រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា លំនៅឋានប្រក់សង្ក័សី ចំនួន៤ខ្នង ត្រូវបានអគ្គិភ័យឆាបឆេះយ៉ាងសន្ធោសន្ធៅ ក្នុងនោះ៣ខ្នងរងការខូចខាតទាំងស្រុង និងមួយខ្នងទៀតឆេះអស់ពាក់កណ្តាល ខណៈពេលម្ចាស់ចាក់សោទុកចោល ស្រាប់តែទុស្សេចរន្តក្លាយជាអណ្តាតភ្លើងឆាបឆេះតែម្តង…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា លំនៅឋានប្រក់សង្ក័សី ចំនួន៤ខ្នង ត្រូវបានអគ្គិភ័យឆាបឆេះយ៉ាងសន្ធោសន្ធៅ ក្នុងនោះ៣ខ្នងរងការខូចខាតទាំងស្រុង និងមួយខ្នងទៀតឆេះអស់ពាក់កណ្តាល ខណៈពេលម្ចាស់ចាក់សោទុកចោល ស្រាប់តែទុស្សេចរន្តក្លាយជាអណ្តាតភ្លើងឆាបឆេះតែម្តង បង្កឱ្យមានការភ្ញាក់ផ្អើលកាលពីម៉ោងប្រមាណ៤និង៣០នាទីរសៀល ថ្ងៃទី០១ ខែកុម្ភៈ ឆ្នាំ២០២០ នៅតាមបណ្តោយផ្លូវលេខ២០១១ ក្រុមទី២ ស្ថិតក្នុងភូមិច្រេស សង្កាត់គោកឃ្លាង ខណ្ឌសែនសុខ ។
បើតាមនគរបាលមូលដ្ឋានបានឱ្យដឹងថា អគ្គិភ័យនេះបានឆាបឆេះចេញពីផ្ទះមួយខ្នងធ្វើពីថ្មក្រោម ប្រក់ស័ង្កសីទំហំទទឹងប្រវែង៦ម៉ែត្រគុណ៨ម៉ែត្រ ដែលមានម្ចាស់ឈ្មោះ ចាប នាង ភេទស្រី អាយុ៦០ឆ្នាំ មុខរបរជាកម្មករ ហើយភ្លើងនេះបានឆេះរាលដាលទៅលំនៅឋានចំនួន៣ខ្នងទៀតដែលនៅជាប់គ្នានោះ។
ប្រភពដដែលបន្តឱ្យដឹងថា នៅមុនពេលកើតហេតុ ម្ចាស់ផ្ទះដើមភ្លើងបានចាក់សោរទុកចោល ស្រាប់តែឮស្នូរសម្លេងផ្ទុះ ហើយភ្លើងក៏បានឆាបឆេះយ៉ាងសន្ធោសន្ធៅតែម្តង ថែមទាំងឆេះរាលដាល់ទៅលំនៅឋានចំនួន៣ខ្នងទៀតដែលនៅជាប់ៗគ្នាយ៉ាងឆាបរហ័ស។ នៅក្នុងហេតុការណ៍នេះ បង្កឱ្យមានការភ្ញាក់ផ្អើលដល់អាជ្ញាធរ និងនគរបាលហៅរថយន្តពន្លត់អគ្គិភ័យចំនួន៨គ្រឿងទៅអន្តរាគមន៍ ហើយភ្លើងបានរលត់ទៅវិញនៅម៉ោងប្រមាណ៥និង៣០នាទីល្ងាចថ្ងៃដដែល ។
តាមនគរបាលមូលដ្ឋាន ក៏ដូចជានគរបាលការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញបានឱ្យដឹងថា អគ្គិភ័យនេះ បណ្តាលមកពីទុស្សេចរន្តអគ្គិសនី ។ ហើយលំនៅឋានចំនួន៤ខ្នងត្រូវបានអគ្គិភ័យឆាបឆេះ ដោយក្នុងនោះមាន៣ខ្នងរងការខូចខាតទាំងស្រុង និង១ខ្នងទៀតត្រូវភ្លើងឆេះអស់ប្រមាណ៥០ភាគរយ។ ក្នុងគ្រោះអគ្គិភ័យនេះ ពុំបណ្តាលឱ្យមនុស្សរងរបួសឡើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ