រាជធានីភ្នំពេញ ៖ ធនាគារឯកទេសវីង ដែលជាអ្នកផ្តល់សេវាធនាគារចល័តឈានមុខគេនៅកម្ពុជា និងសមាគមមីក្រូហិរញ្ញវត្ថុកម្ពុជា ដែលជាសមាគមមានវិជ្ជាជីវៈលើផ្នែកគ្រឹះស្ថានមីក្រូហិរញ្ញវត្ថុ បានចុះអនុស្សរណៈនៃការយោគយល់គ្នា (MoU) អំពីកិច្ចព្រមព្រៀងភាពជាដៃគូថ្មីនៅថ្ងៃទី ៣១…
រាជធានីភ្នំពេញ ៖ ធនាគារឯកទេសវីង ដែលជាអ្នកផ្តល់សេវាធនាគារចល័តឈានមុខគេនៅកម្ពុជា និងសមាគមមីក្រូហិរញ្ញវត្ថុកម្ពុជា ដែលជាសមាគមមានវិជ្ជាជីវៈលើផ្នែកគ្រឹះស្ថានមីក្រូហិរញ្ញវត្ថុ បានចុះអនុស្សរណៈនៃការយោគយល់គ្នា (MoU) អំពីកិច្ចព្រមព្រៀងភាពជាដៃគូថ្មីនៅថ្ងៃទី ៣១ ខែមករា ឆ្នាំ ២០២០។ តាមរយៈអនុស្សរណៈនៃការយោគយល់គ្នា សមាជិកនៃសមាគមមីក្រូហិរញ្ញវត្ថុកម្ពុជា នឹងអាចបង់ថ្លៃសមាជិកភាពរបស់ពួកគេតាមរយៈភ្នាក់ងារវីងជាង ៧.៣០០កន្លែង និងតាមរយៈកម្មវិធីស្មាតហ្វូនវីង ដោយផ្តល់ជាជម្រើសកាន់តែប្រសើរក្នុងការទូទាត់ប្រាក់។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង (ខេមបូឌា) លីមីតធីត បានមានប្រសាសន៍ថា «ជាមួយនឹង វីង ការបង់ថ្លៃសមាជិកភាពរបស់ សមាគមមីក្រូហិរញ្ញវត្ថុកម្ពុជា គឺអាចធ្វើទៅបានដោយងាយស្រួល ដោយលោកអ្នកគ្រាន់តែប្រើម្រាមដៃចុចលើ កម្មវិធីស្មាតហ្វូនវីង ឬ ទៅបង់តាមបណ្តាញភ្នាក់ងារ វីង ដែលមានទូទាំងប្រទេស យើងមានសេចក្តីរីករាយក្រៃលែង ក្នុងការធ្វើជាដៃគូជាមួយ សមាគមមីក្រូហិរញ្ញវត្ថុកម្ពុជា ដើម្បីពាំនាំនូវបច្ចេកវិទ្យាចុងក្រោយបំផុត និងសមត្ថភាព ដើម្បីជួយគាំទ្រការរីកចម្រើនរបស់គ្រឹៈស្ថានមីក្រូហិរញ្ញវត្ថុ នៅកម្ពុជា» ។
ក្នុងនាមជាអ្នកឈានមុខគេក្នុការគាំទ្រដាក់បញ្ចូលហិរញ្ញវត្ថុ អស់រយៈពេលជាង១១ឆ្នាំមកនេះ ធនាគារឯកទេស វីង បានបង្កើតប្រព័ន្ធប្រតិបត្តិការហិរញ្ញវត្ថុចល័តយ៉ាងរឹងមាំ ដែលឆ្លើយតបទៅនឹងតម្រូវការរបស់ប្រជាជនកម្ពុជា នៅទូទាំងខេត្ត តាមរយៈការផ្តល់ជូននូវសេវាកម្មជាច្រើនដូចជា ៖ ការផ្ទេរប្រាក់ ការទូទាត់វិក្កយបត្រ ការបញ្ចូលទឹកប្រាក់តាមទូរស័ព្ទ និងការទូទាត់សាច់ប្រាក់តាមរយៈប្រព័ន្ធអ៊ីនធើរណេត និងក្រៅប្រព័ន្ធអ៊ីនធើរណេត។
លោក ផល វ៉ាន់ឌី នាយកប្រតិបត្តិ សមាគមមីក្រូហិរញ្ញវត្ថុកម្ពុជា បានមានប្រសាសន៍ថា «ការប្រើប្រាស់ ជំរើសនៃការបង់ប្រាក់ដែលមានបណ្តាញដ៏រឹងមាំ និងប្រកបដោយសុវត្ថិភាពបែបនេះ វាជាការបោះជំហ៊ានដ៏សំខាន់សម្រាប់យើង។ ពួកយើងបាន ធ្វើការស្វែងរកមធ្យោបាយជាច្រើន ដើម្បីផ្តល់ជូនអតិថិជនរបស់យើងប្រកបដោយភាពងាយស្រួល ក្នុងការប្រើប្រាស់បច្ចេកវិទ្យាថ្មីៗ»។
សមាគមមីក្រូហិរញ្ញវត្ថុកម្ពុជា ត្រូវបានបង្កើតឡើងក្នុងឆ្នាំ ២០០៤ ក្នុគោលបំណងដើម្បីធានានូវភាពរុងរឿង និងនិរន្តរភាពនៃវិស័យមីក្រូហិរញ្ញវត្ថុនៅកម្ពុជា តាមរយៈការបង្កើតបណ្តាញក្នុងស្រុក និងក្រៅស្រុក ក៏ដូចជាលើកតម្កើងតម្លាភាព និងគាំពារអតិថិជននៅក្នុងប្រទេសកម្ពុជា។
នៅប្រទេសកម្ពុជា មីក្រូហិរញ្ញវត្ថុ ដើរតួយ៉ាងសំខាន់ក្នុងការពង្រឹងសិទ្ធអំណាចស្ត្រីដែលជាមេគ្រួសារ តាមរយៈការផ្តល់ចំណេះដឹងការគ្រប់គ្រងផ្នែកហិរញ្ញវត្ថុ។ យោងតាម សមាគមមីក្រូហិរញ្ញវត្ថុកម្ពុជាបានឱ្យដឹងថា ៨០% នៃអតិថិជនសមាគមមីក្រូហិរញ្ញវត្ថុកម្ពុជា គឺកំពុងរស់នៅតំបន់ដាច់ស្រយ៉ាល និង ៨០% នៃពួកគេ គឺជាស្ត្រី។ មកដល់ពេលនេះ សមាគមមីក្រូហិរញ្ញវត្ថុកម្ពុជា មានសមាជិកចំនួន១០១គ្រិះស្ថានមីក្រូហិរញ្ញវត្ថុ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ