ខេត្តកំពត ៖ មហាជនកំពុងសង្ស័យថា មន្ត្រីប៉ូលិសពាក់សក្តិ៤កន្លះ ឈ្មោះ កែវ មុន្នី ហៅផុក មានតួនាទីប្រធានការិយាល័យសន្តិសុខឯកជននៃស្នងការដ្ឋាននគរបាលខេត្តកំពត កំពុងរត់ការខ្វែងដៃខ្វែងជើងដោយពឹងពាក់លើស្ថាប័នច្បាប់…
ខេត្តកំពត ៖ មហាជនកំពុងសង្ស័យថា មន្ត្រីប៉ូលិសពាក់សក្តិ៤កន្លះ ឈ្មោះ កែវ មុន្នី ហៅផុក មានតួនាទីប្រធានការិយាល័យសន្តិសុខឯកជននៃស្នងការដ្ឋាននគរបាលខេត្តកំពត កំពុងរត់ការខ្វែងដៃខ្វែងជើងដោយពឹងពាក់លើស្ថាប័នច្បាប់ ដើម្បីប្តឹងយកដីរបស់ប្រជាពលរដ្ឋមួយគ្រួសារ ដែលរស់នៅក្នុងភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត។
ទាក់ទិននឹងករណីនេះ បើតាមការបញ្ជាក់ពីភាគីម្ចាស់ដី ឈ្មោះ ឆាយ ផាន់នី ហៅនាង រស់នៅក្នុងភូមិឃុំខាងលើបានរៀបរាប់ប្រាប់អ្នកយកពត៌មានថា ដីដែលលោកប៉ូលិសថ្លើមធំ ឈ្មោះ កែវ មុន្នី ហៅផុក កំពុងប្តឹងទាមទារយកនេះមានទំហំដី៥ហិកតា ស្ថិតជាប់នឹងជើងភ្នំបូកគោ ក្នុងភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត។
លោក ឆាយ ផាន់នី ហៅនាង បានបញ្ជាក់ផងដែរថា ដីនេះគាត់រស់នៅអាស្រ័យផលតាំងពីឆ្នាំ១៩៩៨មកម្ល៉េះ ហើយកាលណោះគាត់បានទិញបន្តពីឈ្មោះ លឹម មូជ ដោយការទិញដីនេះក៏ទទួលស្គាល់ពីអាជ្ញាធរមូលដ្ឋានផងដែរ ។ ម្ចាស់ដីបានបន្តថា គាត់រស់នៅអាស្រ័យផលលើដីនេះ២១ឆ្នាំមកហើយ ពុំដែលមានអ្នកណាមកបង្កបញ្ហាឡើយ ។
ម្ចាស់ដីបានបន្តថា ឈ្មោះកែវ មុន្នី ហៅផុកនេះក៏មានដីជាប់ព្រំប្រទល់គ្នាជាមួយដីរបស់គាត់ដែរ នៅពេលនោះពួកគាត់ទាំងពីរនាក់ក៏មិនដែលមានពាក្យសំដីធំតូចដាក់គ្នានោះទេ សូម្បីតែដីរបស់ឈ្មោះកែវ មុន្នី ហៅផុកដែលទិញពីប្រជាជនដែលមានព្រំប្រទល់ជាប់គ្នានេះក៏សុទ្ឋតែព្រៃទាំងអស់ហើយ ពេលនោះបានជួលរូបគាត់ឲ្យជួយឈូសឆាយទៀតផងដោយរស់នៅជិតគ្នាល្អូកល្អើនគ្មានដែលទំនាស់គ្នារឿងដីធ្លីដែលមានព្រំជាប់គ្នានោះឡើយ ហើយពិសេសជាងនេះទៅទៀត លោកកែវ មុន្នី ហៅផុកកាលពីមុនឡើយរាប់អានគ្នាហូបបាយហូបទឹកតែជាមួយគាត់ទេ។
ម្ចាស់ដីបានបន្តថា ស្រាប់តែពេលនេះលុះហាងឆេងដីមានតម្លៃ ស្រាប់តែលោកប៉ូលិសស័ក្តិ៤កន្លះ ឈ្មោះ កែវ មុន្នី ហៅផុក ដែលគាត់មានដីជាប់ព្រំប្រទល់គ្នា មិនដឹងសំអាងទៅលើអ្វីបែរជាមកប្តឹងទាមទារយកដីគាត់ ដែលមានទំហំ៥ហិកតាមានព្រំប្រទល់ជាប់គ្នាដើម្បីយកធ្វើជាសម្បត្តិផ្ទាល់ខ្លួនទៅវិញ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព៕ (កែសម្រួលដោយ ៖ ធីតា)
ចែករំលែកព័តមាននេះ