ប្រទេសស៊ីរី ៖ កងទ័ពស៊ីរីប្រកាសនាថ្ងៃទី២៩មករា ពីការវាយដណ្ដើមយកបានទីក្រុងយុទ្ធសាស្ត្រម៉ាអារេតអាល់ណូអូម៉ាន ក្រោយការទម្លាក់គ្រាប់បែកនិងការបាញ់ផ្លោងអស់ពេលជាច្រើនសប្ដាហ៍ លើតំបន់មួយនាភាគពាយ័ព្យស៊ីរី។
ជាទីក្រុងធំទី២នៃខេត្តអ៊ីដលីបដែលប្រជាជនចាកចេញអស់ ដោយសារការទម្លាក់គ្រាប់បែកនិងការបាញ់ផ្លោង ក្រុងម៉ាអារេតអាល់ណូអូម៉ាន ជាទីតាំងយុទ្ធសាស្ត្រមួយព្រោះស្ថិតនៅតាមផ្លូវថ្នល់M5 ភ្ជាប់ក្រុងអាឡែបជាក្រុងធំទី២របស់ស៊ីរីនៅភាគខាងជើងប្រទេសទៅក្រុងដាម៉ាស់ ដែលរដ្ឋអំណាចលោកបាចាអាល់អាសាដស្វែងរកការពារសន្តិសុខ។ ក្រោយវាយយកបានទីក្រុងនេះ កងទ័ពបានធ្វើនាថ្ងៃទី២៩មករានូវប្រតិបត្តិការបោសសម្អាត។
យោងតាមអង្គការសិទ្ធិមនុស្សស៊ីរីOSDH មានប្រភពព័ត៌មានច្រើនក្នុងប្រទេសថា ជនស៊ីវិល១០នាក់បានត្រូវបាត់បង់ជីវិត ដោយការទម្លាក់គ្រាប់បែករបស់រុស្ស៊ីលើភូមិកាហ្វ្រឡាតា នាភាគខាងត្បូងអ៊ីដលីប។ ចំណែកជនស៊ីវិល១១នាក់បានបាត់បង់អាយុជីវិតក្នុងការវាយប្រហារមួយរបស់របបស៊ីរីនៅជិតទីក្រុងសារ៉ាកេប ភាគខាងជើងក្រុងម៉ាអារេតអាល់ណូអូម៉ាន។ កងទ័ពស៊ីរីកំពុងវាយរុលឆ្ពោះមកភាគខាងត្បូងក្រុងសារ៉ាកេប ហើយដណ្ដើមយកបានមូលដ្ឋាន៥ក្នុងតំបន់នោះ។ ការប្រយុទ្ធគ្នានៅទីនោះកំពុងបន្ត។
សរុបចាប់តាំងពីថៃ្ងទី២៤មករាមក របបស៊ីរីដណ្ដើមយកបានមូលដ្ឋាន៣០នៅភាគខាងត្បូងខេត្តអ៊ីដលីប។ ថ្ងៃទី២៩មករាក្នុងសេចក្ដីប្រកាសមួយកងទ័ព អះអាងពីការវាយដណ្ដើមយកបានក្រុងម៉ាអារេតអាល់ណូអូម៉ាន៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ