ខេត្តបន្ទាយមានជ័យ ៖ ក្នុងឱកាសបិទសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡាខេត្តបន្ទាយមានជ័យឆ្នាំ២០១៨-២០១៩ និងលើកទិសដៅឆ្នាំសិក្សា២០១៩-២០២០ កាលពីរសៀលថ្ងៃទី៣០ ខែមករា ឆ្នាំ២០២០ នៅមន្ទីអប់រំយុវជននិងកីឡាខេត្តបន្ទាយមានជ័យ…
ខេត្តបន្ទាយមានជ័យ ៖ ក្នុងឱកាសបិទសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡាខេត្តបន្ទាយមានជ័យឆ្នាំ២០១៨-២០១៩ និងលើកទិសដៅឆ្នាំសិក្សា២០១៩-២០២០ កាលពីរសៀលថ្ងៃទី៣០ ខែមករា ឆ្នាំ២០២០ នៅមន្ទីអប់រំយុវជននិងកីឡាខេត្តបន្ទាយមានជ័យ លោក អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍លើកឡើថា កាលពីវេលាម៉ោង១០និង៣០នាទីព្រឹកថ្ងៃទី២៥ ខែមករា ឆ្នាំ២០២០ កន្លងទៅនេះ ជាថ្ងៃទី២នៃពិធីបុណ្យចូលឆ្នាំចិន-វៀតណាម ស្រាប់តែមានសិស្សានុសិស្សវិទ្យាល័យបន្ទាយឆ្មារវិលមុខដួលសន្លប់និងចុះពោះជាបន្តបន្ទាប់ចំនួន៣៥នាក់ (ស្រី២៦នាក់)ក្នុងនោះសិស្សមានចំនួន២៦នាក់ លោកគ្រូម្នាក់ និងលោកស្រីជំទប់ទី២ឃុំបន្ទាយឆ្មារម្នាក់ផងដែរ។
លោកអភិបាលខេត្តបានបញ្ជាក់ថា មូលហេតុដែលសិស្សានុសិស្សមានអាការៈវិលមុខដួលសន្លប់ និងចុះពោះជាបន្តបន្ទាប់បែបនេះប្រហែលជាមិនមែនមកពីពុលចំណីនេះទេ អាចបណ្តាលមកពីពុលបរិយាកាស និងអាកាសធាតុច្រើនជាង ព្រោះថាការពុលមិនមែនតែសិស្សទេ គឺមានលោកគ្រូម្នាក់ និងលោកស្រីជំទប់ទី២ឃុំម្នាក់ក៏មានអាការៈបែបនេះដែរ ។ ដូច្នេះលោកគ្រូអ្នកគ្រូ ត្រូវយកចិត្តទុកដាក់ចំពោះអនាម័យនិងបរិស្ថានជុំវិញអគារសិក្សាអោយល្អដើម្បីសុខភាពសិស្ស។
លោកអភិបាលខេត្តក៏បានដាស់តឿនរំលឹកដល់លោកគ្រូ អ្នកគ្រូ ក្រោយពេលត្រឡប់ទៅវិញ ត្រូវណែនាំអោយសិស្សពាក់ម៉ាស់ការពារឆ្លងជំងឺរលាកសួតប្រភេទថ្មី (កូរ៉ូណាវីរុស)ដែលឆ្លងតាមប្រព័ន្ធផ្លូវដង្ហើម ខណៈប្រទេសកម្ពុជាមិនទាន់កើតមានជំងឺប្រភេទនេះលើប្រជាពលរដ្ឋកម្ពុជាណាម្នាក់ឡើយ ហើយត្រូវណែនាំដល់សិស្សចេះអនាម័យមុនបរិភោគអាហារ ការពារឆ្លងមេរោគ ។ លោកគ្រូ អ្នកគ្រូត្រូវណែនាំសិស្សឱ្យប្រើប្រាស់ស្លឹកឈូក និងស្លឹកចេកខ្ចប់បាយមកហូបនៅសាលារៀន មិនត្រូវប្រើប្រាស់ថង់ប្លាស្ទិកឡើយ ដែលបណ្តាលឱ្យប៉ះពាល់ដល់បរិស្ថាន និងសុខភាព ៕ (កែសម្រួលដោយ ៖ ធីតា)
ចែករំលែកព័តមាននេះ