ខេត្តមណ្ឌលគិរី ៖ ព្រានព្រៃម្នាក់ដែលជំនាញខាងប្រម៉ាញ់សត្វ ត្រូវបានចាប់បញ្ជូនទៅសាលាដំបូងខេត្ត ក្រោយព្រានម្នាក់នេះបានចូលទៅតំបន់ហាមឃាត់ធ្វើការបរបាញ់សត្វព្រៃក្នុងស្រុកកោះញែក។
តាមប្រភពព័ត៌មានបានឲ្យដឹងថា កាលពីរសៀលថ្ងៃទី២៨ ខែមករា ឆ្នាំ២០២០ ជនសង្ស័យម្នាក់ត្រូវបានចៅក្រមស៊ើបសួរនៃសាលាដំបូងខេត្តមណ្ឌលគិរីសម្រេចឃុំខ្លួនដាក់ពន្ធនាគារបណ្ដោះអាសន្នពីបទដាក់អន្ទាក់ដោយប្រើបង្កៃ បង្កឲ្យមានការអន្តរាយដល់សត្វព្រៃដែលជាប្រភេទមានដោយកម្រ និងជិតផុតពូជ ជាបទល្មើសធនធានធម្មជាតិថ្នាក់ទី៣ ដែលប្រព្រឹត្តនៅក្នុងតំបន់ការពារធម្មជាតិ នៃដែនជម្រកសត្វព្រៃស្រែពក។
ព្រានព្រៃដែលក្លាយទៅជាជនត្រូវចោទឈ្មោះ ហក វ៉ាន់ ភេទប្រុស អាយុ១៩ឆ្នាំ រស់នៅភូមិកោះម្យើល ឃុំណងឃីលឹក ស្រុកកោះញ៉ែក ខេត្តមណ្ឌលគិរី ត្រូវបានមន្ត្រីឧទ្យានុរក្សដែនជម្រកសត្វព្រៃស្រែពក ចាប់ឃាត់ខ្លួនបានភ្លាមៗ បន្ទាប់ពីជននេះលួចធ្វើសកម្មភាពដាក់អន្ទាក់សត្វព្រៃ ដែលប្រើឧបករណ៍កែច្នៃដោយប្រើអង្គប់ បំពុល សម្លាប់ និងប្រើប្រាស់អាវុធជាតិផ្ទុះ ជាតិគីមី ថ្នាំពុល និងគ្រឿងឆក់ បង្កគ្រោះថ្នាក់ដល់សត្វព្រៃ និងអាចបង្កគ្រោះថ្នាក់ដល់មន្ត្រីឧទ្យានុរក្សក្នុងពេលចុះល្បាត។
មន្ត្រីជំនាញបានរឹបអូសវត្ថុតាងជាក់ស្ដែងនៃបទល្មើសធនធានធម្មជាតិរួមមាន ១-រំសេវផ្ទុះចំនួន០.៥គីឡូក្រាម ២-លួសឆក់ចំនួន៣ដុំ ៣-អង្គប់រស្ស័រនាំចូលពីប្រទេសវៀតណាមចំនួន៣ ៤-អន្ទាក់ខ្សែកាបចំនួន៥ខ្សែ ៥-អន្ទាក់ខ្សែគោចំនួន៦៥ខ្សែ ៦-ឧបករណ៍ឆក់ចំនួនមួយកំប្លេ ៧-ផ្ទាំងសូឡាចំនួន១ផ្ទាំង ៨-មងទាក់សត្វសំពោចចំនួន១ដុំ និង៩-អន្ទាក់ដែលដាក់ហើយចំនួន១០០ខ្សែ។
បច្ចុប្បន្នវត្ថុតាងមួយចំនួនត្រូវរក្សាទុកបណ្ដោះអាសន្ននៅមន្ទីរបរិស្ថានខេត្តមណ្ឌលគិរី និងមួយចំនួនទៀត មន្ត្រីឧទ្យានុរក្សកំពុងប្រមូលរួចបំផ្លាញចោលនៅកន្លែងកើតហេតុ ព្រោះអាចបង្កគ្រោះថ្នាក់ដល់អាយុជីវិតប្រភេទសត្វព្រៃ និងមនុស្ស៕ (កែសម្រួលដោយ ៖ ធីតា)
ចែករំលែកព័តមាននេះ