រាជធានីភ្នំពេញ ៖ វិស័យអន្តរាគមន៍វិទ្យុសាស្ត្រជាឯកទេសមួយក្នុងផ្នែកវេជ្ជសាស្ត្រដែលមានការរីកចម្រើនយ៉ាងខ្លាំងក្លាក្នុងរយៈពេល២ទសវត្សចុងក្រោយនេះ ។ របកគំហើញថ្មីៗក្នុងវិស័យវិទ្យុសាស្ត្រនេះ បានរួមចំណែកយ៉ាងសកម្មក្នុងការជួយអោយព្យាបាលជម្ងឺជាច្រើនអោយកាន់តែមានប្រសិទ្ធិភាពខ្ពស់ ប្រកបដោយហានិភ័យទាប និងការឈឺចាប់តិចតួច។
នេះជាការលើកឡើងរបស់លោកសាស្ត្រាចារ្យគង់ សន្យា អគ្គនាយករងមន្ទីរពេទ្យកាល់ម៉ែតក្នុងសិក្ខាសិលាដែលបានរៀបចំឡើងកាលពីរសៀលថ្ងៃទី៣០ ខែមករា ឆ្នាំ២០២០ នៅមន្ទីរពេទ្យកាល់ម៉ែត ដែលមានការអញ្ជើញចូលរួមពីថ្នាក់ដឹកនាំ សាស្ត្រាចារ្យ វេជ្ជបណ្ឌិតឯកទេសជាច្រើនរូបមកពីមន្ទីរពេទ្យកាល់ម៉ែត និងមន្ទីរពេទ្យថ្នាក់ជាតិនានា។
លោកសាស្ត្រាចារ្យ Vincent Vidal និងលោកវេជ្ជបណ្ឌិត Hak Jean-François ដែលជាវាគ្មិនកិត្តិយសមកពីសម្ព័ន្ធមន្ទីរពេទ្យនៃទីក្រុងMarseille សាធារណរដ្ចបារាំង បានធ្វើបទបង្ហាញយ៉ាងក្បោះក្បាយលើប្រធានបទចំនួន៤ ៖ បច្ចុប្បន្នភាព និងការវិវត្តិន៏នៃវិស័យអន្តរាគមន៍វិទ្យុសាស្ត្រ-អន្តរាគមន៍វិទ្យុសាស្ត្រ ក្នុងការបញ្ឈប់ការហូរឈាមក្នុងខ្លួន ដោយមិនចាំបាច់វះកាត់ (Embolisation pour les hémorragies post-traumatiques, post-opératoires, hémorragies de la délivrance…) ការព្យាបាលជំងឺមហារីកថ្លើម តាមរយៈការដុតដោយបច្ចេកទេស Ablation par radiofréquence (RFA) និងការបិទញ៉ុកសរសៃឈាម Chimio-embolisation trans-artérielle ។ បច្ចេកទេសចាក់បញ្ចូលស៊ីម៉ង់ត៍ទៅក្នុងឆ្អឹងកងខ្នងដែលស្រុត (Cimentoplastie vertébrale)។
លោកសាស្តរាចារ្យបានបញ្ជាក់ថា គោលដៅចំបងនៃសិក្ខាសិលានេះ គឺដើម្បីចែករំលែកអំពីការអភិវឌ្ឈន៍ នៃវិស័យអន្តរាគមន៍វិទ្យុសាស្ត្រ ព្រមទាំងលើកកំពស់ការយល់ដឹងពីសារសំខាន់ និងប្រសិទ្ធភាពរបស់បច្ចេកទេសថ្មីនេះក្នុងការព្យាបាលជម្ងឺផ្សេងៗ។ ក្រុមវេជ្ជបណ្ឌិតឯកទេសមន្ទីរពេទ្យកាល់ម៉ែត បានត្រៀមខ្លួន និងកំពុងខិតខំពាំនាំយកបច្ចេកទេសអន្តរាគមន៍វិទ្យុសាស្ត្រទាំងអស់នេះមកអនុវត្តដើម្បីលើកកំពស់គុណភាពថែទាំ និងព្យាបាលជូនប្រជាជនកម្ពុជាស្របទៅតាមស្តង់ដារអន្តរជាតិ៕ (កែសម្រួលដោយ ៖ ធីតា)
ចែករំលែកព័តមាននេះ