រាជធានីភ្នំពេញ ៖ សំណង់អគារដ៏ធំស្គឹមស្គៃមានតម្លៃខ្ទង់លានដុល្លារ ត្រូវបានអ្នកមានស្តុកស្តម្ភទិញវាយកម្ទេចចោលរាបដល់ដីហើយ នឹងកំពុងតែដឹកដែកយកទៅលក់ឱ្យអេតចាយ។ ការវាយកម្ទេចសំណង់អគារនេះ ត្រូវបានគេដឹងថា ដោយសារតែអគារនេះខុសហុងស៊ុយ ម្យ៉ាងទៀតម្ចាស់ក្រោយទិញដើម្បីពង្រីកភូមិគ្រឹះរបស់ខ្លួន ។…
រាជធានីភ្នំពេញ ៖ សំណង់អគារដ៏ធំស្គឹមស្គៃមានតម្លៃខ្ទង់លានដុល្លារ ត្រូវបានអ្នកមានស្តុកស្តម្ភទិញវាយកម្ទេចចោលរាបដល់ដីហើយ នឹងកំពុងតែដឹកដែកយកទៅលក់ឱ្យអេតចាយ។ ការវាយកម្ទេចសំណង់អគារនេះ ត្រូវបានគេដឹងថា ដោយសារតែអគារនេះខុសហុងស៊ុយ ម្យ៉ាងទៀតម្ចាស់ក្រោយទិញដើម្បីពង្រីកភូមិគ្រឹះរបស់ខ្លួន ។
សំណង់ដែលត្រូវវាយកម្ទេចនោះមានទំហំប្រមាណជិត២០ម៉ែត្រគុណនឹងជិត៣០ម៉ែត្រ មានកំពស់ប្រមាណ៧ជាន់កន្លះ ស្ថិតនៅតំបន់អភិវឌ្ឍន៍ ឬស្សីកែវ ក្នុងភូមិស្ពានខ្ពស់ សង្កាត់គីឡូមែត្រលេខ ៦ ខណ្ឌឬស្សីកែវហើយ ត្រូវបានគេជួលវាយកម្ទេចក្នុងតម្លៃ៣ម៉ឺនដុល្លារ។
តាមក្រុមជំនាញខាងបំផ្លាញ និងកម្មករបានឱ្យដឹងថា ការវាយកម្ទេចសំណង់នេះអស់រយៈពេលប្រមាណជិត២ខែ ហើយទើបរួច កាលពីមុនថ្ងៃចូលឆ្នាំចិនប៉ុន្មានថ្ងៃប៉ុណ្ណោះ។ ចំណែកគ្រឹះនៃសំណង់ពុំទាន់បានកាយចេញនៅឡើយ ។
នៅព្រឹកថ្ងៃទី៣១ ខែមករា ឆ្នាំ ២០២០ នេះ គេឃើញ ក្រុមហ៊ុន ដែលស៊ីឈ្មួលវាយសំណង់នោះ កំពុងតែដឹកដែកយកទៅលក់ឱ្យអេតចាយ ។ ខណៈពេលនោះ អ្នកយកព័ត៌មានកោះសន្តិភាព បានទៅថតរូបភាពផ្សាយបន្ត ស្រាប់តែខាងក្រុមហ៊ុនវាយសំណង់នោះបានថតរូបភាព ភ្នាក់ងារកោះសន្តិភាពវិញ មិនដឹងជាមានចេតនាណាមួយនោះទេ?
គួរបញ្ជាក់ថា សំណង់ប្រាក់លានដុល្លារនោះមានកម្ពស់៧ជាន់កន្លះ ធ្វើមិនទាន់រួចរាល់នោះទេ ត្រូវបានវាយកម្ទេចចោលវិញ បង្កឱ្យមានការងឿងឆ្ងល់ពីអ្នកដំណើរ និងបានចោទសួរថា មូលហេតុអ្វីបានជាវាយកម្ទេចសំណង់រាប់លានដុល្លារចោលគួរឱ្យស្តាយណាស់?
សំណង់នោះសាងសង់ប្រមាណជាង១ឆ្នាំមកហើយ ដែលការសាងសង់បានជាគ្រោង និងរៀបឥដ្ឋរួចរាល់បាន២ជាន់ក្រោម តែមិនទាន់បូកនោះទេ។ ដោយសារតែសំណង់នោះខ្ពស់ ហើយ នៅអែបភូមិគ្រឹះគេពេក ទើបម្ចាស់ភូមិគ្រឹះនោះទិញវាយកម្ទេចចោល ដើម្បីយកហុងស៊ុយ និងពង្រីកដីរបស់ខ្លួនដែលមានស្រាប់ទំហំប្រមាណជិត១ហិតតាទៅហើយនោះ។ ទោះបីជាយ៉ាងណា មានព័ត៌មានខ្លះបានអះអាងថា ភូមិគ្រឹះនោះ លក់ឱ្យបរទេសហើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ