ប្រទេសចិន ៖ យោងតាមអាជ្ញាធរសុខាភិបាលចិនថា ការឆ្លងរាលដាលនៃវីរុសកូរ៉ូណាថ្មី បណ្ដាលឲ្យមនុស្សបាត់បង់ជីវិតឡើងដល់៣៦១នាក់ហើយនៅចិន ភាគច្រើននៅខេត្តហ៊ូប៉ី ដែលមានក្រុងវូហានជាទីប្រជុំជន ប្រភពចាប់ផ្ដើមនៃការចម្លងវីរុសនេះ ដែលកាត់ផ្ដាច់រាល់ការចេញចូល ខណៈក្រុងវេនហ្សួមានប្រជាជន៩លាននាក់ ត្រូវបានបញ្ចូលក្នុងបញ្ជីទីក្រុងដែលមានការរឹតត្បិតដែរ ព្រោះមានអ្នកឆ្លង២៦៥នាក់។
ជាលើកដំបូងដែលមានមនុស្សម្នាក់បានបាត់បង់ជីវិត នៅក្រៅប្រទេសចិន គឺនៅប្រទេសហ្វ៊ីលីពីន ធ្វើឲ្យចំនួនអ្នកបាត់បង់ជីវិតឡើងដល់៣៦២នាក់។ នេះបើយោងតាមអង្គការសុខភាពពិភពលោក WHO ថា ហ្វ៊ីលីពីនរាយការណ៍កាលពីថ្ងៃទី២ ខែកុម្ភៈ ពីការបាត់បង់ជីវិតម្នាក់ក្នុងទីក្រុងម៉ានីល នៃជនជាតិចិនម្នាក់នោះមានអាយុ៤៤ឆ្នាំ មានដើមកំណើតនៅក្រុងវូហាន។ ការប្រកាសនេះធ្វើឡើង ខណៈដែលប្រទេសកាន់តែច្រើនបានបិទព្រំដែនរបស់ពួកគេ ចំពោះបណ្ដាមនុស្សមកពីចិន។ វីរុសនេះបានឆ្លងរាលដានដល់ប្រទេស២៤ហើយ។
យោងតាមតុល្យការចុងក្រោយប្រកាសនាយប់ថ្ងៃទី២មកទី៣កុម្ភៈថា ចំនួនអ្នកបាត់បង់ជីវិតនៅចិនឡើងដល់៣៦១នាក់ ក្នុងនោះ៥៧នាក់ ក្នុងថ្ងៃទី២ កុម្ភៈ តែ១គត់។ ចំណែកអ្នកឆ្លងនៅចិន បានឡើងដល់ជាង១៧.២០០នាក់។
ប្រឈមមុខចំពោះការឆ្លងរាលដាលនោះបណ្ដាប្រទេសនៃក្រុម G7 បើតាមរដ្ឋមន្ត្រីសុខាភិបាលអាល្លឺម៉ង់ថា នឹងផ្ដោតលើចម្លើយឯកភាពមួយ។ លោកថា យើងនឹងបើកធ្វើសន្និសីទតាមទូរស័ព្ទមួយ របស់រដ្ឋមន្ត្រីសុខាភិបាលនៃក្រុមប្រទេស G7។ ចំណែកអង្គការបណ្ដាប្រទេសនាំប្រេងចេញ OPEC និងរុស្ស៊ីជាសម្ព័ន្ធមិត្ត នឹងបើកកិច្ចប្រជុំខាងបច្ចេកទេសមួយ នាថ្ងៃទី៤ និងទី៥ កុម្ភៈ នៅទីក្រុងវីយែន ដើម្បីវិភាគពីការធ្លាក់ចុះនៃតម្លៃប្រេងឆៅទាក់ទិនឹងការឆ្លងរាលដាលនេះ ។
ប្រទេសម៉ុងហ្គោលី រុស្ស៊ី នេប៉ាល់ បានបិទព្រំដែនគោករបស់ពួកគេជាមួយចិន ហើយប៉ាពូអាស៊ីនូវែលហ្គីណេ បានបិទបណ្ដាកំពង់ផែ និងព្រលានយន្តហោះរបស់ខ្លួន សម្រាប់ពួកអ្នកដំណើរមកពីអាស៊ី។ សហរដ្ឋអាមេរិក អូស្ត្រាលី នូវែលហ្សេឡង់ អ៊ីរ៉ាក់ និងអ៊ីស្រាអែល បានហាមឃាត់ជ ាពិសេសមិនឲ្យពួកបរទេសដែលទើបមកពីចិនចូលដែនដីពួកគេ។
ទន្ទឹមនឹងនេះប្រតិបត្តិការធ្វើមាតុភូមិនិវត្តន៍របស់ពួកជនបរទេសដែលស្ថិតនៅប្រទេសចិន កំពុងបន្ត។ យន្តហោះបារាំងទី២ដែលនាំជនបរទេស មាន៣០សញ្ជាតិខុសគ្នាមកពីក្រុងវូហាន បានចុះចតនាថ្ងៃទី២ កុម្ភៈ នៅមូលដ្ឋានយោធាមួយនាភាគអាគ្នេយ៍បារាំង។ នៅម៉ារ៉ុកយន្តហោះ១គ្រឿងដែលដឹកជនជាតិម៉ារ៉ុក១៦៧នាក់ មកពីទីក្រុងវូហាន បានចុះនៅទីក្រុងបេនស្លីម៉ានស្ថិតនៅចន្លោះក្រុងរ៉ាបាត និងក្រុងកាសាប្លង់កា។
នៅអ៊ីតាលី យន្តហោះយោធា១គ្រឿងបានហោះចេញពីទីក្រុងរ៉ូម នាថ្ងៃទី២ កុម្ភៈ ទៅកាន់ក្រុងវូហាន ហើយត្រូវជម្លៀសមនុស្ស៦៧នាក់ចេញពីទីនោះ។ អាល់ហ្សេរីក៏ប្រកាសដែរថា ខ្លូននឹងធ្វើមាតុភូមិនិវត្តន៍ ជនជាតិទុយនីស៊ី១០នាក់ និងបណ្ដានិស្សិតលីប៊ី ជាប់នៅវូហាន តាមសំណើរបស់រដ្ឋាភិបាលប្រទេសទាំងនេះ រួមនឹងជនជាតិអាល់ហ្សេរី៣៦នាក់ ភាគច្រើនជានិស្សិតដែលជាប់គាំង៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ