ខេត្តប៉ៃលិន ៖ បើអ្នកទេសចរចង់ទៅលេងទឹកជ្រោះអូរតាវៅ ហៅភ្នំខៀវ គឺចេញពីទីរួមខេត្តចម្ងាយប្រមាណ៧ទៅ៨គីឡូម៉ែត្រ ដោយធ្វើដំណើរតាមដងផ្លូវជាតិលេខ៥៧ ឆ្ពោះទៅទិសខាងត្បូង ស្ថិតក្នុងភូមិខ្លុង សង្កាត់អូរតាវៅ ក្រុងប៉ៃលិន ខេត្តប៉ៃលិន ។ ដងផ្លូវអមដោយផ្ទះប្រជាពលរដ្ឋ និងចម្ការដំណាំដាំដុះដូចជា ពោត ដំឡូងមី ដើមស្វាយកែវរមៀត និងដំណាំធុរ៉េនជាដើម ។
បើគេបើកបរម៉ូតូ ឬរថយន្តរហូតទៅដល់កៀកនឹងកន្លែងឡើងលេងទឹកធ្លាក់ ហើយក្រឡេកមើលទេសភាពព្រៃភ្នំ គឺឃើញពណ៌ខៀវស្រងាត់គួរឱ្យទាក់ទាញដួងចិត្ត និងធ្វើឱ្យអារម្មណ៍ស្រស់ស្រាយបាត់អស់ទុក្ខកង្វល់ទាំងពួង ។ ពេលទៅដល់មាត់ច្រកទ្វារ សូមកុំភ្លេចបង់ប្រាក់ថ្លៃសំបុត្រចូលទស្សនា ឬលេង ទឹកជ្រោះ ម៉ូតូ១គ្រឿង៣០០០រៀល រថយន្តតូច១០០០០រៀល រថយន្តទួរីសទេសចរណ៍១៥០០០រៀល រថយន្តក្រុង២៥០០០រៀល និងភ្ញៀវទេសចរបរទេសម្នាក់១ដុល្លារ។ ដោយឡែកភ្ញៀវទេសចរខ្មែរអត់តម្រូវឲ្យបង់ប្រាក់ចូលទៅលេងទេ ដោយគ្រាន់តែបង់ថ្លៃម៉ូតូប៉ុណ្ណោះ ។
បើតាមការរៀបរាប់ពីយុវជនឈីវ វ៉ាន់ណែត ភេទប្រុស អាយុ២៥ឆ្នាំ ជាមេការលក់ដូរប្រចាំរមណីយដ្ឋានទឹកធ្លាក់អូរតាវៅហៅភ្នំខៀវកាលពីពេល ថ្មីៗកន្លងមកឱ្យដឹងថា ពួកគេជួលកន្លែងគេលក់ដូរនៅក្នុងរមណីយដ្ឋាន ដោយថ្ងៃធម្មតាជួនកាលមានភ្ញៀវច្រើន ជួនកាលមានតិចតួច ថ្ងៃខ្លះមានភ្ញៀវ៥ទៅ៦រថយន្ត ថ្ងៃសៅរ៍-អាទិត្យចុងសប្តាហ៍មាន១០ទៅ២០រថយន្ត ដោយសារភ្ញៀវនាំគ្នាទៅលេងតាមរមណីយដ្ឋានផ្សេងទៀតនៅក្នុងក្រុងប៉ៃលិន ។
ចំណែកនៅរដូវបុណ្យទានវិញ មានភ្ញៀវទេសចរចូលទៅលេងជាច្រើនកុះករ មានរថយន្តចាប់ពី៥០ទៅ៦០រថយន្ត និងរាប់រយផងដែរពីតាមបណ្តាខេត្តនានា ដូចជាបន្ទាយមានជ័យ បាត់ដំបង សៀមរាប ពោធិ៍សាត់ និងរាជធានីភ្នំពេញ ។
ប្រភពដដែលបន្តថា ម្ហូបអាហារនៅរមណីយដ្ឋានមួយនេះ ថ្ងៃធម្មតាក៏ដូចជាថ្ងៃបុណ្យទានដែរ គឺតម្លៃមិនប្រែប្រួលឡើយ ដូចជា មាន់ស្រែដុត១ក្បាលតម្លៃ៥០០០០រៀល ត្រីដុតក្រវាញ ៣០០០០រៀល ត្រីបំពង៣០០០០រៀល ។
ចំណែកឆាក្តៅសាច់គោ និងសាច់មាន់ ឆាក្រវាញសាច់គោ និងសាច់មាន់ ឆាព្រៃសាច់គោ និងសាច់មាន់ ឆាង៉ាំង៉ូវសាច់មាន់ ឆាខ្ញីសាច់មាន់ ឆាកែងសាច់គោ និងសាច់មាន់ ឆាឆ្អឹងជំនីរជ្រូកជូរអែម ឡុកឡាក់សាច់គោ ឆាបន្លែគ្រប់មុខសាច់គោ លីងមាន់អំបិលម្ទេស ពងទាត្រីប្រមា ឆាដើមប្រមោយដំរីសាច់គោ សម្លម្ជូរមិត្តភាពសាច់ត្រី ស្ងោរង៉ាំង៉ូវមាន់ តុងយ៉ាំសាច់មាន់ ស្ងោរជ្រក់សាច់មាន់ និងត្រី សម្លម្ជូរគ្រឿងក្រវាញសាច់គោ សម្លម្ជូរគ្រឿងសាច់គោ និងមាន់ សម្លម្ជូរព្រៃសាច់គោ និងមាន់ សម្លម្ជូរស្រែត្រី សាច់គោអាំងអំបិលម្ទេស សាច់មាន់អាំងអំបិលម្ទេស ភ្លាសាច់គោ ឡាបសាច់គោ ញាំស្វាយបង្គារក្រៀម ញាំស្វាយត្រីឆ្អើរ បុកសណ្តែកត្រីឆ្អើរ បុកសណ្តែកសាច់គោ ខាត់ណាទឹកភ្នែកសាច់គោ ទាំងអស់នេះត្រឹមតែតម្លៃ២៥០០០រៀលក្នុង១ចានប៉ុណ្ណោះ ។
ក្រៅពីនេះមានម្ហូបខាត់ណាប្រេងខ្យង ឆាបន្លែគ្រប់មុខ បាយឡុកឡាក់សាច់គោ ១ចានត្រឹមតែ១៥០០០រៀល ក៏មានបុកល្ហុងក្តាមប្រៃ ១ចាន៥០០០រៀល បុកមឹក១ចាន៥០០០រៀល បាយឆាសាច់គោ បាយឆាសាច់ជ្រូក១ចាន៧០០០រៀល បាយឆាផាត់កាផាវ១ចាន១០០០០រៀល និងបាយឆាម្រះព្រៅ១ចាន៧០០០រៀល ។ ម្ហូបដែលពិសេស ពេញនិយម និងលក់ដាច់ជាងគេបំផុតនៅក្នុងរមណីយដ្ឋាននេះ គឺសម្លម្ជូរដើមចេកព្រៃសាច់ត្រី និងញាំចេកព្រៃសាច់មាន់ ១ចាន២៥០០០រៀល ។
ចំពោះម៉ូតូ ឬរថយន្តដែលភ្ញៀវទេសចរជិះទៅលេងរមណីយដ្ឋាននេះ មិនធ្លាប់មានបាត់ ឬមានករណីគ្រោះថ្នាក់ចរាចរណ៍កើតឡើងនោះឡើយ ព្រោះមានសន្តិសុខឈរចាំយាមតាំងពីមុខផ្លូវចូលរហូតដល់កន្លែងលេង ។ នៅរដូវបុណ្យទានមាននគរបាលផ្នែកទេសចរណ៍ជួយសម្រួលដល់ភ្ញៀវរហូតដល់ចប់ថ្ងៃបុណ្យ ។ ត្រូវបង់ប្រាក់ថ្លៃភ្ញៀវម៉ូតូ១គ្រឿង២០០០រៀល និងរថយន្ត១គ្រឿង៣០០០រៀល ដើម្បីឱ្យសន្តិសុខការពារ ខណ:ចូលទៅលេងទឹកជ្រោះ។
ប្រភពដដែលបញ្ជាក់ថាផ្លូវមានលក្ខណ:ធំទូលាយជាងមុន តែហុយបន្តិច ព្រោះអាជ្ញាធរឈូសឆាយអស់រយ:ពេលជិត១ឆ្នាំមកហើយ ។ ផ្លូវហុយពេលរាំងស្ងួត និងរអិលបន្តិចពេលមានភ្លៀងធ្លាក់ ។
បើតាមស្ត្រីឈ្មោះហន ហឿន អាយុ៥៩ឆ្នាំ ជាអ្នកដាំបាយលក់ឱ្យដឹងថា គាត់ធ្វើការរយៈពេល១ឆ្នាំមកហើយ បើថ្ងៃធម្មតាគាត់ដាំបាយក្នុង១ថ្ងៃដាច់អស់ត្រឹម១០ទៅ២០កំប៉ុង តែបើថ្ងៃបុណ្យវិញលក់ដាច់៦០ទៅ៨០កំប៉ុង និងរហូតដល់១០០កំប៉ុងក៏មានដែរ ។
លោកលឹម វាសនា ប្រធានមន្ទីរទេសចរណ៍ខេត្តប៉ៃលិន ឱ្យដឹងថា ទឹកធ្លាក់អូរតាវៅ នាពេលបច្ចុប្បន្នកំពុងអភិវឌ្ឍ ដោយពង្រីកផ្លូវធំ ជាងមុន ហើយអាជ្ញាធរខេត្តមានគម្រោងក្រាលកៅស៊ូសម្រាប់បង្កភាពងាយស្រួលដល់ភ្ញៀវទេសចរធ្វើដំណើរ ។ កាលពីមុនរមណីយដ្ឋាននេះគ្រប់គ្រងដោយក្រមហ៊ុនឯកជន តែរហូតដល់បច្ចុប្បន្នហួសសុពលភាព ហើយត្រូវខេត្តយកមកវិញ ត្រៀមដាក់ដេញថ្លៃឱ្យក្រុមហ៊ុនឯកជនផ្សេងចូលគ្រប់គ្រងដើម្បីបន្តអភិវឌ្ឍយកថវិកាចូលជាតិ ៕ (កែសម្រួលដោយ ៖ បុប្ផា)
ចែករំលែកព័តមាននេះ