ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា មហាសែនតក់ស្លុតសម្រាប់គ្រួសារដ៏ក្រីក្រមួយនេះ ខណៈឪពុកកំពុងចុះរាវលៀសនៅក្នុងស្ទឹងសង្កែ ស្រាប់តែបាត់កូនប្រុស-ស្រី លុះបន្តិក្រោយក៏បានរកឃើញកូនតូចៗទាំង២នាក់បានលង់ទឹកស្ទឹងនៅក្បែរនោះ បណ្តាលឱ្យបាត់បង់ជីវិតទៅហើយ កាលពីម៉ោង៣និង៣០នាទីរសៀល ថ្ងៃទី០១ ខែកុម្ភៈ ឆ្នាំ២០២០ នៅក្នុងស្ទឹងសង្កែ ស្ថិតក្នុងភូមិបុសខ្នុរ ឃុំចែងមានជ័យ ស្រុកបាណន់។
មន្ត្រីមូលដ្ឋានបានឱ្យដឹងថា ក្មេងរងគ្រោះទាំង២នាក់បងប្អូននេះ ម្នាក់ឈ្មោះ ភ័ណ្ឌ សុខម៉ា ភេទប្រុស អាយុ៩ឆ្នាំ និងម្នាក់ទៀតឈ្មោះ ជឿន វីយ៉ា ភេទស្រី អាយុ៥ឆ្នាំ រស់នៅភូមិចែង ឃុំចែងមានជ័យ ស្រុកបាណន់។
មន្ត្រីដដែលបញ្ជាក់ថា កុមារា កុមារី ទាំង២នាក់បងប្អូននេះ បានបាត់បង់ជីវិតដោយសារតែលង់ទឹក ខណៈពេលទៅតាមឪពុកម្ដាយដែលទៅរាវលៀសនៅក្នុងស្ទឹងត្រង់ចំណុចខាងលើនេះ។ ហើយពួកគេបានលង់ទឹកបណ្តាលឱ្យបាត់បង់ជីវិត ខណៈដែលឪពុកម្តាយកំពុងនាំគ្នាចុះរាវលៀស ហើយមិនបានមើលកូនៗទាំង២នោះទេ ដែលចុះហែលទឹកលេងនៅក្បែរនោះដែរ។
បើតាមអាណាព្យាបាលកុមាររងគ្រោះត្រូវសមត្ថកិច្ចស្រង់សំដីថា ពួកគាត់នាំគ្នាទៅរាវលៀសនៅក្នុងស្ទឹងសង្កែ ដើម្បីយកទៅលក់ដើម្បីផ្គត់ផ្គង់ជីវភាពគ្រួសារ ហើយជារឿយៗតែងតែនាំកូនទាំង២នាក់ទៅជាមួយ។ ហើយកូនតូចៗទាំង២នាក់នោះតែងចុះហែលទឹក ឬរាវលៀសដែរ នៅកន្លែងដែលមានទឹករាក់ មិនហ៊ានទៅកាន់កន្លែងទឹកជ្រៅទេ។
សមត្ថកិច្ចបានស្រង់សំដីទៀតថា ប៉ុន្តែនៅថ្ងៃកើតហេតុ ដោយសារមានការធ្វេសប្រហែស ឪពុកម្ដាយភ្លេចមើលកូនៗ ទើបពួកគេជ្រុលចូលទៅកន្លែងជ្រៅរហូតលង់ទឹកទាំង២នាក់តែម្តង។
ឪពុកម្ដាយកុមាររងគ្រោះបញ្ជាក់ប្រាប់ថា ពេលដែលពួកគាត់បាត់កូនៗ គាត់បានស្រែកហៅ តែគ្មានចម្លើយនោះតែ ដោយមានការសង្ស័យក៏ចុះរាវរកក្នុងទឹកនៅចំណុចកើតហេតុ ស្រាប់តែប្រទះឃើញសពពួកគេទាំង២នាក់យ៉ាងរន្ធត់បំផុត។
មន្ត្រីមូលដ្ឋាននិយាយថា បើតាមការសាកសួរអំពីដំណើររឿងគេអាចសន្និដ្ឋានបានថា ករណីកូនតូចៗលង់ទឹកបាត់បង់ជីវិតយ៉ាងរន្ធត់នេះ គឺដោយសារតែការធ្វេសប្រហែសពីសំណាក់អាណាព្យាបាល ដែលមិនបានយកចិត្តទុកដាក់មើលកូនៗ ពេលនាំពួកគេទៅចុះរាវលៀសក្នុងស្ទឹង។ នេះជាមេរៀនដ៏សោកសៅបំផុតសម្រាប់អាណាព្យាបាលនានា ដែលគួរតែមានការប្រុងប្រយ័ត្ននៅពេលនាំកូនតូចទៅហែលទឹកនៅតាមតំបន់រមណីយរដ្ឋានទឹកជ្រោះ ឬ ទឹកស្ទឹងនានាជាដើម៕ (កែសម្រួលដោយ ៖ បុប្ផា)
ចែករំលែកព័តមាននេះ