រាជធានីភ្នំពេញ ៖ សម្តេចតេជោ បានបញ្ជាក់ ទៅកាន់ក្រុមប្រឆាំងដែលរិះគន់ថា ចេះតែបញ្ជូនពលករទៅក្រៅប្រទេសដោយមិនស្វែងរកការងារឲ្យពលករដោយព្រមានថា អាចបញ្ចប់វត្តមានពលករនៅក្រៅប្រទេសពេលណាក៏បាន ប៉ុន្តែមិនធ្វើនោះទេ ។ ថ្លែងក្នុងពិធីសំណេះសំណាលជាមួយពលករខ្មែរ សិស្ស និស្សិតនៅប្រទេសកូរ៉េ នារសៀលថ្ងៃទី០៣ ខែកុម្ភៈនេះ សម្តេចតេជោបានលើកឡើងថា ៖«នៅពេលពូខិតខំធ្វើការប្រឹងប្រែងបញ្ជូនពលករធ្វើការនៅក្រៅប្រទេសដូចជា កូរ៉េ ជប៉ុន និងធ្វើឲ្យពលករស្របច្បាប់ដូចជានៅប្រទេសថៃ ម៉ាឡេស៊ី និងខិតខំធ្វើការនៅមជ្ឈិមបូព៌ា គេថា ពូដឹកនាំប្រទេសគិតដែលឲ្យខ្មែរតែធ្វើខ្ញុំគេ» ។ ពលករខ្មែរបម្រើការងារស្របច្បាប់នៅកូរ៉េមានចំនួន ៣៨០០៦នាក់ តែបើគិតទាំងអ្នកស្របច្បាប់មិនស្របច្បាប់ អ្នកមានប្តី ឬមានប្រពន្ធជាជនជាតិកូរ៉េ មានដល់ទៅ៦៥៥០០នាក់ ។
សម្តេចក៏បានបង្ហាញតួលេខពលករខ្មែរធ្វើការនៅកូរ៉េ ទាំងធ្វើការស្របច្បាប់ ឬសហគមន៍តាមរបាយការណ៍ដែលខាងទូតកូរ៉េថា ពលករចិនមានចំនួន១លាន១សែននាក់ ថៃ២០ម៉ឺននាក់ ហ្វីលីពីន៧ ម៉ឺន ៨ពាន់នាក់ ម៉ុងហ្គោលី៤ម៉ឺន៥ពាន់នាក់ មីយ៉ាងម៉ា៣ ម៉ឺន១ពាន់នាក់ បង់ក្លាដេស ១ម៉ឺន៧ពាន់នាក់ វៀតណាម២២ម៉ឺននាក់ កូបេគីស្ថាន ៨ម៉ឺន៣ពាន់នាក់ ឥណ្ឌូនេស៊ី៧ម៉ឺន ៣ពាន់នាក់ នេប៉ាល់៣ម៉ឺន៤ពាន់នាក់ ស្រីលង្គការ២ ម៉ឺន៦ពាន់នាក់ ប៉ាហ្គីស្ថាន១ម៉ឺន៣ពាន់នាក់ ។
ជាមួយគ្នានោះដែរ សម្តេចក៏បានលើកឡើងពលករដែលដែលកាន់បណ្ណការងារនៅក្នុងប្រទេសកូរ៉េមានដូចជា ៖ រៀតណាមមានចំនួន៣៦៨៩៩នាក់ ថៃ២៥៤៦២នាក់ កូបេគីស្ថាន១៣៩៥២នាក់ ហ្វីលីពីន២៥៣៦៥នាក់ ម៉ុងហ្គោលី៥៨៤១នាក់ កម្ពុជា ៣៨០០៦នាក់ ឥណ្ឌូនេស៊ី ២៨២៥៩នាក់ នេប៉ាល់ ៣៥៣២៥នាក់ មីយ៉ាន់ម៉ា ២៥២៣១នាក់ ស្រីលង្គា២២០៨៨នាក់ បង់ក្លាដេស១០១៧៣នាក់ ។ សម្តេចបន្តថា ទោះបីជាថៃបានបញ្ជូលពលករទៅក្រៅប្រទេសច្រើនក្តីតែថា បានត្រូវការពលករពីកម្ពុជាប្រមាណ១លាននាក់ ភូមា២លាន ពីឡាវជាងកន្លះលាននាក់ ។ ហេតុអ្វីថៃបញ្ចូលពលករទៅក្រៅប្រទេស ? បើថៃត្រូវការពលករពីកម្ពុជា មីយ៉ាន់ម៉ា និងពីឡាវ ។
សម្តេចគូសបញ្ជាក់ថា ៖«អីញ្ចឹងអ្នកដែលចោទខ្ញុំថា ដឹកនាំប្រទេសត្រឹមតែបញ្ចូលមនុស្សទៅធ្វើខ្ញុំគេ ? តើអ្នកចង់សាកទេ ខ្ញុំអាចធ្វើបាន ដើម្បីបញ្ចប់នូវវត្តមានពលករខ្មែរនៅក្រៅប្រទេសអត់លំបាកទេ ។ ម៉េចថា មិនពិបាកនោះ គឺខ្ញុំសុំលុបកិច្ចព្រមព្រៀងឧទាហរណ៍ ៖ ជាមួយកូរ៉េ អំពីការបញ្ចូនពលករមកធ្វើនៅកូរ៉េ ហើយបញ្ជូនទៅកម្ពុជាវិញ ។ ក៏ប៉ុន្តែបើធ្វើតាមក្រុមប្រឆាំងនេះអ្វីដែលខូចខាត គឺក្មួយៗជាពលករតែម្តង» ។ សម្តេចក៏បានឲ្យដឹងថា បើតាមរបាយការណ៍ឯកអគ្គរដ្ឋទូតកម្ពុជានៅកូរ៉េពលករនៅកូរ៉េបញ្ចូនប្រាក់ទៅស្រុកកំណើតក្នុងមួយឆ្នាំៗប្រមាណជាង៤០០លានដុល្លារ ។
សម្តេចបញ្ជាក់ថា៖«ខ្ញុំអាចធ្វើបានជាមួយថៃ ក៏ខ្ញុំអាចធ្វើបានខ្ញុំលុបចោល ហើយសុំបញ្ជូនមកវិញ«….» តែខ្ញុំមិនធ្វើ យើងបានខិតខំធ្វើចំពោះអ្នកមិនស្របច្បាប់ ឲ្យស្របច្បាប់នៅថៃ នៅម៉ាឡេស៊ី» ៕
ចែករំលែកព័តមាននេះ