ខេត្តប៉ៃលិន ៖ រហូតមកដល់ពេលនេះអតីតតារាកំប្លែង និងជាតារាចម្រៀងវ័យក្មេងរបស់ផលិតកម្មសាន់ដេ សុខ មេសា ហៅនាយចឺម បន្ទាប់ពីឆាតញ៉ែស្រីស្នេហ៍គេទាំងយប់ តែប៉ះចំសង្សារនាងប្រើគណនីដូចគ្នាដែរគឺ ង៉ែត…
ខេត្តប៉ៃលិន ៖ រហូតមកដល់ពេលនេះអតីតតារាកំប្លែង និងជាតារាចម្រៀងវ័យក្មេងរបស់ផលិតកម្មសាន់ដេ សុខ មេសា ហៅនាយចឺម បន្ទាប់ពីឆាតញ៉ែស្រីស្នេហ៍គេទាំងយប់ តែប៉ះចំសង្សារនាងប្រើគណនីដូចគ្នាដែរគឺ ង៉ែត លីទី ជាអតីតកីឡាករបាល់ទាត់នៅក្លិបក្រសួងការពារជាតិ ក៏បានវាយនាយចឺមឲ្យរបួសក្បាលដេរ៥ថ្នេរ និងរបួសដៃជើងផង ។ ពេលនេះ លោក តាន់ គឹមហៀក ចៅក្រមស៊ើបសួរសាលាដំបូងខេត្ត បានចេញលិខិតកោះហៅនាយចឺម ឲ្យចូលខ្លួនបំភ្លឺនៅសាលាដំបូងខេត្ត នាថ្ងៃទី៣០ ខែមករា ឆ្នាំ២០២០ខាងមុខ ។
បើតាមលោក ហេង ឡុង ប្រធានសមាគមមិត្តសិល្បៈស្ម័គ្រចិត្តជួយសង្គម បានឲ្យដឹងថា នាយចឺម ត្រូវបានសាលាដំបូងខេត្តប៉ៃលិន ចេញដីកាកោះហៅទៅសាកសួរនៅថ្ងៃទី៣០ ខែមករា ឆ្នាំ២០២០ អំពីដំណើររឿងករណីហិង្សាដោយចេតនាមានស្ថានទម្ងន់ទោស និងខូចខាតដោយចេតនាពីសំណាក់ជនឈ្មោះ ង៉ែត លីទី កាលពីថ្ងៃទី១៨ ខែធ្នូ ឆ្នាំ២០១៩ កន្លងទៅ ។ លោកក៏អរគុណដល់លោកមេធាវី យូ ឧស្សាហ៍ ដែលបានស្ម័គ្រចិត្តជួយការពារក្តីជូននាយ ចឺម ដែលជាសមាជិករបស់សមាគម ។
យោងតាមដីការបស់សាលាដំបូងខេត្ត សំណុំរឿងព្រហ្មទណ្ឌលេខ២៦៥ ចុះថ្ងៃទី២០ ខែធ្នូ ឆ្នាំ២០១៩ បានបញ្ជាក់ថា ឈ្មោះ សុខ មេសា ហៅនាយចឺម ត្រូវចូលទៅកាន់សាលាដំបូងខេត្តនៅវេលាម៉ោង៩ព្រឹក ថ្ងៃទី៣០ ខែមករា ២០២០ ដើម្បីសួរនាំពីដំណើររឿងហិង្សាដោយចេតនា ប្រព្រឹត្តនៅចំណុចបុរីមកុដពេជ្រ ក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ សូមបញ្ជាក់ថា តារាចម្រៀងវ័យក្មេង សុខ មេសា ហៅនាយចឺម ពេលយប់មុនកើតហេតុបានទៅចូលរួមខួបកំណើតកូនរបស់បងធម៌ខ្លួនម្នាក់នៅភូមិផ្សារព្រំ រហូតដល់យប់ជ្រៅក៏ទៅសម្រាកនៅផ្ទះសំណាក់«ស្រីរ៉ូ» ។
តាមការចោទប្រកាន់ថា នាយប់នោះនាយចឺមបានឆាតញ៉ែសង្សារគេ ដែលពីមុននារីម្នាក់នោះក៏ធ្លាប់ជាសង្សាររបស់ខ្លួនដែរ រហូតដល់បើករថយន្តទៅរកនាងដល់មុខបន្ទប់នាវេលាម៉ោងប្រមាណ៤ទៀបភ្លឺថ្ងៃទី១៨ ខែធ្នូ ឆ្នាំ២០១៩ ក៏ទទួលរងការវាយពីសំណាក់ឈ្មោះ ង៉ែត លីទី ដែលបានបន្លំឆាតអន្ទងនាយចឺមឲ្យមកជួប ក៏វាយនឹងព្រនង់បែកក្បាលដេរ៥ថ្នេរ និងរលាត់ដៃជើង ។ពេលនោះ នាយចឺមបានរត់ចូលក្នុងហាងម៉ាស្សាមួយដើម្បីឲ្យគេជួយអន្តរាគមន៍ ខណៈ ង៉ែត លីទី អតីតកីឡាករបាល់ទាត់ដែលប្រើហិង្សានេះ ដោយសារតែភ្លើងប្រចណ្ឌនឹងសង្សាររបស់ខ្លួន ៕
ចែករំលែកព័តមាននេះ