រាជធានីភ្នំពេញ ៖ សមត្ថកិច្ចខេត្តសៀមរាបបានឃាត់ខ្លួនមនុស្ស២នាក់ ដែលបានប្រឌិតព័ត៌មានធ្វើឲ្យមានការភ័យខ្លាចដល់ប្រជាពលរដ្ឋថា ករណីឆ្លងជំងឺរលាកសួតដោយវីរុសកូរ៉ូណា នៅក្នុងខេត្តសៀមរាប ។ បន្ទាប់ពីឃាត់ខ្លួនមកសួរនាំអ្នកទាំងនេះបានចេញមុខមកសារភាពកំហុសរបស់ពួកគេនៅចំពោះមុខសមត្ថកិច្ច និងបានសន្យាថា ពួកគាត់ឈប់ចែកចាយព័ត៌មានប្រឌិតបែបនេះទៀតហើយ…
រាជធានីភ្នំពេញ ៖ សមត្ថកិច្ចខេត្តសៀមរាបបានឃាត់ខ្លួនមនុស្ស២នាក់ ដែលបានប្រឌិតព័ត៌មានធ្វើឲ្យមានការភ័យខ្លាចដល់ប្រជាពលរដ្ឋថា ករណីឆ្លងជំងឺរលាកសួតដោយវីរុសកូរ៉ូណា នៅក្នុងខេត្តសៀមរាប ។ បន្ទាប់ពីឃាត់ខ្លួនមកសួរនាំអ្នកទាំងនេះបានចេញមុខមកសារភាពកំហុសរបស់ពួកគេនៅចំពោះមុខសមត្ថកិច្ច និងបានសន្យាថា ពួកគាត់ឈប់ចែកចាយព័ត៌មានប្រឌិតបែបនេះទៀតហើយ ។
តាមនគរបាលខេត្តសៀមរាបបានបញ្ជាក់ថា អ្នកទាំង២នាក់ដែលបានចែកចាយព័ត៌មានប្រឌិតពាក់ព័ន្ធនឹងការរកឃើញមានជំងឺរលាកសួតកូរ៉ូណាក្នុងខេត្តសៀមរាបនេះមានឈ្មោះ ម៉ែន ចាន់នឿន ភេទប្រុស អាយុ៣៤ឆ្នាំ និងឈ្មោះ អ៊ឹង ជិងសេរីរតនៈ ភេទស្រី អាយុ២០ឆ្នាំ ដែលពួកគេជាបុគ្គលិកក្រុមហ៊ុនទេសចរណ៍ ។ ពួកគេបានមកសារភាពកំហុសចំពោះមុខសមត្ថកិច្ចនៅថ្ងៃទី២៨ ខែមករានេះ ។
សមត្ថកិច្ចបានបញ្ជាក់ទៀតថា ពួកគេទាំង២នាក់បានសន្យានៅចំពោះមុខសមត្ថកិច្ចថា នឹងមិនបន្តផ្សព្វផ្សាយព័ត៌មានមិនពិត ដែលបណ្តាលឲ្យមានការចលាចលដល់ប្រជាជនក្នុងខេត្តសៀមរាប និងប្រជាពលរដ្ឋទូទាំងប្រទេសទៀតឡើយ ។ ក្រោយធ្វើកិច្ចសន្យារួចអ្នកទាំង២នាក់ត្រូវបានអនុញ្ញាតឲ្យត្រឡប់ទៅផ្ទះវិញ ។
សូមជម្រាបថា នៅល្ងាចថ្ងៃទី២៨ ខែមករានេះ អាជ្ញាធរខេត្តសៀមរាបបានចេញមកបំភ្លឺថាពុំទាន់រកឃើញាមានករណីជំងឺរលាកសួតដោយវីរុសកូរ៉ូណាថ្មី (2019-nCoV) ណាមួយនៅក្នុងទឹកដីរបស់ខ្លួនឡើយ ។ សមត្ថកិច្ចនឹងបន្តចុះស្រាវជ្រាវ និងស្វែងរកជនដែលបានប្រឌិតព័ត៌មាននេះឲ្យចូលមកមកបំភ្លឺ និងមានចំណាត់ការបន្តនាពេលដ៏ខ្លីខាងមុខនេះ ។
ការចុះឃាត់ខ្លួនជនសង្ស័យនេះ កាលពីថ្ងៃទី២៨ ខែមករានេះ មានការចែករំលែកព័ត៌មានលើបណ្តាញសង្គមថា មានជនជាតិចិនចំនួន៤នាក់ ដែលស្នាក់នៅសណ្ឋាគារមួយកន្លែង ក្នុងក្រុងសៀមរាប ខេត្តសៀបរាម មានជំងឺរលាក សួតដោយ វីរុសកូរ៉ូណាថ្មី (2019 nCoV) និងបានឆ្លងដល់មគ្គុទេសក៍ភាសាចិនម្នាក់ ។ ជាមួយគ្នានោះដែររដ្ឋបាលខេត្តសៀមរាបបានអំពាវនាវដល់សាធារណជនកុំបន្តផ្សព្វផ្សាយនូវព័ត៌មានមិនពិត ឬមិនមានមូលដ្ឋានច្បាស់លាស់ដែលបង្កផលប៉ះពាល់ដល់សណ្តាប់ធ្នាប់ និងសន្តិសុខសង្គម ហើយជនប្រឌិតព័ត៌មានអាចប្រឈមចំពោះមុខច្បាប់ ៕
ចែករំលែកព័តមាននេះ