ក្រៅពីមានអំណាចនយោបាយច្រើនជាងគេក្នុងប្រទេសហើយ អ្នកដឹកនាំមួយចំនួនក៏ជាអ្នកមានទ្រព្យសម្បត្តិស្តុកស្តម្ភដែរ ហើយពួកគេមិនចាំបាច់ជាអ្នកដឹកនាំរបស់ប្រទេសអភិវឌ្ឍន៍ និងប្រទេសមហាអំណាចធំៗទេ ។ ខាងក្រោមនេះ គឺជាអ្នកដឹកនាំដែលមានទ្រព្យសម្បត្តិច្រើនជាងគេជុំវិញពិភពលោក៖
១. លោកប្រធានាធិបតី វ្លាឌីមៀ ពូទីន (Vladimir Putin)៖
មានរឿងសម្ងាត់ជាច្រើនទាក់ទិននឹងទ្រព្យសម្បត្តិពិតប្រាកដដែលស្ថិតក្រោមការគ្រប់គ្រងរបស់ប្រធានាធិបតីរបស់ប្រទេសរុស្ស៊ីនេះ ប៉ុន្តែយោងទៅតាមការសន្មតរបស់លោក ប៊ីល ប្រោឌើ (Bill Browder) ដែលជានាយកប្រតិបត្តិរបស់ Hermitage Capital Management កាលពីឆ្នាំ ២០១៧ បានឲ្យដឹងថា លោកប្រធានាធិបតីរូបនេះមានទ្រព្យសម្បត្តិសរុបប្រមាណដល់ទៅ ២០០ប៊ីលានដុល្លារឯណោះក្នុងមួយឆ្នាំដែលច្រើនជាងលោកមហាសេដ្ឋី ជេហ្វ បេសូស (Jeff Bezos) ដែលបច្ចុប្បន្នជាបុរសដែលមានទ្រព្យសម្បត្តិច្រើនជាងគេលើលោកទៅទៀត ។ ប៉ុន្តែយោងទៅតាមគណៈកម្មាធិការគ្រប់គ្រងការបោះឆ្នោតកណ្តាលរបស់សហព័ន្ធរុស្ស៊ីកាលពីឆ្នាំ ២០១៨ បានឲ្យដឹងថា លោករកប្រាក់ចំណូលជាផ្លូវការបានតែ ៦៧៣,០០០ដុល្លារប៉ុណ្ណោះក្នុងកំឡុងពីឆ្នាំ ២០១១ ដល់ ២០១៦ កន្លងមក ។
២. លោកនាយករដ្ឋមន្ត្រី មហាធា មហាម៉ាត់ (Mahathir Mohamad)៖
នាយករដ្ឋមន្ត្រីរបស់ប្រទេសម៉ាឡេស៊ីដែលមានអាយុប្រមាណ ៩៤ឆ្នាំរូបនេះជានាយករដ្ឋមន្ត្រីដែលមានអាយុចាស់ជាងគេនាពេលបច្ចុប្បន្នបន្ទាប់ពីលោកបានជាប់ឆ្នោតនៅឆ្នាំ ២០១៨ កន្លងមក ។ មានសេចក្តីរាយការណ៍មួយចំនួនបានឲ្យដឹងថា លោកមានទ្រព្យប្រមាណ ៤៥ប៊ីលានដុល្លារលាក់ទុក និងថែមទាំងមានគណនីធនាគារប្រមាណ ៥០ធនាគារជុំវិញពិភពលោកទៀតផង ។ កូនប្រុសរបស់លោកគឺ ម៉ូខាហ្សានី មហាធា (Mokhazani Mahathir) ជាសហគ្រិនមួយរូបដែលមានទ្រព្យសម្បត្តិរួម ៣២៥លានដុល្លារផងដែរ ។
៣. មេដឹកនាំកូរ៉េខាងជើងគឺលោក គីម ជុងអ៊ុន (Kim Jong-un)៖
មានការសន្មតមកថា មេដឹកនាំរូបនេះមានទ្រព្យសម្បត្តិសរុបដល់ទៅ ៥ប៊ីលានដុល្លារតាំងពីឆ្នាំ ២០១៣ មក ។ ក្នុងកំឡុងពេលនោះ មន្ត្រីរដ្ឋាភិបាលអាមេរិក និងកូរ៉េខាងត្បូងបានប្រទះឃើញទ្រព្យ និងគណនីធនាគារដែលត្រូវបានគ្រប់គ្រងដោយមេដឹកនាំរូបនេះ និងក្រុមគ្រួសាររបស់លោក ។ ពួកគេបានប្រទះឃើញថា ទ្រព្យសម្បត្តិរបស់លោកត្រូវបានដាក់ក្នុងគណនីធនាគារប្រមាណ២០០ ផ្សេងៗគ្នាក្នុងប្រទេសចិន និងប្រទេសដទៃទៀតដូចជារុស្ស៊ី និងស្វ៊ីសជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ