងកើតប្រទេស ស្ថិតនៅចម្ងាយច្រើនរយគីឡូម៉ែត្រពីក្រុងវូហាន បានចេញផ្សាយពីវិធានការថ្មីៗ សំដៅកម្រិតការដើរហើរនិងធ្វើដំណើរ។
ក្នុងចំណោមទីក្រុងទាំង៣នេះ មានក្រុងក្វាងស៊ូ ដែលមានអ្នកឆ្លង១៣២នាក់ ស្ថិតនៅចម្ងាយប្រមាណ១៥០គីឡូម៉ែត្រពីក្រុងសៀងហៃ ដែលមានអ្នកឆ្លង២១៩នាក់ និងអ្នកបាត់បង់ជីវិតម្នាក់។ ក្នុងខណ្ឌ៣ក្នុងចំណោមខណ្ឌទាំងអស់នៃទីក្រុងនោះ ក្នុងរាល់២ថ្ងៃម្ដងអនុញ្ញាតឲ្យមនុស្សតែម្នាក់ប៉ុណ្ណោះក្នុង១គ្រួសារចេញក្រៅ។ វិធានការប្រហាក់ប្រហែលគ្នានោះក៏មានជាធរមានក្នុងក្រុងតៃស៊ូនិងក្នុងសង្កាត់៣នៃក្រុងនីញបូ។ កាលពីថ្ងៃទី២កុម្ភៈគឺក្រុងវេនស៊ូដែលឃាំងប្រជាជនខ្លួនជាង៩លាននាក់ មិនឲ្យចេញទៅណាមកណា។
រដ្ឋាភិបាលចិនបានផ្ដល់ឲ្យឈប់សម្រាក៣ថៃ្ងថែមទៀតក្រោយឈប់ចូលឆ្នាំថ្មី ក្នុងក្ដីសង្ឃឹមថាអាចពន្យារពេលការវិលត្រឡប់មកកាន់បណ្ដាទីក្រុង នៃពលករច្រើនរយលាននាក់ដែលមកកាន់ខេត្តកំណើត ក្នុងឱកាសបុណ្យចូលឆ្នាំថ្មី។ ទីក្រុងជាច្រើនក្នុងនោះមានក្រុងសៀងហៃផងដែរ បានអំពាវនាវដល់បណ្ដាសហគ្រាសឲ្យបញ្ឈប់សកម្មភាពរបស់ពួកគេ១សប្ដាហ៍ថែមទៀត ក៏ប៉ុន្តែបណ្ដាសាលារៀននិងសាកលវិទ្យាល័យបានពន្យារពេលការចូលរៀន៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ