បន្ទាយមានជ័យ ៖ សេចក្តីរាយការណ៍បឋមបានឲ្យដឹងថា មន្ត្រីបរិស្ថាន និងអាជ្ញាធរស្រុកបានចុះកំណត់តំបន់អភិរក្សសត្វស្លាបនៅរហាលកេះ និងអូរវៀន ដែលមានសត្វស្លាបច្រើនកំពុងរស់នៅ កាលពីថ្ងៃទី៣១ ខែមករា ឆ្នាំ២០២០ នៅឃុំឈ្នួរមានជ័យស្រុកព្រះនេត្រព្រះ ។
លោក ហែម សារិន អភិបាលរងស្រុកព្រះនេត្រព្រះបានប្រាប់ថា ៖ ដោយមានការណែនាំពីអភិបាលខេត្តបន្ទាយមានជ័យ លោក អ៊ុ រាត្រី មន្ត្រីមន្ទីបរិស្ថានខេត្តរួមជាមួយអាជ្ញាធរស្រុកព្រះនេត្រព្រះបានចុះទៅកំណត់តំបន់អភិរក្សសត្វស្លាបនៅចំណុចរហាលកេះ និងអូរវៀន ដែលស្ថិតក្នុងឃុំឈ្នួរមានជ័យ ស្រុកព្រះនេត្រព្រះ ដែលមានសត្វស្លាបជាច្រើនប្រភេទដែលកំពុងរស់នៅមានសម្បុក និងពងដែលត្រូវបានមន្ត្រីជំនាញធ្វើការអភិរក្សា និងរក្សាសត្វស្លាបទុក ។
លោកបានបញ្ជាក់ថា ៖ នៅតំបន់ដែលត្រូវកំណត់អភិរក្សសត្វស្លាបនេះត្រូវបានមន្ត្រីជំនាញផ្សព្វផ្សាយដល់បងប្អូនប្រជាពលរដ្ឋមិនត្រូវចូលលួចចាប់ ឬទាក់សត្វឡើយ នេះជាតំបន់អភិរក្សសត្វស្លាប ហើយត្រូវចូលអភិរក្សសត្វស្លាបទុក ។ បើរកឃើញមានជនខិលខូចណាមួយចូលតំបន់អភិរក្សាសត្វចាប់ និងទាក់សត្វស្លាបត្រូវមានវិធានការតាមច្បាប់ ។
លោក ហែម សារិន បានបញ្ជាក់ថា ក្រោយពេលដែលមន្ត្រីជំនាញចុះកំណត់តំបន់អភិរក្សសត្វស្លាបរស់ជាច្រើនពាន់ក្បាល គឺមន្ត្រីជំនាញបានធ្វើប៉ុស្តិ៍ការពារដោយមន្ត្រីអភិរក្សាការពារ និងដាក់ផ្លាកសញ្ញាការពារសត្វស្លាប ដោយណែនាំប្រជាពលរដ្ឋនៅតំបន់នោះត្រូវចូលរួមការពារ និងអភិរក្សសត្វស្លាប ៕ កែសម្រួលដោយ ៖សុឃាក់
ចែករំលែកព័តមាននេះ