រាជធានីភ្នំពេញ ៖ សេដ្ឋកិច្ចកម្ពុជាក្នុងឆ្នាំ ២០២០នេះ អាចនឹងមិនរលូនល្អដូចកាលពីឆ្នាំមុនៗទៀត ឬយ៉ាងណា ខណៈវិស័យសំខាន់ៗចំនួនបី ដែលធ្លាប់គាំទ្រដល់កំណើនសេដ្ឋកិច្ចកម្ពុជាកន្លងមកកំពុងជួបបញ្ហាដូចគ្នា ក្នុងនោះ រួមមានវិស័យទេសចរណ៍…
រាជធានីភ្នំពេញ ៖ សេដ្ឋកិច្ចកម្ពុជាក្នុងឆ្នាំ ២០២០នេះ អាចនឹងមិនរលូនល្អដូចកាលពីឆ្នាំមុនៗទៀត ឬយ៉ាងណា ខណៈវិស័យសំខាន់ៗចំនួនបី ដែលធ្លាប់គាំទ្រដល់កំណើនសេដ្ឋកិច្ចកម្ពុជាកន្លងមកកំពុងជួបបញ្ហាដូចគ្នា ក្នុងនោះ រួមមានវិស័យទេសចរណ៍ ការនាំចេញទៅកាន់សហភាពអឺរ៉ុប និងវិស័យសំណង់ ។
បើតាមការបញ្ជាក់ពីលោកវង្សី វិស្សុត រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ថ្លែងក្នុងវេទិកាសាធារណៈកាលពីព្រឹកថ្ងៃទី ៣០ ខែមករា ឆ្នាំ២០២០ នៅទីស្ដីការក្រសួង បានអោយដឹងថា ក្នុងឆ្នាំ ២០២០នេះ វិស័យទេសចរណ៍ ដែលគាំទ្រដល់កំណើនសេដ្ឋកិច្ចនោះ កំពុងជួបទុក្ខធ្ងន់ ខណៈជំងឺដែលបង្កឡើងដោយវីរុសកូរ៉ូណា មានប្រភពពីប្រទេសចិន ។ ការផ្ទុះជំងឺនេះ មិនមែនបណ្ដាលអោយតែកម្ពុជាទេដែលត្រូវជួបគ្រោះនោះ ពោលគឺពិភពលោកទាំងមូល ព្រោះចិនមានប្រជាជនច្រើនដែលត្រូវហៅចេញពីប្រទេសខ្លួនទៅ
ទស្សនានៅប្រទេសផ្សេងៗ ។លោកបានបន្តថា វិស័យទេសចរណ៍មានចំណែកប្រមាណ១៣ភាគរយនៃផលិតផលជាតិសរុប (GDP) ដូច្នេះ បើសិនជាវាមានបញ្ហាវានឹងប៉ះពាល់ដល់អ្នកដែលធ្លាប់ទទួលបានប្រយោជន៍ពីឧស្សាហកម្មនេះ ។
លោកវង្សី វិស្សុត បានមានប្រសាសន៍បន្ថែមថា «អ្វីដែលត្រូវធ្វើដើម្បីទប់ទល់នឹងបញ្ហានេះ ក្រសួងទេសចរណ៍ត្រូវរកវិធីផ្សព្វផ្សាយ និងកែលម្អ តំបន់ទេសចរណ៍សំខាន់ៗ ជាក់ស្ដែង សៀមរាប ជាប៉ូលសំខាន់ក្នុងការទាក់ទាញទេសចរ ក៏ប៉ុន្តែក្នុងខេត្តសៀមរាបហាក់មិនមានការកែច្នៃអ្វីបន្ថែមទៀតនោះឡើយ ។ ការមិនកែលម្អ ច្នៃប្រឌិតថ្មីនេះហើយ ធ្វើអោយភ្ញៀវទេសចរដែលមកសៀមរាបហើយមិនចង់មកម្ដងទៀត ដោយសារតែវាដដែល » ។
លោកបានផ្ដល់ជាយោដល់ដល់វិស័យនេះគួរតែកែលម្អថ្មីទៅលើតំបន់បួនក្នុងខេត្តសៀមរាប រួមមាន តំបន់អង្គរ រមណីយដ្ឋានគូលេន ភ្នំក្រោម និងទីប្រជុំជនក្នុងនៃទីក្រុងសៀមរាប ដូចជាផ្សាររាត្រីក្រុងសៀមរាប និងទីប្រជុំជន ក្នុងតំបន់នោះ ត្រូវរៀបចំអោយបានស្អាតបាត ។ ពាក់ព័ន្ធនឹងការនាំចេញរបស់កម្ពុជា ក្នុងឆ្នាំ២០២០នេះ ក៏អាចនឹងជួបបញ្ហាមួយចំនួនផងដែរ ក្នុងពេលដែលប្រព័ន្ធអនុគ្រោះពន្ធគ្រប់មុខទំនិញលើកលែងតែសព្វាវុធ (Everything but Arms—BA) របស់សហភាពអឺរ៉ុបផ្ដល់មកកម្ពុជានៅមានភាពមិនទាន់ច្បាស់លាស់នៅឡើយ ហើយរដ្ឋាភិបាលក៏បានត្រៀមរួចជាស្រេច ដើម្បីទប់ទល់នឹងនឹងការដកឬព្យួរប្រព័ន្ធអនុគ្រោះពន្ធនេះពីកម្ពុជា ។ ការនាំចេញរបស់កម្ពុជានាឆ្នាំ ២០១៩ និងឆ្នាំ ២០២០នេះ គឺពឹងលើទីផ្សារអឺរ៉ុបនិងសហរដ្ឋអាមេរិក ហើយបើសិនជាអឺរ៉ុបដកប្រព័ន្ធអនុគ្រោះពន្ធចេញនោះ មិនមែនមានន័យថាកម្ពុជាមិនអាចនាំចេញទៅអឺរ៉ុបបាននោះទេ តែកម្ពុជា នឹងត្រូវបង់ពន្ធទៅសហភាពអឺរ៉ុបរាល់ការនាំចូលទំនិញទៅកាន់ទីផ្សារនេះ ។
លោកវង្សី វិស្សុត ក៏បានបញ្ជាក់ថាកម្ពុជាបានត្រៀមថវិកាប្រមាណ៣ភាគរយនៃ GDP ដើម្បីទប់ទល់នឹងការប្រព័ន្ធអនុគ្រោះពន្ធ EBA ពីសហភាពអឺរ៉ុប ។ ហើយកម្ពុជានៅតែមានសុទិដ្ឋិនិយមចំពោះការនាំចេញ ហើយកម្ពុជានឹងស្វែងរកទីផ្សារថ្មីៗបន្ថែមទៀតសម្រាប់ផលិតផលនិងទំនិញពីកម្ពុជា ។ លោកបានបន្ថែមថា « យើងមិនអាចបដិសេធថាមិនប៉ះពាល់នោះទេ ចំពោះការនាំចេញរបស់កម្ពុជា ហើយបើសិនជាអឺរ៉ុបដកប្រព័ន្ធអនុគ្រោះពន្ធនេះ ពីកម្ពុជាមែននោះ យើងប៉ាន់ប្រមាណថានឹងអាចបាត់បង់ការងារចំពោះពលរដ្ឋខ្មែរប្រមាណ៣ម៉ឺន៥ពាន់នាក់ » ។
សម្រាប់វិស័យសំណង់ដែលគាំទ្រដល់កំណើនសេដ្ឋកិច្ចកម្ពុជា និងជាវិស័យសំខាន់ក្នុងការអភិវឌ្ឍប្រទេសកម្ពុជានោះ ត្រូវបានព្យាករណ៍ថាមានហានិភ័យខ្ពស់ ផងដែរ ដោយសារតែប្រភពវិនិយោគទុនក្នុងវិស័យនេះ មកពីប្រទេសចិនហើយក្នុងពេលចិនកំពុងផ្ទុះជំងឺបង្កដោយវីរុសកូរ៉ូណានោះ រដ្ឋាភិបាលចិនបានហាមប្រាណជនជាតិខ្លួនចេញចូលក្រៅប្រទេសមួយរយៈ ដូច្នេះហើយដែលជាហានិភ័យខ្ពស់មួយ ក្នុងការទាក់ទាញប្រភពទុនពីប្រទេសនេះមកកាន់កម្ពុជាក្នុងវិស័យសំណង់ ។ លោកវង្សី វិស្សុត បានបន្ថែមថា វិស័យសំណង់ក្នុងឆ្នាំកន្លងមកគឺបានផ្ទុះងើបខ្លាំងពេក ដែលជាហានិភ័យមួយសម្រាប់ការទប់ទល់នឹងកំណើននេះ ។
ស្ថាប័នអន្តរជាតិមួយចំនួន ដូចជា ធនាគារពិភពលោក ធនាគារ អភិវឌ្ឍន៍អាស៊ី ក៏បានផ្ដល់ជាទស្សនដោយព្រមានពីការថមថយ កំណើននៃវិស័យសំណង់នេះដែរ ដោយជំរុញអោយធនាគាររឹតបន្តឹងចំពោះការផ្ដល់ឥណទានទៅលើវិស័យសំណង់ និងអចលនទ្រព្យ ៕ កែសម្រួលដោយ ៖ សុឃាក់
ចែករំលែកព័តមាននេះ