ខេត្តមណ្ឌលគិរី៖ អាជ្ញាធរក្រុងសែនមនោរម្យ ខេត្តមណ្ឌលគិរី នៅថ្ងៃទី២៩ មករា ២០២០នេះ បានសម្រេចចុះរុះរើសំណង់បំពានចំណីផ្លូវសាធារណៈដោយផ្ទាល់ ក្រោយទុកឱកាសឲ្យប្រជាពលរដ្ឋរុះរើខ្លួនឯងច្រើនខែមកហើយ ប៉ុន្តែមានប្រជាពលរដ្ឋចំនួនតិចតួចប៉ុណ្ណោះ ដែលរួមអនុវត្តសហការជាមួយអាជ្ញាធរ…
ខេត្តមណ្ឌលគិរី៖ អាជ្ញាធរក្រុងសែនមនោរម្យ ខេត្តមណ្ឌលគិរី នៅថ្ងៃទី២៩ មករា ២០២០នេះ បានសម្រេចចុះរុះរើសំណង់បំពានចំណីផ្លូវសាធារណៈដោយផ្ទាល់ ក្រោយទុកឱកាសឲ្យប្រជាពលរដ្ឋរុះរើខ្លួនឯងច្រើនខែមកហើយ ប៉ុន្តែមានប្រជាពលរដ្ឋចំនួនតិចតួចប៉ុណ្ណោះ ដែលរួមអនុវត្តសហការជាមួយអាជ្ញាធរ ។
លោក នុត បឿន អភិបាលរងក្រុងសែនមនោរម្យបញ្ជាក់ថា អាជ្ញាធរក្រុងបានជូនដំណឹងឲ្យប្រជាពលរដ្ឋជុំវិញការរុះរើសំណង់បំពានចំណីផ្លូវច្រើនលើក និងផ្ដល់ឱកាសឲ្យពួកគាត់ច្រើនខែ ដើម្បីធ្វើកិច្ចការងារនេះ ប៉ុន្តែនៅមានប្រជាពលរដ្ឋមិនសហការ ដូច្នេះ គឺអាជ្ញាធរចាប់ផ្ដើមអនុវត្តដោយផ្ទាល់ ហើយនៅជំហានទី១ គឺរុះរើស្លាកប៉ាណូតាមដងផ្លូវ ចំណែកជំហានបន្ទាប់គឺរុះរើសំណង់របស់ពលរដ្ឋដែលបំពានចំណីផ្លូវ ។
លោក នុត បឿន បានឲ្យដឹងទៀតថា លំនៅដ្ឋានរបស់ប្រជាពលរដ្ឋក្នុងក្រុងដែលមានការជូនដំណឹងឲ្យរុះរើសំណង់បំពានចំណីផ្លូវនោះ មានចំនួន២១៧ផ្ទះ ហើយរហូតមកដល់ពេលនេះប្រជាពលរដ្ឋបានចូលរួមគោរពអនុវត្តទើបតែបាន៤៣ផ្ទះប៉ុណ្ណោះ ។ លោកបន្តថា ដងផ្លូវដែលតម្រូវឲ្យមានការរុះសំណង់ ឬសំយ៉ាបរឹងមាំរំលោភចំណីផ្លូវនោះ គឺនៅចំណុចផ្លូវភ្លោះសួនច្បារមករង្វង់គោព្រៃ និងពីរខ្សែទៀត គឺចាប់ពីចំណុចរង្វង់មូលគោព្រៃ ទៅចំណុចផ្លូវបំបែកដាក់ដាំ និងចំណុចផ្សារកែវសារ៉ាន់ តាមដងផ្លូវជាតិលេខ
៧៦ ។
លោកអភិបាលរងក្រុង ក៏បានសំណូមពរឲ្យប្រជាពលរដ្ឋដែលមានកាតព្វកិច្ចរុះរើសំណង់បំពានចំណីផ្លូវ សូមចាប់ផ្ដើមធ្វើជាបណ្ដើៗ ព្រោះបើរង់ចាំដល់អាជ្ញាធរចុះអនុវត្ត គឺមិនមានសងរាល់ការខូចខាតនោះទេ ។ សូមបញ្ជាក់ដែរថា ផែនការឲ្យរុះសំណង់ឬសំយ៉ាបរឹងមាំចេញពីចំណីផ្លូវនេះ មន្ត្រីជំនាញវាស់ចេញពីអាក់ផ្លូវចំនួន១៣ម៉ែត្រ នៅកន្លែងទីប្រជុំជន និងវាស់ចេញពីអាក់ផ្លូវ១៨ម៉ែត្រ ទៅ២៥ម៉ែត្រ នៅតំបន់ដែលចេញឆ្ងាយពីទីប្រជុំជន ៕
ចែករំលែកព័តមាននេះ