ខេត្តតាកែវ ៖ អ្នកធ្វើដំណើរឆ្លងកាត់ផ្សារកំពង់ជ្រៃ ឆ្ពោះទៅស្រុកកោះអណ្តែត ក៏ដូចជាស្រុកគីរីវង់បាននិយាយរិះគន់ចំពោះមេភាស៊ីផ្សារកំពង់ជ្រៃថា បានយកដីផ្លូវទៅធ្វើអាជីវកម្មធ្វើអោយរញ៉េរញ៉ៃកកស្ទះចរាចរណ៍ជារៀងរាល់ថ្ងៃពិបាកបើកបរឆ្លងកាត់មែនទែន ហើយបញ្ហានេះមានច្រើនឆ្នាំមកហើយដែរ ដោយអស់លោកមិនបានខ្វល់ពីបញ្ហាគ្រោះថ្នាក់ចរាចរណ៍កើតឡើងជាយថាហេតុឡើយ។
ជាក់ស្តែងនៅវេលាម៉ោង៩និង៣០នាទីព្រឹកថ្ងៃទី៣១ ខែមករា ឆ្នាំ២០២០ តាមបណ្តោយផ្លូវខេត្តលេខ១២៩D ចន្លោះបង្គោលគីឡូម៉ែត្រលេខ ១និងលេខ២ ស្ថិតក្នុងភូមិកំពង់ជ្រៃ ឃុំស្មោង ស្រុកទ្រាំង ខេត្តតាកែវ។
នគរបាលចរាចរណ៍ស្រុកទ្រាំងបានអោយដឹងថា គ្រោះថ្នាក់ចរាចរណ៍នេះបង្កឡើងដោយ រថយន្តដឹកទាមួយគ្រឿង ម៉ាកហ៊ីយ៉ាន់ ពណ៌ស ពាក់ស្លាកលេខ ភ្នំពេញ ៣D-១៥៤៧ ដោយសារគេចពីអ្នកដើរឆ្លងថ្នល់បានបើកមកបុករះ បណ្តាលឲ្យបុរសម្នាក់រងរបួសបាក់ជើងម្ខាង ។
តាមប្រភពដដែលបានបន្តថា មុនពេលកើតហេតុ គេបានឃើញរថយន្តដឹកសត្វទាមួយគ្រឿង អ្នកបើកបរមិនស្គាល់អត្តសញ្ញាណបានបើកមកពីទិសខាងកើតទៅលិច លុះមកជិតដល់ផ្សារកំពង់ជ្រៃ ស្រាប់តែកាច់ចង្កូតគេចអ្នកដើរឆ្លងថ្នល់ទៅបុករះ បណ្តាលអោយប៉ះរថយន្តហាយឡែនឌ័រមួយគ្រឿងខ្ទេចគូថខាងក្រោយ និងកង់បីឥណ្ឌាមួយគ្រឿងខ្ទេចអស់ទាំងស្រុង និងរ៉ឺម៉កកង់បីចំនួន២គ្រឿងទៀតក៏ត្រូវរងការខូចខាតផងដែរ ដែលឈប់នៅចិញ្ចើមថ្នល់ពីខាងកើតផ្សារ ហើយបានបណ្តាលឲ្យបុរសម្នាក់អង្គុយលើកង់បីឥណ្ឌារងរបួសបាក់ជើងខាងស្តាំម្ខាង។
ក្រោយកើតហេតុ អ្នកបើកបររថយន្តបានរត់គេចខ្លួនបាត់ស្រមោល ដោយបន្សល់ទុករថយន្តនៅកន្លែងកើតហេតុ។
នគរបាលស្រុកបានបញ្ជាក់ថា ក្រោយពេលកើតហេតុ រថយន្តបង្ក និងរ៉ឺម៉កកង់បីឥណ្ឌា ព្រមទាំងរ៉ឺម៉កកង់បីចំនួន២គ្រឿងទៀតត្រូវបានបញ្ជូនយកមកដោះស្រាយគ្នានៅអធិការដ្ឋាននគរបាលស្រុកទ្រាំង ៕ (កែសម្រយលដោយ ៖ ធីតា)
ចែករំលែកព័តមាននេះ