រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវបានឪពុកក្មេងស្រីរងគ្រោះឃាត់ខ្លួន បន្ទាប់ពីមានបំណងចង់នាំក្មេងស្រីរងគ្រោះទៅជួញដូរផ្លូវភេទនៅផ្ទះសំណាក់មួយកន្លែងក្នុងខណ្ឌឬស្សីកែវ ហើយខណៈពេលនាំខ្លួនមកប៉ុស្តិ៍ជនសង្ស័យបោះចោលថ្នាំញៀន៣កញ្ចប់តូចចោល។ ហេតុការណ៍នេះកើតឡើងកាលពីម៉ោង៩យប់ ថ្ងៃទី០១ ខែកុម្ភៈ ឆ្នាំ២០២០ ចំណុចសួនច្បារវត្តបទុម ក្នុងសង្កាត់ចតុមុខ ខណ្ឌដូនពេញ ។
សេចក្តីរាយការណ៍បន្តថា ជនសង្ស័យមានឈ្មោះ សុខ ឃាង អាយុ៤១ឆ្នាំ មុខរបរមិនពិត ស្នាក់នៅស្វាយប៉ាក ខណ្ឌឬស្សីកែវ ចំណែកក្មេងស្រីរងគ្រោះអាយុ១៥ឆ្នាំ មុខរបរជាសិស្ស ។
តាមប្រភពពីឪពុកក្មេងស្រីរងគ្រោះបានប្រាប់ឲ្យដឹងថា នៅមុនពេលកើតហេតុ គឺគាត់បានឲ្យកូនស្រីខលហៅជនសង្ស័យមកជួប និងដឹកទៅផ្ទះ ។ ភ្លាមនោះជនសង្ស័យបានជិះម៉ូតូមួយគ្រឿងម៉ាក ហុងដា សេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ ១GX-០០៣៥ មកជួបនៅសួនវត្តបទុម ហើយក៏រូបគាត់ជាឪពុកបានឃាត់ជនសង្ស័យ និងបានទំនាក់ទំនងទៅសមត្ថកិច្ចប៉ុស្តិ៍ចតុមុខភ្លាមៗផងដែរ។
ឪពុកក្មេងស្រីរងគ្រោះបន្តថា លុះពេលសមត្ថកិច្ចមកដល់ ក៏នាំខ្លួនជនសង្ស័យទៅប៉ុស្តិ៍ តែពេលជិតដល់ប៉ុស្តិ៍ ស្រាប់តែជនសង្ស័យបានបោះចោលកញ្ចប់នំលើចិញ្ចើមផ្លូវ ដោយសមត្ថកិច្ចឃើញទាន់ ក៏បានរើសយកមកត្រួតពិនិត្យមើល ស្រាប់តែឃើញម្សៅក្រាម.សថ្លាចំនួន៣កញ្ចប់តូច ដោយសង្ស័យសារធាតុញៀន ។
ប្រភពពីសមត្ថកិច្ចបានប្រាប់ឲ្យដឹងថា បន្ទាប់ពីសមត្ថកិច្ចសួរនាំរួចមកទើបដឹងថា ពាក់ព័ន្ធករណីល្បួងក្មេងស្រី (អនិតិជនអាយុក្រោម១៥ឆ្នាំ) យកទៅដាក់ឲ្យភ្ញៀវដែលត្រូវការសេវ៉ាផ្លូវភេទ និងជាដើមហេតុដែលធ្វើឲ្យឪពុកក្មេងស្រីរងគ្រោះចាប់ប្រគល់ឲ្យសមត្ថកិច្ចប៉ុស្តិ៍តែម្តង។
ក្រោយពេលកើតហេតុ កម្លាំងសមត្ថកិច្ចប៉ុស្តិ៍ចតុមុខ សួរនាំ និងកសាងសុំណុំរឿងបញ្ជូនខ្លួនបន្តទៅអធិការនគរបាលខណ្ឌដូនពេញ ដើម្បីចាត់ការបន្តតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ