មិនមាននរណាចូលចិត្តចាយវាយលុយដល់អស់ពីកាបូបទេព្រោះវាបង្កជាអារម្មណ៍ស្ត្រេស មិនស្រួលក្នុងខ្លួន និងប៉ះពាល់ដល់គោលដៅផ្សេងៗដែលយើងបានកំណត់ទុកសម្រាប់ខ្លួនឯងជាដើម ។ ជាក់ស្តែងស្ថានការហិរញ្ញវត្ថុរបស់មនុស្សមិនស្ថិតក្រោមការគ្រប់គ្រងរបស់ពួកគេទាំងស្រុងទេ ប៉ុន្តែមនុស្សនៅតែអាចគ្រប់គ្រងផ្នែកមួយចំនួនបានដើម្បីជៀសវាងហានិភ័យ និងបញ្ហាសម្រាប់ថ្ងៃមុខជាពិសេសនៅពេលដែលអ្នកមិនមានលុយច្រើនសម្រាប់ខែថ្មីនេះ ។
ប្រសិនបើអ្នកធ្លាក់ខ្លួនចូលក្នុងស្ថានការដូចខាងលើ ចូរចៀសវាងដូចតទៅ៖
១. ចៀសវាងបង់រំលស់រថយន្តថ្មី ឬគ្រឿងអេឡិចត្រូនិកថ្មីៗ ។ ពេលដែលអ្នកមិនមានលុយច្រើន អ្នកមិនអាចកាត់បន្ថយប្រាក់ចំណូលប្រចាំខែរបស់ខ្លួនបន្ថែមដោយបង់រំលស់ដើម្បីផលិតផលអ្វីមួយឡើយព្រោះវាប្រៀបបានជាបង្កើនបំណុលសម្រាប់ខ្លួនឯងតែប៉ុណ្ណោះ ។
២. ចៀសវាងឲ្យលុយអ្នកដទៃខ្ចី ឬធានាជំនួសអ្នកដទៃ ។ ប្រសិនបើអ្នកមិនមានលុយសម្រាប់ខ្លួនឯងហើយ វាមានន័យថាអ្នកក៏មិនមានលុយសម្រាប់អ្នកដទៃដែរ ។ ហើយការធានាឲ្យមនុស្សម្នាក់ទៀតខ្ចីលុយអ្នកដទៃមានន័យថាអ្នកមានទំនួលខុសត្រូវក្នុងការសងលុយជំនួសពេលដែលកូនបំណុលមិនអាចសងបំណុលម្ចាស់ដើមបាន ។
៣. ចៀសវាងកុហកអ្នកដទៃថាអ្នកមានលុយច្រើនជាងការពិតជាក់ស្តែង ។ ប្រសិនបើមនុស្សដទៃគិតថាអ្នកមានលុយ ពួកគេនឹងរំពឹងទុកថាអ្នកនឹងចាយលុយច្រើនដែរហើយ ។ ដូច្នេះអ្នកមិនចាំបាច់ឲ្យអ្នកដទៃដឹងពីស្ថានការហិរញ្ញវត្ថុរបស់អ្នកទេ តែអ្នកក៏មិនគួរកុហកពួកគេថាអ្នកមានលុយច្រើនដែរ ។
៤. ចៀសវាងចំណាយពេលទំនេរធ្វើអ្វីដែលមិនមានប្រយោជន៍៖
មានកិច្ចការជាច្រើនដែលអ្នកអាចធ្វើពេលដែលខ្លួនទំនេរពីការងារដើម្បីរកលុយបន្ថែម ដូចជាការងារក្រៅម៉ោង អាជីវកម្មតូចតាច ឬការសិក្សា និងអភិវឌ្ឍន៍ខ្លួនបន្ថែមដើម្បីឲ្យអ្នកអាចសុំថ្លៃបន្ថែមជាដើម ។
៥. ចៀសវាងខ្ជះខ្ជាយភ្លើង និងទឹក ។ មានសេវាសំខាន់ៗពីរដែលអ្នកអាចគ្រប់គ្រងបាន គឺសេវាអគ្គិសនី និងទឹក ។ ដូច្នេះអ្នកអាចសន្សំ និងកាត់បន្ថយការចំណាយច្រើនដោយគ្រាន់តែបិទភ្លើងពេលដែលអ្នកមិនប្រើ និងកុំបើកទឹកចោលជាដើម ។
៦. ចៀសវាងការលេងល្បែង ។ ល្បែងមិនដែលជាគំនិតល្អទេ ។ វាអាចធ្វើឲ្យមនុស្សដែលមានទ្រព្យសម្បត្តិបាត់បង់អ្វីគ្រប់យ៉ាងក្នុងពេលតែមួយពព្រិចភ្នែក ។ ហើយអ្នកមិនគួរពឹងផ្អែកវាដើម្បីផ្លាស់ប្តូរជោគវាសនារបស់អ្នកឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ