រាជធានីភ្នំពេញ ៖ ក្រសួងអប់រំយុវជន និងកីឡាបានអំពាវនាវដល់គ្រប់គ្រឹះស្ថានសិក្សានានាទាំងអស់ចូលរួមទប់ស្កាត់វិធានការចំពោះជំងឺផ្លូវដង្ហើមថ្មី (កូរ៉ូណា) ។ ការអំពាវនាវរបស់ក្រសួងអប់រំ បន្ទាប់ពីក្រសួងសុខាភិបាលបានរកឃើញជនជាតិម្នាក់មកកម្ពុជាមានជំងឺកូរ៉ូណានេះ នៅខេត្តព្រះសីហនុ កាលពីថ្ងៃទី២៧ ខែមករានេះ ។
ក្រសួងអប់រំបានសរសេរលើបណ្តាញសង្គមហ្វេស ប៊ុក នៅថ្ងៃទី២៨ ខែមករា ឆ្នាំ២០២០ យ៉ាងដូច្នេះថាគ្រឹះស្ថានសិក្សានានាចូលរួមចាត់វិធានការណ៍ការពារវីរុសកូរ៉ូណាថ្មី (2019-nCoV) ។ បន្ទាប់ពីក្រសួងអប់រំយុវជន និងកីឡាចេញសេចក្ដីណែនាំស្ដីពីការអនុវត្តវិធានការ បង្ការ ជំងឺរលាកសួតដោយវីរុសកូរ៉ូណាថ្មីនោះគ្រឹះស្ថានសិក្សាសាធារណៈ និងឯកជននានាបានចូលរួមធ្វើសកម្មភាពទប់ស្កាត់ការឆ្លងវីរុសនេះនៅតាមគ្រឹះស្ថានសិក្សារបស់ខ្លួនដោយលើកទឹកចិត្តឱ្យបុគ្គលិក និងសិស្សានុសិស្សពាក់ម៉ាសការពារជាប្រចាំមានការវាស់ស្ទង់សីតុណ្ហភាពក្នុងខ្លួនមុនពេលចូលរៀនជាដើម ។
ក្រសួងបានអំពាវនាវបន្តថា ក្នុងនោះដែរ នៅតាមសាលារៀនក៏ត្រូវមានដាក់អាកុល សាប៊ូ សម្រាប់ សិស្សលាងដៃ ឱ្យបានទៀងទាត់ និងញឹកញាប់ជាប្រចាំ ពិសេសមុនពេលបរិភោគអាហារ ឬក្រោយពេលប៉ះពាល់អ្វីដែលកខ្វក់ ព្រមទាំងមានការណែនាំឱ្យសិស្សចៀសវាងប៉ះពាល់អ្នកមានជំងឺផ្លូវដង្ហើម ប្រកាន់ខ្ជាប់នូវការអនុវត្តអនាម័យស្អាត សុវត្ថិភាពចំណីអាហារមិនគួរទៅកាន់កន្លែងណាដែលមានមនុស្សអ៊ូអរពេក ព្រមទាំងបរិភោគទឹកឱ្យបានច្រើន ។
សូមជម្រាបថា បច្ចុប្បន្នវីរុសកូរ៉ូណាថ្មីកំពុងរាតត្បាតនៅទីក្រុងវូហាន (Wuhan) នៅខេត្តហ៊ុយបេ (Hbei) សាធារណរដ្ឋប្រជាមានិតចិន ហើយរាតត្បាតដល់បណ្ដាប្រទេសផ្សេងៗទៀត នៅជុំវិញពិភពលោកដោយមិនទាន់មានថ្នាំព្យាបាល ឬវ៉ាក់សាំងបង្ការនៅឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ