រាជធានីភ្នំពេញ ៖ លោកនូ ស៊ិប បានធ្លាក់ខ្លួនឈឺកាលពីប្រមាណ២ឆ្នាំមុន ហើយគេបានភ្ញាក់ផ្អើលពេលដឹងថា លោកនៅតែផ្ទះជួលគេរាប់ឆ្នាំ ក្នុងបង្ទប់តូចមួយតម្លៃ៥០ដុល្លារ។ ហើយក៏មានមនុស្សមួយចំនួនគិតថា លោកអាចនឹងយកប្រាក់ដែលធ្លាប់មានបានទៅហ៉ឺហា ចតចំផ្លូវខុស ទើបមិនអាចស្តារស្ថានការបាន។
យ៉ាងណាចម្ងល់ទាំងអស់ត្រូវបានលោក នូ ស៊ិប លាតត្រដាងជាមួយអ្នកយកព័ត៌មានយើង ដែលបានជួបដោយចៃដន្យពេលលោកកំពុងច្រៀងនៅហាងមួយកន្លែង។ ក្នុងរាយកាយស្លេកស្លាំង សាច់បាក់ នៅសេសសល់កម្លាំងល្មមៗ ប្រឹងឈរទប់លំនឹងឱ្យល្អ ស្រែកច្រៀង ដើម្បីយកប្រាក់ទុកចំណាយប្រចាំថ្ងៃរបស់អតីតតារាចម្រៀងល្បីឈ្មោះ នូ ស៊ិប ដែលអ្នកណាក៏មានការចាប់អារម្មណ៍ ពេលឮសំឡេងដ៏ពីរោះរបស់លោកនៅតែទទួលយកបាន បើទោះជាធ្លាក់ខ្លួនឈឺយូរថ្ងៃក៏ដោយ។
រៀបរាប់ពេលសម្រាកពីការច្រៀង លោក នូ ស៊ិប បាននិយាយថា «មានគេសួរលោកថា អត់មានផ្ទះសេសសល់នឹងគេ ព្រោះអ្វី? ធាតុពិតកន្លងមក លោកធ្លាប់មានផ្ទះដែរ នៅម្តុំទួលគោក ជាផ្ទះក្នុងដីឡូតិ៍រួមមាន៤ទៅ១០គ្រួសារ។ ក្រោយមកលក់ជាចំណែកៗចែកគ្នា ហើយផ្ទះលោកតូចជាងគេតម្លៃក៏ទាប ពេលបានលុយក៏ទៅទិញផ្ទះ១ទៀតទាំងប្រឹង លុយអត់គ្រប់។ ពេលនោះហើយ ច្រៀងចេះតែខំ បែបណាក៏បង់រំលោះផ្ទះមិនគ្រប់ ផ្សំលោកមានបញ្ហាខ្លះនៅជាប់វាក់វិនជីវិតផង ក៏សុខចិត្តលក់ផ្ទះតែម្តង។
តារាវ័យជាង៧០ឆ្នាំរូបនេះបន្តថា ទោះលោកល្បីចម្រៀងឡើងឆាក ឬទៅច្រៀងនៅខាងក្រៅ ក៏មិនបានថ្លៃអីណាស់ណាទេ ណាមួយទៀតក៏យើងចាស់ ទើបមិនសូវបានច្រៀងពេញធឹងដូចគេ។ ផ្សំរឿងជំពាក់លុយបង់ផ្ទះច្រើន ហើយលោកមិនចង់មានឈ្មោះដេកភ័យជំពាក់គេ ក៏លក់ឆិនឆៃសងគេឱ្យអស់ ស្រឡះខ្លួនស្រណុកចិត្ត នៅផ្ទះជួលក៏បា នលោកមិនចង់ជំពាក់គេទេ មិនស្រួលសុខចិត្តលំបាក។
លោកបន្តថា ចាប់តាំងពីពេលនោះមក វិស័យដីធ្លីផ្ទះសម្បែងកាន់តែហក់ឡើងៗ ទិញមិនកើតស្របពេលជំងឺក៏មាន ការច្រៀងក៏បាត់ទីផ្សារ។ ទាក់ទិនជំងឺពេលនេះ លោកមានអាការៈជើងខាងឆ្វេងដូចជាចង់កៀបសរសៃ អង្គុយយូរអត់បាន ដើរបោះជំហ៊ានតិចៗ មិនខ្លាំងដូចជើងស្តាំ។ មួយទៀតលោកច្រៀងនៅតែឆាកណាទាបៗ បើឆាកខ្ពស់ឡើងមិនកើតទេ ទើបកម្មវិធីឆាកខ្ពស់ៗតាមហាងការ លោកចោលច្រើនរោងកន្លងមក។
លោកបន្តទៀតថា សព្វថ្ងៃក្រៅពីធ្វើទុក្ខជើង មានតែបញ្ហាឡើងឈាមទេ ដែលភ័យ ព្រោះហូបតបក៏លើស ដោយម្តងៗឡើងដល់១៩ក៏ឃើញ ។ ម្ល៉ោះហើយភ័យតែរឿងលើសឈាមនេះឯង ស្របពេលបេះដូង ក្រពះអីលោកនៅមិនធ្ងន់ទេ។
សព្វថ្ងៃលោក នូ ស៊ិប ច្រៀងប្រចាំនៅហាងសេវិនប្រាយ ដែលថៅកែហាងអាណិតឱ្យច្រៀងយូរមកហើយ ដោយមួយថ្ងៃបានពី២០ដុល្លារ ។ លោកពេលខ្លះបានភ្ញៀវស្គាល់ខ្លះហុចធីបក្រៅ ដើម្បីដោះស្រាយ។ រាល់ថ្ងៃលោកនៅផ្ទះជួល មុខពេទ្យរុស្ស៊ី ដោយចិញ្ចឹមកូនធម៌៣នាក់។ (កែសម្រួលដោយ ៖ បុប្ផា)
ចែករំលែកព័តមាននេះ