រាជធានីភ្នំពេញ ៖ ទន្ទឹមនឹងការរីកចម្រើន មន្ត្រីសហព័ន្ធការ៉ាតេដូ នៅតែអះអាងថា វិស័យមួយនេះមិនសូវមានយុវតីហ្វឹកហាត់ច្រើនទេ បើធៀបនឹងចំនួនយុវជន ស្របគ្នាដែលការ៉ាតេដូ ក៏ត្រូវការឱ្យយុវតីចូលរួមជាធនធានច្រើន ដើម្បីត្រៀមចូលរួមស៊ីហ្គេមឆ្នាំ២០២៣។
ពាក់ព័ន្ធនឹងមូលហេតុដែលការ៉ាតេដូកម្ពុជា រីកចម្រើនប៉ុន្តែមិនសូវសំបូរយុវតីពេញវ័យហ្វឹកហាត់នេះ ត្រូវបានបណ្ដាក្លិបធំៗបញ្ជាក់ថា ដោយសារតែក្នុងប្រទេសកម្ពុជា មិនសូវលើកទឹកចិត្តនារីៗពេញវ័យដែលចេះក្បាច់គុនខ្លាំងៗនៅឡើយ ទើបនារីក្មេងៗ ច្រើនតែហ្វឹកហាត់ឱ្យដឹងៗតែមួយរយៈ ក៏លាឈប់បាត់ ។
បណ្ដាក្លិបទាំងអស់សុទ្ធតែទទួលស្គាល់ថា កូនសិស្សដែលហ្វឹកហាត់ពិតជាកើនឡើងមិនមាន
ការថយចុះ ប៉ុន្តែកូនសិស្សភាគច្រើន ច្រើនតែជាក្មេងៗ កុមារា-កុមារី និងបើមានមនុស្សធំពេញវ័យ គឺច្រើនតែជាយុវជន ។ យុវវ័យទាំងនោះច្រើនតែសម្រេចចិត្តបោះបង់ការហ្វឹកហាត់ការ៉ាតេដូ ក្រោយពេលចូលថ្នាក់បាក់ឌុប និងអាចឈប់ដាច់តែម្ដង នៅពេលកូនសិស្សទាំងនោះ ឈានចូលមហាវិទ្យាល័យ និងចេញធ្វើការ ។ គ្រូបង្វឹកដូចៗគ្នាបញ្ជាក់ថា ការ៉ាតេដូពេញនិយមតែក្មេងៗដែលសិក្សាក្រោមថ្នាក់ទី១០ប៉ុណ្ណោះ តែចូលដល់ថ្នាក់ទី១១ និងប្រឡងបាក់ឌុប គឺទោះជាអ្នកស្រឡាញ់ប៉ុនណា ក៏ច្រើនតែបោះបង់ដែរ ។
ដោយឡែកសម្រាប់យុវតីពេញវ័យវិញគឺមានក្នុងភាគរយតិចបំផុតនៅតាមបណ្ដាក្លិប ដោយយុវតីទាំងនោះ ក៏មក ហាត់ភាគច្រើនច្រើនតែតាមៗគ្នា ដោយនៅពេលមិត្តភក្តិលាឈប់ ក៏បាត់ស្រមោលដែរ។ យ៉ាងណាក៏ដោយ គ្រូបង្វឹកភាគច្រើនយល់ថា មកដល់ពេលនេះគឺគ្រាន់ជាងមុនសម្រាប់វត្តមានយុវតីហ្វឹកហាត់ការ៉ាតេដូ បើធៀបនឹងប៉ុន្មានឆ្នាំមុន ដែលស្រីៗគ្រាន់តែឮក្បាច់គុនគឺមិនហ៊ានចង់ចេះ ព្រោះតែសម្ពាធគ្រួសារ និងសង្គមនោះ។
ទោះបីយ៉ាងណាគេយល់ស្របថា បន្ទាប់ពី លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ត្រូវបានជ្រើសរើសឱ្យកាន់តំណែងជាប្រធានខេមរៈសហព័ន្ធការ៉ាតេ-ដូ ជំនួសលោក សាយ ណូរ៉ា កាលពីឆ្នាំ២០១៦ ក្នុងពិធីបង្ហាញបច្ចេកទេស និងការប្រកួតមិត្តភាពកីឡាការ៉ាតេដូ សូតូកង់ នៅពហុកីឡដ្ឋានជាតិ ក្រោមអធិបតីភាពលោកបណ្ឌិតហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា គេកត់សម្គាល់ថា កីឡានេះរីកចម្រើន ។ ក្នុងសមាសភាពនារី ដ្បិតថាស្ថិតិតាមក្លិបនៅមានកម្រិតទាប តែក៏មានកីឡាការិនីជម្រើសជាតិល្អ ត្រូវបានសហព័ន្ធជម្រើសឱ្យធ្វើជាធនធានតំណាងប្រទេសផងដែរ ។
កីឡានេះ ក៏មានមុខក្នុងព្រឹត្តិការណ៍ស៊ីហ្គេមចុងឆ្នាំមុនដែរ ព្រមជាមួយនឹងជំនឿចិត្តខ្ពស់ជាងមុន ។ នោះគឺបន្ទាប់ពីលោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានបញ្ចេញគម្រោងកិច្ចការ៤យ៉ាងដើម្បីអភិវឌ្ឍវិស័យកីឡាមួយនេះគឺ៖
ទី១-លោកប្រធានសហព័ន្ធថ្មីបានរៀបចំរបៀបរបបដឹកនាំការងារឲ្យមានប្រសិទ្ធភាពជាងមុន
ទី២-គ្រោងសាងសង់មជ្ឈមណ្ឌលកីឡាការ៉ាតេ-ដូ
ទី៣-ត្រៀមរៀបចំប្រមូលផ្តុំកីឡាករជម្រើសជាតិផ្នែកការ៉ាតេ-ដូ និង
ទី៤-លោកត្រៀមស្វែងរកជំនួយបច្ចេកទេសពីអន្តរជាតិ ជាពិសេសពីប្រទេសជប៉ុនដើម្បីជួយបណ្តុះបណ្តាលកីឡាករខ្មែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ