រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃបានថ្លែងថាការផ្តល់ស្នាមញញឹម និងកាយវិការទន់ភ្លន់ប្រកបដោយភាពរាក់ទាក់របស់មន្ត្រីតាមច្រកព្រំដែនស្មើនឹងផ្ញើសារដ៏ល្អរបស់កម្ពុជាទៅកាន់ជនបរទេសជាច្រើន ។ សម្តេច ស ខេង បានថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារ ឆ្នាំ២០២០ របស់អគ្គនាយកដ្ឋានអន្ដោប្រវេសន៍ នៅរសៀលថ្ងៃទី៣០ ខែមករានេះ នៅទីស្តីការក្រសួងបានគាំទ្រពេញទំហឹងចំពោះគោលការណ៍របស់អគ្គនាយកដ្ឋានអន្តោប្រវេសន៍ដែលណែនាំឱ្យមន្ត្រីអន្តោប្រវេសន៍គ្រប់រូបអនុវត្តនូវពាក្យស្លោក «ផ្តល់សេវាដោយស្នាមញញឹម» ។
សម្ដេចបានបន្តថា ការផ្តល់សេវាស្នាមញញឹមនេះជាការចូលរួមយ៉ាងប្រពៃក្នុងការអនុវត្តគោលនយោបាយស្រូបទាញទេសចរណ៍របស់ជាតិ និងអន្ដរជាតិ ព្រមទាំងស្របទៅនឹងគោលនយោបាយរបស់រាជរដ្ឋាភិបាល ដែលជម្រុញឱ្យគ្រប់ក្រសួងស្ថាប័នបន្តលើកកម្ពស់ការផ្តល់សេវាសាធារណៈ និងសេវារដ្ឋបាលជូនប្រជាពលរដ្ឋបានលឿនរហ័ស និងប្រកបដោយតម្លាភាព ។ ប្រមុខរដ្ឋមន្ត្រីក្រសួងមហាផ្ទៃបានគូសបញ្ជាក់យ៉ាងដូច្នេះថា ៖«នៅក្នុងសកម្មភាពជាក់ស្តែង ការផ្តល់ស្នាមញញឹម និងកាយវិការទន់ភ្លន់ប្រកបដោយភាពរាក់ទាក់របស់បងប្អូន ជាពិសេសមន្ត្រីដែលធ្វើការនៅតាមច្រកទ្វារ គឺមានន័យស្មើនឹងការផ្ញើសារដ៏ល្អរបស់កម្ពុជាទៅកាន់ជនបរទេសជាច្រើនទៀតដែលសារនោះនឹងជួយអន្ទងឱ្យពួកគេចង់មកឃើញមកស្គាល់មកទស្សនៈកិច្ចព្រះរាជាណាចក្រកម្ពុជាយើង» ។
ជាមួយគ្នានោះដែរ សម្ដេចក៏បានលើកឡើងថា ត្រូវបន្តលើកកម្ពស់តួនាទីជាកងកម្លាំងជួរមុខរបស់ប៉ុស្តិ៍ ច្រកទ្វារអន្តរជាតិ និងប៉ុស្តិ៍ច្រកទ្វារព្រំដែនអន្តរជាតិទាំងអស់ ក្នុងការបង្ការ រារាំងសមាសភាពអាក្រក់មិនទុកឱ្យពួកភេរវកម្ម មានលទ្ធភាពយកកម្ពុជាធ្វើជាទីជម្រក ដើម្បីលាក់ខ្លួនចាត់តាំងសកម្មភាពភេរវកម្ម ឧក្រិដ្ឋកម្មឆ្លងដែន គ្រប់ប្រភេទ ឬគេចពីសំណាញ់ច្បាប់ នៅប្រទេសក្រៅ ។ ឆ្លៀតឱកាសនោះដែរ សម្ដេចក្រឡាហោម ស ខេង ក៏បានផ្ដាំផ្ញើទៅមន្ត្រីនគរបាលច្រកទ្វារ ក្នុងការត្រួតពិនិត្យអ្នកដំណើរចេញ-ចូល ការរកឃើញឯកសារមិនប្រក្រតី និងបណ្តាមុខសញ្ញាផ្សេងៗក្នុងបញ្ជីខ្មៅអន្តោប្រវេសន៍ ដើម្បីវិនិច្ឆ័យដោះស្រាយប្រកបដោយប្រសិទ្ធភាពជាមួយនេះត្រូវលើកកម្ពស់ការប្រើប្រាស់ និងការថែទាំប្រព័ន្ធបច្ចេកវិទ្យាព័ត៌មាន ដែលក្រសួងបំពាក់ជូនឱ្យបានល្អប្រសើរ និងអស់លទ្ធភាព ដើម្បីមានទិន្ន័យគ្រប់គ្រាន់សម្រាប់ការវិភាគតាមដាន និងការដាក់ចេញនូវវិធានការចាំបាច់នានាទៅតាមសំណូមពរការងារជាក់ស្តែង ។
សម្ដេច ស ខេង បានសង្កត់ធ្ងន់ថា ៖«ចំពោះព្រះរាជាណាចក្រកម្ពុជាយើងពិតជាត្រូវការវត្តមានជនបរទេស និងចង់បានឱ្យចំនួនមានការកើនឡើងខ្ពស់ ប៉ុន្តែសមាសភាពដែលចង់បាននោះ គឺអ្នកទេសចរណ៍ពាណិជ្ជករ អ្នកវិនិយោគ និងអ្នកឯកទេសពិតប្រាកដ ដែលអាចជួយដល់ការអភិវឌ្ឍសេដ្ឋកិច្ចជាតិ និងការធ្វើឱ្យប្រសើរឡើងនូវជីវភាពរស់នៅរបស់ប្រជាពលរដ្ឋ» ។
ឆ្លៀតឱកាសនោះដែរ រដ្ឋមន្ដ្រីក្រសួងមហាផ្ទៃបញ្ជាក់ ថា ប៉ុន្តែទោះបីយ៉ាងណាក៏ដោយតាមការពិនិត្យឃើញថា មានកត្តាអសកម្មមួយចំនួនបង្កឡើងដោយជនបរទេសលើជនបរទេសក្នុងនោះមានករណីបាញ់សម្លាប់មនុស្ស ករណីឃាដកម្មចាប់ជម្រិតទារប្រាក់វាយតប់ ឆក់ប្លន់ បង្កឡើងនូវការបាត់បង់សណ្តាប់ធ្នាប់ និងក្តីបារម្ភក្នុងសង្គម ការប្រព្រឹត្តបទល្មើស VOIP Game Online ការចរាចរជួញដូរ និងប្រើប្រាស់គ្រឿងញៀន ការប្រកបមុខរបរដោយគ្មានសៀវភៅការងារ ការលួចជ្រៀតចូលដោយខុសច្បាប់ និងស្នាក់នៅហួសរយៈពេលកំណត់៕
ចែករំលែកព័តមាននេះ