រាជធានីភ្នំពេញ ៖ បុរសម្នាក់បានខ្ចីរ៉ឺម៉កម៉ូតូកង់បីឥណ្ឌាគេបើកហើយសង្ស័យផឹកស្រវឹងក៏ជ្រុលទៅបុកចូលផ្ទះជួសជុលម៉ូតូមួយកន្លែង បណ្តាលអោយរងការខូចខាតម៉ូតូចំនួន៣គ្រឿង និងបែកទូដាក់ប្រេងម៉ាស៊ីនអស់មួយផងដែរ ចំណែកអ្នកបើកបរបានរត់គេចខ្លួនបាត់ស្រមោល ។
ហេតុការណ៍ខាងលើនេះបានកើតឡើងកាលពីវេលាម៉ោង១២និង៣០នាទីរំលអធ្រាត្រឈានចូលថ្ងៃទី៤ ខែកុម្ភៈ ឆ្នាំ២០២០ នៅចំណុចផ្ទះជួសជុលម៉ូតូយីហោជាងគីមច្រាយ តាមបណ្តោយផ្លូវ62R ស្ថិតក្នុងសង្កាត់ទួលសង្កែទី១ ខណ្ឌឫស្សីកែវ ។
រ៉ឺម៉កម៉ូតូកង់បីឥណ្ឌាមួយគ្រឿងខាងលើ ពណ៌ស ពាក់ស្លាកលេខ ភ្នំពេញ ១HU-០៦៦៤ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ។ ចំណែកម្ចាស់ផ្ទះរងគ្រោះមិនស្គាល់ឈ្មោះនោះទេ ។
តាមប្រភពព័ត៌មានពីម្ចាស់ផ្ទះរងគ្រោះបានអោយដឹងថា មុនពេលកើតហេតុ គាត់ជាមួយប្រពន្ធកំពុងតែសម្រាន្តលង់លក់នៅខាងក្នុងផ្ទះ លុះដល់វេលាកើតហេតុ ស្រាប់តែឮសូរប្រាវ ពេលនោះគាត់ក៏ដើរចេញមកមើលឃើញម៉ូតូកង់បីឥណ្ឌាមួយគ្រឿងពណ៌សបុកចូលផ្ទះរបស់គាត់ បណ្តាលឱ្យរងការខូចខាតម៉ូតូចំនួន៣គ្រឿង និងខូចខាតទ្វារ ព្រមទាំងទូដាក់ប្រេងម៉ាស៊ីនបែកអស់មួយផងដែរ រីឯរ៉ឺម៉កម៉ូតូកង់បីឥណ្ឌាវិញបានរងការខូចខាតខ្ទេចកាងខាងមុខតិចតួចតែប៉ុណ្ណោះ ។
តាមប្រភពដដែលបានបន្តថា ភ្លាមៗនោះអ្នកបើកបររ៉ឺម៉កម៉ូតូកង់បីឥណ្ឌាភ័យស្លន់ស្លោពេកបំរុងនឹងទាញរ៉ឺម៉កម៉ូតូកង់បីឥណ្ឌាអូសចេញក្រៅដែរ ប៉ុន្តែត្រូវគាត់ចេញមកទាន់ ហើយអ្នកបើកបរបានរត់ចោលរ៉ឺម៉កម៉ូតូកង់បីឥណ្ឌា និងគេចខ្លួនចេញពីកន្លែងកើតហេតុបាត់តែម្តងលុះមួយសន្ទុះក្រោយមក ក៏មានម្ចាស់រ៉ឺម៉កម៉ូតូកង់បីឥណ្ឌាបានមកដល់កន្លែងកើតហេតុនិងបានត្រឹមសោកស្តាយនូវហេតុការណ៍ដែលបានកើតឡើងតែប៉ុណ្ណោះ ។
ក្រោយពេលកើតហេតុ ត្រូវបានសមត្ថកិច្ចចុះធ្វើការវាស់វែង រួចយករ៉ឺម៉កម៉ូតូកង់បីឥណ្ឌាទៅរក្សាទុកបណ្តោះអាសន្ននៅឯប៉ុស្តិ៍រដ្ឋបាលនគរបាលទួលសង្កែ និងរង់ចាំភាគីទាំងសងខាងមកដោះស្រាយគ្នានៅពេលក្រោយជាបន្តទៅទៀត ៕ (កែសម្រួលដោយ ៖ ធីតា)
ចែករំលែកព័តមាននេះ