រាជធានីភ្នំពេញ ៖ មិនមែនជាការសម្តែង តែនេះជារឿងកើតឡើងជាមួយអតីតតារាកំប្លែង និងជាតារាចម្រៀងធ្លាប់ល្បីឈ្មោះ សំ ប៉ូលីដា ដែលពេលនេះដំណើរជីវិតរបស់អ្នកនាងក្លាយទៅជារឿងសោកសៅ នឹកស្មានមិនដល់។ អ្នកនាងបានប្រែជាស្រពោនទាំងសិល្បៈ និងជីវិតរស់នៅ ហើយអំឡុងពេលសព្វថ្ងៃ រកតែប្រាក់ចិញ្ចឹមកូនអត់មានទេ ។
អ្នកនាងបាត់បង់ឱកាសដើរច្រៀង ដាច់លុយ១ខែរួចមកហើយ ព្រោះជំងឺប៉ុន្មានមុខមកផ្តាច់យកទៅសម្រាកព្យាបាល ប្រើប្រាស់ខ្ទង់ចំណាយច្រើនពេក។ មហាជនមួយចំនួន នៅតែយល់ថា សំ ប៉ូលីដា ធាតុពិតធ្វើខ្លួនដុនដាបរយីករយាក ត្អូញអត់ត្អូញលំបាក គឺជារូបភាពសម្តែង និងជាការបំភ័ន្តភ្នែកយកឱ្យគេអាណិតតែប៉ុណ្ណោះ។
លើសពីនេះ គេនៅតែលើកឡើងថា អ្នកនាង សំ ប៉ូលីដា ក៏នៅសេសសល់ទ្រព្យមួយចំនួន នៅឡើយមិនទាន់អស់ពីខ្លួន ។ អ្នកនាងក៏ធ្លាប់ធ្វើជាថៅកែហាងបៀហ្គាដិន ហ៊ឺហាកាលពីអតីតកាល រឿងអ្វីដែលមកក្ររកប្រាក់មើលជំងឺមិនបាន។ យ៉ាងណាមិញ អ្នកនាងធាតុពិតមានរឿងជាច្រើនដែលស្មុគចិត្ត ហើយការអស់ទ្រព្យពីខ្លួននេះហើយធ្វើឱ្យអ្នកនាងអាប់អួរលែងចង់ធ្វើអ្វីតទៅទៀត។
តបការរិះគន់ និងការយល់ឃើញអ្នកនាង សំ ប៉ូលីដា ដែលក្នុងខ្លួនពេលនេះមានជំងឺប្រចាំកាយ បានរៀបរាប់ថា អ្នកនាងមិនខឹងអ្នកយល់ឃើញថា នាងលាក់ពត់ ធ្វើជាឈឺនោះទេ។ ប៉ុន្តែសភាពពិតអំឡុងពេលនេះ សេដ្ឋកិច្ចរស់នៅប្រចាំថ្ងៃរបស់អ្នកនាងចង់រលត់ដូចចង្កៀងជិតអស់ប្រេងបាត់ទៅហើយ។ រាល់ថ្ងៃនាងបានការអាណិតអាសូរពីថៅកែហៀហ្គាដិនជ្រោយចង្វា បានអាសូរផ្តល់ទីកន្លែងឱ្យច្រៀ ចិញ្ចឹមកូន រូបនាង និងម្តាយចាស់ប្រមាណមួយឆ្នាំហើយ។
ជាក់ស្តែង១ខែកន្លងទៅនេះ អ្នកនាងឈឺធ្ងន់ដល់ថ្នាក់សម្រាកពេទ្យដោយជំងឺបេះដូង មេរោគក្នុងថ្លើម និងជំងឺមួយចំនួនទៀត។ រយៈពេល១ខែអាក់ខានឡើងច្រៀង ពេលខ្លះធូរបន្តិចក៏ស្ទុះទៅច្រៀង បានតែ១បទឬ២បទក៏ត្រជាក់ដៃត្រជាក់ជើង បេះដូងធ្វើទុក្ខដឹកមកពេទ្យក៏មាន។
អ្នកនាងមិនចង់អត់កន្លែងច្រៀងទេ ព្រោះទីតាំងហាងខាងលើនេះហើយដែលឱ្យតម្លៃអ្នកនាងបានការងារធ្វើ។ ម្ល៉ោះហើយទើបខ្លាចចិត្តថៅកែ បើទោះជាគាត់ឱ្យសម្រាកមើលខ្លួនឱ្យជា និងជួយផ្តល់ថវិកាថ្លៃព្យាបាលក៏អ្នកនាងនៅតែឆ្លៀតមកច្រៀង។
អ្នកនាងថា ការធ្លាក់ខ្លួនក្រជាបទពិសោធន៍មួយដែលស្តាយបំផុតក្នុងឆាកជីវិត ។ ពេលអំឡុងល្បីឈ្មោះលេងកំប្លែង គឺរកលុយបាន គិតតែពីហ៊ឺហា ដើរចាយវាយលុយកាក់ផឹកស៊ីភ្លើតភ្លើន មិនចេះទិញដីធ្លីទុក ដល់ពេលធ្លាក់ខ្លួនទើបដឹង។ ទាំងនេះជាបទពិសោធន៍សម្រាប់តារាជំនាន់ក្រោយរកបាន កុំដើរខ្ជះខ្ជាយសន្សំលុយទុកដាក់ឱ្យល្អ។
អ្នកនាងបែកពីគ្រួសាររបស់ទ្រព្យចែកគ្នារៀងៗខ្លួន ហើយអ្នកនាងចេះតែដើរចំណាយនេះចំណាយនោះ គ្មានបានប្រកបការងារទៀតរឿងអ្វីមិនស្បើយ។ សព្វថ្ងៃនេះ លក់ទ្រព្យអស់ពីខ្លន មើលជំងឺ ហើយស្ថានភាពជំងឺក៏ល្អមកវិញ ។ ពេទ្យថា ឱ្យផ្តាច់ស្រា សម្រាកឱ្យច្រើន កុំគិតច្រើនធ្វើខ្លួនឱ្យសប្បាយ ។ ជាពិសេសបើហ៊ានប្រើគ្រឿងស្រវឹង គឺជំងឺរើមកវិញទ្វេដង ទើប៣ខែមកហើយដែលនាងខំអនុវត្តន៍តាមតឹងតែងបំផុត ព្រោះមហាជនដឹងហើយថានាងញៀនស្រាបែបណា។ (កែសម្រួលដោយ ៖ បុប្ផា)
ចែករំលែកព័តមាននេះ